ولا شعرها من على ردفها تاج .. !

[فيصل الثبيتي]

السلااام عليكم .. مساء الشعر

متواضعة .. تحت اذواقكم

اللي خذتني بالدلع والتغنّاج=لبّا غلاها .. يوم تنثر غلاها
مانيب لا شاعر ولانيب محتاج=يكفيني اني مرتكي في حشاها
خشّت على قلبي ولا فيه مخراج=يوم ادخلت قلبي قفلته معاها
حب ٍ خلق فالناس تسعين هرّاج=ما بين حسّاد العرب واخوياها
تصافقت من شانها زرق الامواج=والارض جتها هزة ٍ في ضحاها
يوم اشرقت شمسين قم حج يا حاج=ما يندرى وشهو يجي من وراها
يمكن تعيش الناس من تحت الابراج=ويمكن تبقي من غداها عشاها
ويمكن تسوي فلسفة فن الازعاج=ويمكن هالاسهم يرتفع مستواها
ويمكن تهجد الحرب في قوم حَجّاج=ويمكن تشب النار فاللي بغاها
بنت ٍ خلقها اللي له الناس حِجّاج=سبحان منهو كل زين ٍ عطاها
خدودها مع فمّها فتحة ادراج=خزنة ملك ما كل واحد لقاها
ألماس جنب ألماس في خط منعاج=داير على حلو الشهد من حلاها
والعين خلف معسكر ٍ فيه الافواج=تضرب تحيّه كل ما اومت علاها
ولا شعرها .. من على ردفها تاج=تاج الملوك اللي تومّن حماها
لبّا حلاها .. كلّها طب وعلاج=تحفه .. وكل الناس صارت تباها
وصفتها وانا على الوصف سجّاج=ولا شربت الا من الجم ماها
نسج الخيال اللي كما ورد هدّاج=اربع بيوت ٍ بين شوف وعماها
اليا سكنت فالحفر والا فالافلاج=والا بديرة .. ما يبرّد هواها
شعشع لها نور ٍ بلا ضو وسراج=من عند رب ٍ ما عطانا سواها
لبّا غلاها والدلع والتغنّاج=يوم الدلع والغنج .. لبّا غلاها

وسلامة من يقرا ...

آخر تعديل فيصل الثبيتي يوم 13-Aug-2007 في 02:26 AM.