قصيدة وأريد آراؤكم يا بني عمي وإنشاء الله تعجبكم؟؟؟؟؟

يامل قلب كل ما قام مرتاع=جاته هموم مثل صفق المدافيع
عيا يطيع وعقب ماشافها طاع=وأرخى لها حبل العيون المداميع
والدمع وسط العين للموق صراع=مثل المزون الظافيات المساريع
على زمان ماحسب قلة الصاع=كلن على رزقه يحوف الزراريع
يوم القبايل بين شاري وبياع=هذا ذبح هذا وهذا عطى الريع
جينا بربع بالمراجل لهم باع=وخلوا قبايل نجد مثل المتابيع
عتبان مثل النجم بالنور لماع=أهل الفعول مطوعين الصعاصيع
وياللي تبا الفزعة ولا فيه فزاع=انحر عتيبة مكرمين المجاييع
ولا ثارت الهيجا وعلم الخطر شاع=وتفرقوا أهل القلوب المفازيع
ربعي عتيبة مخلفة جمع وأقطاع=يشهد على ماقلت قحطان وسبيع
وجا للجزيرة صقرها ظافي الباع=عبدالعزيز مقطع الروس تقطيع
راسي وفعله واضح بكل مطلاع=نادر ويشهر بالجبال الطواليع
ماجاته بمال ولا ضربة اصباع=جاته عقب ضرب القنا بالمعاميع
وكنا لهم حنا على خير من طاع=في راي أبو تركي سيوف بواتيع
وفي عهد أبومتعب ذرا كل من جاع=عشنا حياة ياعسى ماهي تضيع
شهد بحبه دور وأراض وأصقاع=ملك قلوب الشعب شايب مع رضيع
حكم بحكم الدين والسيف قطاع=وعلى المعادي بالرماح المشاريع
وحنا لهم درع على رد الأطماع=وحنا كعام المعتدي والطماميع
بسيوفنا ورماحنا دوم شراع=حدر الاشارة مانزيد المواضيع
وياشلة الإرهاب موعدكم الداع=يوم القيامة والحشر والتوازيع
كلن يجازى بعمله من عصا وطاع=وماهي تفيد هناك كل الموانيع
وياخوك أنا بوصيك بكل الانواع=واحذر تفرط في وصاتي بها طيع
إليا تبا العزة وتقدير الأشياع=طع والدينك وأطوع النفس تطويع
أمك وأبوك أحلى من الشهد لاماع=حافظ عليهم بالزروف المشاميع
لاقال لك حاجة تلقاه بالساع=وأرظه وعزه تكتسي بالمنافيع
وبابك تحذََّر لا تصكه بمصراع=في وجه ظيفك وأشرع الباب تشريع
واحشم قصيرك وكل من جاك ملتاع=واوف الحقوق وسنع الفعل تسنيع
وربعك وجيرانك لهم سلم وأطباع=حافظ على الجيرة بطيب المنابيع
هذا كلام فاح من طيبة القاع=وعسى الولي يسقي جميع المرابيع
وصلاة ربي عد ماسمعت أسماع=على النبي وعداد موتى مصاريع