فـــــيصل السواط × { سلطان الجذع } ..... بدون ردود

[الجـذع]

ســـلطان :

مرحبا واثني الترحيب في موقـع عتيبـه=من هجوس مدها كافي ووافي من وفاهـا
لي صحيب كل يوم اقول ليت الله يجيبـه=وجابه الله حظ (نفس)جيته ((غايه مناها ))

فــــيصل :

البقا ياراعي الترحيب والكـف الخضيبـه=هات ماعندك وخل السالفه تزحف وراهـا
جابه الله وانت ماتدري وش اللي وسط جيبه=وكل نفس ٍ يالجذع ما تبحث الا عن دواهـا

ســـلطان :

يوم لديت النظـر لسهيـل لاتنسـى رقيبـه=للرفاقه حق فوقك وانت لـك حـق علاهـا
سرت درب وباقي لك درب أبه حث النجيبه=خلها حجه وحاجـه ليـن تاصـل منتهاهـا

فــــيصل :

ياولد ماكل ليلٍ فالليالي ينسري بـه=والرفاقه بعضها ما ودّنا نبحث خفاها
والمشاوير البعيده والمشاوير القريبه=حاسبين حسابها والناقصه تبت يداها

ســـلطان :

علموا فيصل بعلمي كان مره مادريبـه=مير ماينلام حول غبـه ماابعـد مداهـا
كاننك ماطعت شوري تاتحول في مصيبه=سيره امجادك تشيل مع الزمن بذره فناها

فــــيصل :

هيه ياسلطان انيشنها على حبّـة زبيبـه=بندقي ماهي مثل بندقك ثارت في خباها
والله ان الوقت ماهو شي والدنيا غريبه=انته امن انته عشان تعكّر امجادي وماها

ســـلطان :

المصيبه ناصبن لك فالجبل ميه ضريبـه=وانت جيت بطلقه وحده وثارت مع سماها
شب نارك دون دارك للطليب اقبل طليبه=تدري انه من تراخا عن لزومه ماحماهـا

فــــيصل :

لاتحاول تنقض الحجه رضا ولا غصيبـه=راعي النيشان في ثنتين يرمي في حداها
مرحبا لن جاني الطيّب يبا يبشر بطيبـه=واعرف ان اللي يدوّر له على حاجه لقاها

ســـلطان :

راعي المال الزهيد مع العرب وش يشتري يبه=والسلع في داخل الاسواق يشكى من غلاهـا
تاتروح مااحتماها سيفك اللـي تعتـزي يبـه=رد هذا العلم عني عقـب مـادارت رحاهـا

فــــيصل :

يشتري به طوبةٍ تاقف على قبـرك نصيبـه=وانت وش دراك عن فقر الرجال وعن ثراها
كان عينك ماتشوف الدرب واحوالك عجيبـه=ماني بمسؤول عن عينك وعن شـيٍ عماهـا

ســـلطان :

كلمـه الرجـال يافيصـل تبيـن لـي حضيـبـه=وانت دون الهقوه اللي نحسب انـك مـن وراهـا
صاحبك يوم الله اعطى ...وش نصيبك مع نصيبه؟؟=خـل عنـك الكلمـه اللـي وجههـا كنـه قفاهـا

فــــيصل :

كلمة الرجال تثبـت فالمواقيـف الرهيبـه=وانت خلك والله اني عارف البير وغطاها
صاحبي مثلك خذاه الموت وجروحه عطيبه=طعنة الحربه يباهـا والمشاكـل مايباهـا