قصيده رثاء في الشيخ/ ناصر الشغار رحمه الله

[فيحان بن فياح]

بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين
أدارة ومشرفين وأعضاء منتديات قبيلة عتيبة الهيلا ... الكرام
السلام عليكم ورحمة الله وبركاته وبعد،،،

أنه لشرف لي أن أكون أحد أعضاء هذا الصرح الشامخ بين أبناء عمومتي وأولى مصافحتي لكم بنقل هذه القصيدة:

(قصيدة رثاء)
قالها الشيخ/فيحان بن هاجد بن حمدي العضياني حفظة الله

في الشيخ/ناصر بن متعب الشغار رحمه الله واسكنه فسيح جناته

لا والله ألا مات راع الشكالات = شيخ عظيـم مـن قبائـل عتيبـه
رجل برز وقت الليالي الشديدات = دواء الكبود اليابسات العطيبـه
ياكثر ماأعتق له أرقاب صعيبات = بالجاه والحكمـة وراي يصيبـه
وياما سعى بالصلح بين الجماعات = وادرك مطاليبه وفك النشيبـه
وله وقفة للي يبي منه وقفات = تشهد بها نـاس بعيـد وقريبـه
واللي نصاه ويشتكي من معوقات = يشرح ظروفه في وقوت صعيبه
شكله غريب ولاهو من القرابات = ولاهوب معروف ويشمت نصيبه
يقول أبالي منك ثنتين خلفـات = أبـا أحتلبهـا للأبـو والحبيبـه
ومع الطلب مطالبه كلها جات = ولاهي علاكم ياأبو متعب غريبـه
وغيره عطايا عليها أوكاد واثبات = ولافيه شك في عطاكم وريبـه
يالله عساها فالموازين حسنات = ينجوبها مـن يـوم حـر لهيبـه
فقيدة ينعى بجـزلات الأبيـات = نقولهـا فاللـي يفـك الطليبـه
أنا أشهد أنه غاب عال المقامات = ناصر ابن متعب اله ألف هيبـه
وان مات ناصر صار طاريه مامات = رجل تسلل من رجال مهيبـه
يقضون لازمهم الياجات صولات = وعند الملاقا والشدايـد حريبـه
وعقبه رجال ينطحون المهمات = ساروا على دربه بشـده وطيبـه
موته مسجل فالصحف والإذاعات = كلا قراءه وكل شخص دريبـه
ليت المنيه وقفة عنه حـزات = ولا سمعنـا بالخبـر والمصيبـه
لكن حكم الله موقت بساعات = حتـى لوانـه فـي مآمـن يجيبـه
ويالله يامنشي المزون الرويات = تمطر على قبره وتروي شعيبـه
وجعل مقره في نعيم وجنات = في جنة الفـردوس يأخـذ نصيبـه
وصلاة ربي عد أداء الصلاوات = وعداد من دفنـو بمكـه وطيبـه
وعداد ماغابوا سلاطين وروات = على الرسول اللي بعث نهتديبـه
ووداعة الخلاق رب السماوات = اللـي بذكـره نبتـدي وننتهيبـه