مدري علام الموت بذ الشعوبي

[النايع]

مدري علام الموت بذ الشعوبي

البارحة يوم الخلايق مهنّاه = في نومها وجدي وهمّي سروا بي
غنيت صوتٍ كل من سمعه اشجاه = يرخي له الاسماع ويلدّ صوبي
الله يا دنيا عناها عرفناه = قد مسنا فيها النصب واللغوبي
دنيا لها في كل يوم مقاساه = ويا كثر ما تجري عليك الخطوبي
مرٍ كما وجه القمر في محياه = وامرار منها الدم الاشقر يروبي
يالله يا رب الفياض المعذاه = عفوك مهوب عن العباد امحجوبي
يا رب عبدٍ لك يناجيك بدعاه = يشكي لك صروف الدهر والغيوبي
انا مطيعٍ لك على ما اتوراه = وانته محل العفو تغفر ذنوبي
والموت حر الموت مانيب ويّاه = مفرّق الحيّان بذ الشعوبي
ويلي على فرقاه ويلاه ويلاه = ماباه ياقف يحتري في دروبي
ما اريد لا ذكره ولا اريد طرياه = وهو مع الأيام يقرب قروبي
حتى تغلّق ساعة الصفر والقاه = واذوق ويلات الكرَب والنشوبي
ما تنفع السلوى ولا من مواساه = ضاق الفضاء ما عاد صدري رحوبي
ضاق الفواد وضيقةٍ فيه تدهاه = كنه يزايم قطن ضلع الحروبي
يا موت موتي موت موتي وموتاه = يا حسرةٍ بالكبد شبّت شبوبي
فارقت خلاني وربعٍ لهم جاه = شالوا عظامي بالنعش وانتحوا بي
يم القبور ويم دارٍ مسوّاه = جيرانها رقّاد خرثى الجنوبي
سدّوا عليّ القبر لاوا عناياه = وامسيت من بين اللحود امغلوبي
راحوا وخلوني على غير ما ابغاه = مصايبٍ منها تروغ القلوبي
وصحيت من نومٍ غطتني بلاياه = تقول اشوف الشمس وقت الغروبي
عاينت في جسمي ليا الدود يرعاه = وعاينت في ثوبي اليا الخام ثوبي
وجوني اثنينٍ خلقهم ما اتحلاه = إلا غضاب وبالحواجب قطوبي
قالوا تمنّ وقلت ويش اتمناه = ويلي على شم الهوى والهبوبي
واطرق فيافي نجد مع كل موماة = و اهز باليمنى طويل الكعوبي
واخيل براقٍ تقافت عشاياه = واسج رجلي مع دروب النصوبي
واعبد ولي العرش وادوّر رضاه = واغسل ثيابي عن ذنوبي واتوبي
قالوا لي ان العبد لا كب دنياه = ما عاد له فيها رجوع وطبوبي
وانته قضيت وكل ما فات تجزاه = صحايف اعمالك ملتها الكتوبي
مرهون بأعمالٍ على اللوح محصاه = خيرك وشرك بالكتاب امحسوبي
والموت غيره شيءٍ أدناه واشواه = يودع صفى رضوى يمور ويذوبي
ومن لا عطى درب السنع ربه اعماه = ما ينفعه طيب النسب والحسوبي
أحدٍ شقيٍ لاهب النار يصلاه = وأحدٍ يصب الخير فوقه صبوبي
قلت الله اقوى من تعلق به اكفاه = وانا لعفو الله مريد ورغوبي
ارجيه دوم العافية والمعافاه = ويعوض من هيلت عليه التروبي
وصلاة ربي عد وبلٍ نثر ماه = وعد الهبوب وعد نبت العشوبي
على نبيٍ بالدجى نور مشكاة = الصادق المصدوق ما هو كذوبي

وسلامتكم