قصيدة وداعية لنفود السر للشاعر سفر الهيلوم.

[عتيبي للابد]

تبكي نفود السر عقب ادبر الزين = واهل الدبش من فوقها راحلينا
تلوح روس طعوسها للمقفين = ملواحها ساعة لفوا مقبلينا
لعتيبه الهيلا رموز وعناوين = شرق(ن) من القرنه يسار ويمينا
ياما تدفق فوقها الدمع من عين = دمعة لقا وفراق ساعة مشينا
كم سجلت فيها المعارف دواوين= وطالت رقاب الشعر بالمبدعينا
بعد اشبعوها بالغنم والبعارين = حق ولقي واصغر وكبش سمينا
وشبعت وحوش السر عقب المساكين = من دبرة اهل الخير والمحسنينا
شهرين والصحرا زهور وبساتين= بالذكر وبيوت القصيد الثمينا
عتيبه الهيلا سعوط المجانين = رغم انتقاد الحسد والمرجفينا
ينعق غراب البين ويحصل البين = وحنا تظافر جهدنا واكتفينا
ون جا الولا بصفوف حنا الموالين= نبقا جنود المملكه ما حيينا
علم عليه شهود لو قيل من اين = واحداث سطرها الدهر وانتهينا
في ظل ربي ثم ظل السلاطين = اللي ولاهم حق واجب علينا
ال السعود (المخلصين) الميامين= للمملكه هامه ودرع(ن)حصينا
وعشنا بها نغلي بعض ومتصافين = اخوان دين وحب (للمخلصينا)
وجينا نباهي بالبكار المزايين = وعطر القوافي من هجوس تجينا
ونحطها لهل الوفا بين قوسين = والقوس حاجب والرموش الثنينا
وصلاة ربي عد ماينبت التين = على نبيا دلنا واهتدينا

صح لسانك يا بو سلوم و لا عدمنا جديدك في الشعر , اتمنى ان تحوز على اعجابكم.

آخر تعديل مرزوق حمدان العتيبي يوم 06-Nov-2007 في 05:39 PM.