من أروع الردود في ساحات المحاورة ..

[لماح]

السلام عليكم ,.,.,.,.,.,.,

يالربع هذا الموضوع واضح من عنوانه ..

والحقيقة موضوع فيه كثير من الفائدة والمتعة ..

بعيدا عن التعصب وعن التجريح وغيره ..

هذي المواضيع تشرف فن المحاورة الأصيل وتظهره بصورته الحقيقه ..

واصل المحاورة هو الفتل والنقض .. كما هو معروف

حتى أن الناس في الوقت الحالي يعتقدون أن المحاورة هي عبارة عن سبني وأسبك !!!

على العموم راح أبدأ بأول الردود في ساحات المحاورة والحقيقة هي كثيرة ..

ولكن راح أختار اللي أقدر أتذكره ..


يقول ابن عتقان (بحر جده) مع حبيب العازمي :

يهرجون العوازم مار باقي شرهم محبوس .. والحين الحكومه ما تخلينا نصارعها

رد حبيب العازمي :

لو ان الحكم فرقنا فلا زلنا بعد كابوس .. ولا يا ما اطيب السلمان والكابوس يفجعها

ايضا في نفس المحاورة قال ابن عتقان :

نياق سليم عاديه وناقكتم بست ديوس .. تحالف دونها العتبان وتوقع باصابعها

رد العازمي :

نياق سليم معروفه علاها جودة الطرطوس .. بطون كبار والفصفص من الدكان يشبعها


يقول عبد الله العير (الله يرحمه) مع ملفي المورقي :

مطير حصن تصاهل وانت خابرها ..
تدخل على عيال عمك في مقابرها ..
الغلطه اللي مضت لك لا تكررها ..

والنار ما تحرق إلا رجل واطيها ..

رد ملفي المورقي :

مادام تدخل مع الموت ذكرت الله ..
ونفضت كم العباه وقلت بسم الله ..
ما فيه مجنون يذكر غير عبد الله ..

والنار ما تحرق .....


وفي نفس المحاورة يقول ملفي :

والله لو انك لحالك ما تطاولني ..
وإنك في بعض السوالف ما تزعلني ..
لكن موجود في جنبك مية جني ..

والبيت ما يثبت إلا فوق سيسانه ..

رد العير :

يكفيك من جننا واحد يغني لك ..
قدام تفرض على ربعك معاديلك ..
العير جني ويقعد لك ويوميلك ..

والبيت ....


طبعا البيوت السابقة والموالات أما ان تكون طريفة خالية من التجريح .أو فيها معنى مبطن ولو كان سهل الفهم .. يعني دفن بسيط ..

لذلك أتمنى كل من يشارك أن يشارك ببيوت وموالات خالية من التجريح لأحد وبعيدا عن التعصبات

وأيضا لا مانع أن تكون بيوت طريفة .. خالية من الإساءة ما ذكرت ..


وسأحاول أن أرجع مرة اخرى واكتب بعض الردود الجميلة ..

وشكرا .. لـــــــــمـــــاح