قصيده للشاعر/عابد بن عايض المقاطي

[عبد الله الحليفي]

اخواني أعضاء وزوار منتديات عتيبه الهيلا
احببت أن أطلعكم على هذه القصيدة الرائعه للشاعر/عابد بن عايض المقاطي وهي مهداه للشاعر/ عبدالله بن لاحق المقاطي
أمل ان تحوز على رضاكم

يا راكب اللـي تـو طلـع وكالـه=ماعـد عـداده مصفـر بالأصفـار
اليا أشتغل صوته يشابـه لأصالـه=ولا عبادي يـوم يعـزف بالأوتـار
وليـا مشـى نـوٍ تـرازم خيالـه=وليا وقف كنه كما الضلع سنجـار
علاه من لون البحر مـن جمالـه=صنع اليهود اللي تكيف مـن البـار
مراتبـه فوقـه كراسـي جـلالـه=واللي تباه يصير عنـدك بـالأزرار
شكل أنسيابي لا برك مـع جمالـه=يهدر هديـر وحنتـه حنـت حـوار
كنه ولـد شيـخٍ معـرب خوالـه=متراكي شداده علـى شبـة النـار
لاقبل عـلاك تقـول ياحـي فالـه=مثل السحاب اللي يبشـر بالأمطـار
يسري لصاحب لين ياصـل حلالـه=ويعلمه عـن ماجرالـي وماصـار
يقولـه صاحبـك طويـة حبـالـه=هذي تصاريـف الليالـي والأقـدار
واقلبي اللـي قسـم الهـم حالـه=كنه ضحيـة عيـد بيديـن جـزار
راحت عليـه الأرض كبـر البيالـه=ماعاد لي فالوقت مـارد ومصـدار
اشكي هنوفٍ روحـة بـي جهالـه=اخفيتها بالصـدر واليـوم محتـار
دارة على حالـي سـوات المحالـه=لين أن جفت تحتهـا كـل الأبيـار
غاب القمـر فيهـا وبيـن هلالـه=وتبدلة بي دار وأصبحـت فـي دار
تكفى يابو نـوره عريـب السلالـه=سلايلٍ حازت على الطيـب والكـار
يالصاحب اللي عني الحمـل شالـه=ماهمته لن جاتـه صغـار وكبـار
يحرص لكسب الطيبه مـن حلالـه=ولا الرخيصه مالها عنـده أسعـار
حرٍ ورث من راس ابـوه الشكالـه=ومن راس خاله مقسمه بين الأحرار
في مجلسه تلقـاه مركـي دلالـه=دلال رسـلانٍ بهـا بـن وبـهـار
وصينيـةٍ مرخـي عليهـا ريالـه=معزب الطرقـي ولضيـف والجـار
المعرفـه والمرجلـه راس مالـه=يدمح خطا ربعه ليا صـار ماصـار
يالله عسى درب البناخـي سهالـه=طالبك يامنقـذ نبيـك مـن الغـار

وسلامتكم