أمــــــــــي

[هلال العتيبي]

هذه الآبيات كتبتها العام الماضي حين زيارة والدتي شفاها الله لمنزلي
ذات مساء وهي الآن طريحة الفراش دعواتكم لها بالشفء العاجل

أمـي الله يحييهـا ويسعـد مساهـا= شرفت دارنـا والبيـت نـوره تـلالا
أشرقت ظلمة النفس وتجلى ضياهـا=والخواطر بحضرتها تبختـر جمـالا
في حضور أمي الاشواق تسمو مداها=والمشاعـر تغنـي بهجـة وابتهـالا
لو بغت نور عيني ماترددت جاهـا =ولو بغت كل عمري تـم ماقلـت لالا
ماعبرنا الطريق إلا بنعمـة دعاهـا=لين صرناشموخ وعز كبـر الجبـالا
دايم تقـول وتـردد وترفـع يداهـا=الله يصونـك ويحفظـك رب الجـلالا
لو عملنـا وقلنـا مالحقنـا جزاهـا=أرضعتنا الغـلا والطيـب نبـع زلالا
يوم أبونا توفى في بدايـة صباهـا=ورثت الفقر مع بنت وثلاثـة عيـالا
استعانت بمولاهـا يسـدد خطاهـا= زادها الفقر قـوة والعـذاب احتمـالا
من شتات وغثا الايام لمـت قواهـا= تعبت وشقيت وعانت وربـت رجـالا
كانت تشوف في ضحكة ولدها دواها= وإن تعب تتعب وتسهر ليـال طـوالا
إن زعل واحد منا تعكـر صفاهـا= وإن فرح تشعل الدنيا فرح واحتفـالا
امنا مدرسة تعليمنـا فـي حماهـا= امنا كنز مكسب ثـروه وراس مـالا
واجب انا نقدرها ونشكـر عطاهـا= مابقي غير هيل فـي حلـوق الـدلالا
نسأل الله لها حسن الختام ورضاهـا= من رضاها رضى الرحمن جل وتعالى

ا

آخر تعديل هلال العتيبي يوم 28-Jun-2007 في 04:13 PM.