قصيده غزليه ولاول مرّه

[علي فلاح العضياني]

يسرني انا اضع بين ايديكم هذه القصيد المتواضعه وارجو النقد الهادف البنّاء لانّي اول مره اطرق ابواب الغزل

واليكم القصيده

منوّل حين اوطّي راسي ارقد ما عليّ هموم=وذلحين اتقلّب ما يجي نومي على سيره
تبات الناس وعيوني سهيره ما تذوق النوم=يا لين انّ السهر باسفل عيوني بان تأثيره
ما غير اسري مع الهاجوس مثل الساري المنجوم=واسوق ركاب فكري سوق من ديره ليا ديره
سبايب غروٍ ارسلّي من اسهوم العذاب سهوم=سهومٍ يوم عاين لي بعينه جتني إمغيره
ومن هاك النهار اللي لا عادت طرقته لليوم= وانا قلبي كما طيرٍ تنهّض من مواكيره
اثر بحر الهوى ما كل من طبّه يعرف يعوم=ليا هبّت هبوبه تغرق امواجه بوابيره
صويب العشق يشكي طول عمره رمحه المسموم=ومنهم من يموت بسبّته ماله سبب غيره
مثل مجنون ليلى والدّجيماء والأجل محتوم=ومثل الشمري والكل منهم سيرته سيره
وكمّ مّن عاشقٍ من لذة ايام الهناء محروم=طريق العشق يلقى فآخره لفّه وتدويره
أنا كنت احسب انّي عن طواريق الهوى معصوم=ولا ألحّن مواويله ولا أغنّي مجاريره
ولكنّ البنادم فالدهر ماله عن المقسوم=يجي له لحظةٍ يصبح بعدها فايحٍ زيره
وينظم له بيوتٍ مثل عقد اللولو المنظوم=ليا عبّر ضميره بالمثايل زان تعبيره
وانا لو صحت بأعلى الصوت كلّه مالحقني لوم=عسى من لامني يخطي طريق الخير والخيره

التوقيع

(( رأس الحكمه مخافة الله ))