مـــــــــاني بضـــــــــــــــاربه

[الازوري]

يقول الذي وده بشوفة حبايبه=وكمّل سنه ما عاد للطرف غايبه
فقلب(ن) سوات اشعيل ما همه الهوى=ولا هد من حيله ولا لآن جانبه
وقلب(ن) سوات العود يلعب به الهوى=وقلب(ن) سوات العير حبله بغاربه
ويا ويل ويلي من غرام(ن) يسوقني=جفول(ن) سوات المهر يجفل بصاحبه
فلا انته بقد الخيل حتى تسابقه=ولا انته بقد الجيش حتى تحاربه
فلا كل من غنى تغنى من الهوى=ولا كل من ينصح كثيره تجاربه
ولا كل شيخ(ن) يلحق الصبغ لحيته=ولا كل قرم(ن) يلحق الموس شاربه
تعبنا من الدنيا وخضنا سنيها=وجينا بمشراق الزمان ومغاربه
ليا شفت خلي صد عن سكة الهوى=وسكّر شبابيكه وطفى كهاربه
فلاني بجالس له ولاني بزاهمه=ولاني بشمّاته ولاني بظاربه
غرام(ن) يذل النفس ماني بحاجته=وشوق (ن) يجيب ادموع ماني بقاربه
فلا القلب سوى شي لولا عزيمته=ولا الطير سوى شي لولا مخالبه
فنا شمت مثل الطير عما يليق به=ولو مات بعض الناس ماني بطالبه