سالفه عن الصداقه في الزمن الماضي

[الــوآفــي]

الصداقه


لها قوانيين ترتكز عليها اما في الوقت الحالي يدعون الصداقه ولا يعرفونها وقد يترك الصديق صديقه او من يسميه صديقه من اجل شئ تافه


وقديما كانت الصداقه اقرب من الاخوه وهذه القصه تمثل كيف كانت الصداقه الحقيقيه

وكانت بين ثلاثة اشخاص اللي هم راشد بن محمد بن مشعان بن فزيع من الجعفر من شمّر وفهد الحمد الغسلان ومحمد الخميس العتيبي وكلهم من سكان بقعاء


كانت تجمعهم صداقه عجيبه وقدر الله انهم يتفرقون هذا فهد قعد ببقعاء راشد راح للعراق ومحمد الخميس راح جهة الخرج وراشد المحمد اللي خلاه يروح للعراق دفتر الدين رجال طيب ولا يقعد معه شي ويتدين عشان يمشي اموره راح راشد وجلس حول ثمان سنين او عشر وما الله وفقه يقول اضربها يمين تروح يسار ولا قدر يجمع شي عشان يرسله لاهله لامه ولخوانه ويقول هاك الوقت ان اهل الديار الشماليه اللي يجي من نجد ما يعطونه وجه بحكم انهم اغنياء واللي يجي من نجد هلكانين حتى نعولهم متقطعه من الفقر

ويقول خليفه بن مبارك راعي الرس عن هاك الوقت :

شابت لحانا ما لحقنا هوانا = عزي لمن شابت لحاهم على ماش
وغداننا جاعوا ودجت نسانا = نقبل ونقفي يا فتى الجود ببلاش
فقر القرايا في نعاله وطانا = يا عاد مامن عيشتن كيف نعتاش
نبي نحودر كان ربي هدانا = والا نطوش بمصر من عرض من طاش

نرجع لسالفتنا

وفهد الحمد الغسلان كان يزاور ام راشد بحكم صداقته مع راشد ويوم عطوه فنجال القهوه الا الصياح في البيت قالوا هذي ام راشد تذكرت ولدها لانه غايب له ثمان سنين وهي تقوم تبكي وفهد ينزل الفنجال ويقوم قالو له تقهو قال :

قالوا تقهوى قلت ماني ولا اياه = البيت ماله قبلتن عقب راعيه
لاما تداليت الفناجيل واياه = ما دلهن عن شوف وجهه عزاويه
لوهم كرام وياصلون البعيداه = القلب ما ينصب على غير راعيه
وش هقوتك يا مدلّه القلب يا ناه = بموجهه لقى المرابي علابيه
هو يطري التيّه حرين تحراه = او موقعه ما جاء المنجم حواليه
ياما قعدنا يوم الايام عدلاه = يوم الخزز يرعى الخزاما بدانيه
نركز ولا صدنا الجراده شويناه = ومن كايد الدنيا على طول تثنيه
واليوم مدري وين الايام تقداه = لاعاد هو وده بشوفي وانا ابيه
يالله لا تقطع شفي بلاماه = انت الذي تقدر ترده وتثنيه
ريف الضيوف اليا تناخوا حوالاه = وين الكريم اللي بعاد معاشيه
يحط ماجوب النشاما مع الشاه = ولا عادتن بمعطر الجوع يغديه
وحياة من كل الخلايق ترجاه = يعطي ولا يبخل على من يراجيه
لو اني اقدر لودع الجدي لي جاه = من فوق ما يدني بعيد المهاميه
ازرق وقضاب الدركسون يجداه = تسمع مع الشكمان صوتن وتدويه
وابا آصله لوهو ورى اقصاه وادناه = واخبره علم الحنين وعناويه
عن فاطرن له تشعب الصوت بعواه = تقنب قنيب وباقي الصوت تخفيه
اما يجي والا على ما هقيناه = الروض ريف والخلا من تواليه

وراشد يوم كمل ثمان سنين راح لمعازيبه اللي يشتغل عندهم عيال سعود ابو خشم بالعراق وما لقاهم يبي يقولهم انه يبا المرجاع لاهله ويتقهوى عند خادمهم وينشده وين الشيوخ قال الشيوخ غايبين ما يجون قال وش تبي قال انا ابا احتريهم قال الخادم انت تقهويت اطلع اطلع مهيب طلابه هي قال انا ضيف على سلوم وقوانين الرياجيل الاولين قال الخادم قوانين الاولين راحت معهم يقولون وهو يدفه عند الباب ويدربيه ليا راشد في مصيبته ما كسب شي وفوقه ثمان اسنين ما شاف اهله وامه ما يدري وش اخبارها والرجال فوق هذا توجد على صديقه فهد الغسلان وقال وهو طايحن عند عتبة الباب بعد ما دفه الخادم قال :

حبر الشفا من عض الانجاد يا معين = من شان دكاتن عسى الله يهينه
الله من قلبن غدا الفين والفين = غدا شتات وبيح الله كنينه
قلب العنا زادت عليه الشواطين = ما مرتن يطرب تجيه السكينه
ان جاه ليلن صرّف الليل ليلين = وان جا نهارن زاد همه غبينه
من الهجس والهاجوس وامراض توذين = يبرم كما تبرم سلوك المكينه
ولا ضاق ما بالصدر جيت الدياوين = ابا الواناسه والوناسه ضنينه
اجلس مع المجلس ولاحدن يحاكين = ودي سلام وسلمتي كارهينه
لا دينهم ديني ولا الدين من دين = دورت من جنسي ولا شوف عينه
وين الصديق اللي يودن يشاكين = يكشف على ما بالضلوع الدفينه
مثل فهد ينظر بحالي ويبرين = يبري هواجيسن بقلبي كنينه
يابو حمد ويلاه وينك وانا وين = بيني وبينك ما يبيد السمينه
ويلاه يا ربعن ربوعه بعيدين = يصبر على الكايد ونفسه مهينه
وجدي على هاك البلادين وجدين = وجد الخلوج اللي يهجرس حنينه
عفت البلاد وعفت ناسن قريبين = خليت جرد الدو بيني وبينه
ماهو طلب فرقا الاهل والمحبين = لكن تدبير الولي قابلينه
حدن على ترك الاهل دفتر الدين = عزي لمن مثله حلاله رهينه
دنياك ياما به من الزين والشين = حسربنا كثر اصطفاق اللعينه
ان ورتك وجهه فنعمك ونعمين = تربيك ترباة الهنوف لجنينه
وان عاضبت توريك صد وتماحين = وعدو عينك تسهجه تحت عينه
يالله طلبتك خير دنياك والدين = حيث بيدك تدبير زينه وشينه
يامن نصب حكمه بعدل الموازين = مغرق هل الجمه ومنجي السفينه
ادعوك باسماك الحسينه وياسين = وايات لو تاتي الرواسي تلينه
اللي رزق داب عمى ما يخلين = ادعوه يلطف بي وينظر بعينه

ومحمد الخميس العتيبي كان شمال الخرج وكان يرسل قصيد اللي يرحمه لفهد الغسلان ويذكر ضيقة صدره ويذكر فهد بالكرم ويذكر ديرته بقعا يقول في قصيدة رائعه:

يا راكبن حرن يبوج الوطى بوج = يقطع رهاريه الوطى بالدلاجي
حرن سخيف الفخذ والصدر مفجوج = والبطن منظمرن به الحبل ساجي
حرن قعود ويطوي الدو بالروج = ما كنه الا طيرتن مع زراجي
يشدى لفرخ من ورى الصيد مزعوج = فرخن صغير ومقتفيه العجاجي
يا راكبه لا تقطع الدو بالدوج = اودع مغيب الشمس فوق الحجاجي
سقه لما تلفي مقاصير وابروج = ونخيلهم مثل الطهى بالهباجي
ليا جيت ريحة بنهم تنطحك فوج = تقعد عماسك والخوا يوم فاجي
انشد عن اللي بابه الصبح مهجوج = والليل لا هجه يشب السراجي
ابو حمد تلقى سواليف واهروج = وصنيتن به من عصيب النعاجي
وادلال بغدادن على جال صهروج = تلقى هشيم النار مثل الكراجي
ان نشّدك عني طوى قلبي الموج = هذاك علميبه مرق يوم ماجي
واظن لو ينكس علي صار مرجوج = ياشين عقب الرزن عقل الرواجي
مار اتمنى والتماني من العوج = مثل الضعيف بوسط سوق الحراجي

هذا من الوفاء للأصدقاء وتذكرهم والسؤال عنهم


مار اليوم الله يرحم الحال بس


حتى الرحم قطعوه مهوب الصديق


اتمنى ان تنال القصه على اعجابكم يالنشاما


اخوكم

التوقيع

ليا جاء طاري الهيــــــلا يفز القلب فزة شوق ألبوم صور مدونه مميزه