رسالة

[تالي الليل]

1. يا ما حلا الجلسه على العز والطيب .. في مجلسن كل الرجال تعنى اله
2. في مجلس مافيه غير التراحيب .. ومعزب الضيفان راكز تدلاله
3. أطيب لن جيته من همومي أطيب .. ومن قبل لا يجي له تراني بحاله
4. تهمج عليه صافيات المشاريب ... والهم يفتح في ضلوعى وكاله
5. فيه السوالف صادرات بترتيب .. مافيه واحد يحتكرها لحاله
6. أجيه لو ينزح فروس المراقيب ... والقلب يحمل جوف صدري رساله
7. أحفظ صلاتك يحفظك عالم الغيب .. واحد أحد قيوم جلا جلاله
8. وعلى وطنك اصحي يجي منك تخريب .. مثل اللذي سووه ذوك الحثاله
9. سلط عليهم وأحترص زين ياذيب .. ماهم سعوديه لو بالكفاله
10. على مثل هذا نحط المصاليب .. مايقرب الديره ولا له عماله
11. نرخي على راسه بروس المشاعيب .. ولاله قريب ولا مجيب لسؤاله
12. ولإجل الحلال اسعى وحك العراقيب .. وخل الحرام بعيد مالك وماله
13. وأبوك لن شفته كسى عارضه شيب .. لا لا تزحزح عنه خلك قباله
14. والسر صونه لا يجي فيه تسريب ..واصح مع الايام يبدي هلاله
15. والجار مهما جار أدمح له العيب .. يذكرك بكره عند تالى عياله
16. والضيف فوق الراس ماعنه تجنيب .. إله العشاء مطلوب لو من بقاله
17. ولا تخاوي مدعين الإكاذيب . اللي على عثرتك يفتل حباله
18. والنذل لا تمشي معه لو هو مصيب ..القسم عنده للخوي النذاله
19. وخله يروح ولا يجي عله يخيب .. تلقى مع الايام واحد بداله
20. وخل البخيل اللي كثير العذاريب .. اللى على أهل الطيب ينشب رياله
21. وليا لفى المولد هذبه تهذيب .. ومن قبل لا يلفيك عرب خواله
22. وإن ضاق صدرك انتهج للمضاريب .. اللي نسيمه مثل راس الخلاله
23. وكشخ وزين غترتك بالمرازيب .. قدام من يشني ومكروه فاله
24. واصحى تري دنياك فيها تعاجيب .. وتلف فوق الناس مثل المحالة
25. مره لها بسمه ومره مقاليب .. واللى صفى فيها تغثرب زلاله
26. والناس فيا فرق بين التراكيب .. كلن يحصل مكسبه من مجاله
27. والشمس لو تطلع عصر لا زم اتغيب .. أقرب مثل للعمر لو كنت داله
28. عمري وصل حول الثلاثين تقريب .. يمشى ودايم خطوته بالعجاله
29. ترى عمري لا شك لا ريب .. ياخذ بني أدم ويترك حلاله
30. ويحط فوق الراس رمل ومناصيب .. والناس ينسونك ويا هملاله
31. هذى خلاصه مكسبي والتجاريب .. للي يبي الدنيا تمر بسهاله
32. والخاتمة صلوا على راعي الطيب ..عداد من يقرأ حروف الرسالة
الشاعر : فارس الثبيتي

آخر تعديل تالي الليل يوم 02-Jul-2007 في 02:43 AM.