البــــارحه ليلي قضيته على الكوع//سعد الرويس

[هلال الدوادمي]

البارحه ليلي قضيته على الكوع=لين اذن المذن وقوم صلاته
كني يتيم من عنا الوقت مليوع=واليه والي وجاير في ولاته
يمسي على هم ويصبح على جوع=حافي قدم والثوب بالٍ بلاته
باسباب غرو لاعني بالهوى لوع=يحمل تواصيف الضبا في صفاته
شبيه خشف الريم زامي ومدلوع=حذر على نفسه بكثر التفاته
في وسط قلبي له بساتين وزروع=يبذر ويزرع ثم يحصد غلاته
قاعدت اطالع ساعتي منه مفزوع=وراه يبطي جعل عمري فداته
اناظر الهاتف اذا دق وافوع=شفق على صوته وهمس كلماته
الوقت يسرقني وانا عنه مردوع=والحظ عيا لا يقرب خطاته
حلفت يبقى الحب سامي ومربوع=حتى يفيق صويحبي من سباته
هذا قوانين الهوى شرع مشروع=كلن على حظه يحقق مناته
احدٍ على خله سقيم وموجوع=واحد مع خله سعيد بحياته

الـشاعر:سعد بـن منـاحي الرويس