قصيده الشاعر ناصر بن محمد الفراعنه (( ناقتي يا ناقتي )) في شاعر المليون

[منصور السبيعي]

ناقتي يا ناقتي .. لا رباع ولا سديس=وصليني لابتي من ورى هاك الطعوس
حايل(ن) رابع سنه من خيار العيس عيس=خفها لا درهمت كنه بالنار محسوس
في دجى خالي خلا .. لا حسيس ولا نسيس=تدوخك من شدة البرد طقطقة الضروس
في عيوني يكفخ الطير ويطيح الفريس=وانتهض جساس من دون خالته البسوس
وفي خفوقي فرخ جنية(ن) يضرس ضريس=يوم اوردها هجوس(ن) واصدرها هجوس
ديرتي دار ابن ضاري وابن غثلم جريس=ديرة اللي دوجو في فيافي نجد جوس
ديرتي يا بنت شيخ(ن) ومعدنها نفيس=عيطموس(ن) دونها دثرتني عيطموس
جادل(ن) مطرق جسدها مع الغربي يميس=طينة(ن) من تربه الخلد والدم محموس
نقشت خمس(ن) من الخمس في ليل الخميس=ليت شعري ما ارادت بهذا دختنوس
كم تمنى امعه مثلها فتنه ابليس=كان يمكن قد قلب نصف امتنا مجوس
كن دماث الصدر منها كنيسه او كنيس=صومعة رهبان دين(ن) يؤدون الطقوس
آتقوس مع تقوس نواهدها واقيس=قبتين(ن) قاب قوسين قوس(ن) جنب قوس
خصرها يحكي لنا واقع القوم التعيس=وردفها عن غطرسة بوش يعطينا دروس
من رغم قصرها ما يجالسها جليس=تصبح اطول نسوه الارض في وضع الجلوس
العروسه ماتبي غير ابو تركي عريس=العروسه نجد ماهي بحيا الله عروس
نجد بنت المجد ونسة مونسة الونيس=ما عسفها الا معزي ضحى يوم العبوس
كل اهل نجد(ن) هلي من آجا حتى الخميس=في ذراهم بلتجي عن مقففة الرسوس
وعيشتي ما بين اسود(ن) ولا ماني رئيس=خير من كوني رئيس(ن) على شلقه تيوس
وليس عيب ان خدعني بمكره كل هيس=لأن ما يفهم بطبع الهيوس الا الهيوس
مصطفى في مأدبه عمه البابا لويس=كبر اللقمه تحت ضوء حمراء الكؤوس
وطسم حدتها على حائط المبكى جديس=يوم شقت ثوبها بنت عفار الشموس
سيده هاك القصر اسمها الاول لميس=دونها سمر الحناجر بترها حد موس
قسقست لأحرارهم قيس قيس قيس قيس=والبستهم من مهانتهم انواع اللبوس
بين خدعه كعب أخيل(ن) ومولد ادوريس=درسونا الاله والمدرس هو مروس
ويش لاقو من قناه السويس اهل السويس=وويش لاقو من تلمسان قوم منسنوس
كلهم من شدة الجوع راحو خندريس=بين غيبوبه مخدر وصحوه عرق سوس
ثورة(ن) راحو سببها بتوع الاوتوبيس=وش نبي فيها وهي ما تهز الا الغروس
آفه المرء اثنتان .. إلف كاس وحب كيس=والنفوس اليا بغيت تعرفها ارم الفلوس
ينكشف زيف الشعارات لا حمي الوطيس=ترجع الاذناب اذناب وتبقى الرؤوس رؤوس
صدق لا قال العرب ما يحوص الا الخسيس=ولا يوطي الرؤوس شي مثل ضعف النفوس
ناقتي يا ناقتي لا رباع ولا سديس=وصليني لابتي من ورى هاك الطعوس