مدح في قبيلة عتيبه

[الجمش فوق الرمش]

الشاعر/محماس بن شميسان العتيبي
من غير نقص بحق باق القبايل :: يا سعد من ربعه قبيلة عتيبه : مدح في قبيلة عتيبة

من غير نقص بحق بـاق القبايـل=يا سعد من ربعـه قبيلـة عتيبـه
أهل الصخا والجود وأهل الجمايـل=وأهل المواقف فالظروف العصيبـه
قوم لهـم روس المعالـي ذلايـل=بأيمانهم تنسـاق سـوق النجيبـه
ذباحة الحايـل عمـى كـل عايـل=من وصفهم فيهم سماحـه وهيبـه
تاريخهم يروي عطـاش المثايـل=ماضي وحاضـر فعلهـم ينحكيبـه
لو نستمد مـن السنيـن الأوايـل=شي موثق مـا دخـل فيـه ريبـه
نأخذ من الواقـع خيـار الدلايـل=المعجم اللي قسمهم مـن غريبـه
يوم المراجـل بالهمـم والصمايـل=حضارهم يكفـون مـن فالمغيبـه
مضالهم صولات فـوق الأصايـل=يوم المصيبـه تنتهـي بالمصيبـه
ليا ولعوا للحـرب روس الفتايـل=هداتهم في مـن حربهـم غضيبـه
مركاضهم يرم العشـاء للمخايـل=وسهومهـم دم العـدا ترتويـبـه
وإن عصبوا للروس دون الجلايـل=يا ويل من عوب الظنـون تهويبـه
سطواتهم تقعد صغـى كـل مايـل=إما رضي تمضي عليـه الغصيبـه
كم جمع سلطـانٍ عليهـم تهايـل=جمـعٍ مـدورة الطمـع تلتجيبـه
أقبـل وقفـى بالهزيمـه شلايـل=عقب الطمع منهـم قنـع بالغليبـه
ويوم إن جيش الترك صايل وجايل=خاضـو طوابيـره كتيبـه كتيبـه
وجايلمن فعلهم شاف النظام الهوايل=وعدّل عن أهدافٍ براسه غصيبـه
وغيره وغيـره منجـزات جزايـل=كـم ميسـمٍ جابـه عـدوٍ كويبـه
واللي بعد حاول بشتـى الوسايـل=كم ساق دقلات الجمـوع المهيبـه
خمسين من زيزوم بـرزان حايـل=ما رجحت ميزان منغـص حريبـه
منهم حدت دهم الجمـوع الفعايـل=مـا طمنـوا هاماتهـم للضريبـه
ياما ويامـا بـردوا مـن غلايـل=وكم طوعوا بالفعل روس صعيبـه
في نجد تشهد مقفـرات الخمايـل=وتشهد لهم هوجه ويشهـد جذيبـه
مروين عطشان القنـى والسلايـل=يـومٍ كـل مـا فعـل ينجزيـبـه
وان قربت شهب السنين الحفايـل=تندى يديهـم والجوانـب خصيبـه
يبدون للعانـي حجـا كـل طايـل=رجالهـم مـا يدخـر مـا بحيبـه
ودخيلهـم هـمٍ يعانـيـه زايــل=أدنـى عتيبـي فالكـرب يعتزيبـه
مزبان من ضاقت عليـه الوسايـل=بالعز صـرح امجادهـم يعتليبـه
لو إن سهره من عنا الوقت طايـل=اليـا زبنهـم مرقـده يهتنيـبـه
عن الخوي فزعاتهـم مـا تمايـل=وحق القصيـر سلومهـم تعتنيبـه
عتبان فيهـم وافيـات الخصايـل=ميزاتهم في كـل منهـج عريبـه
عنهم كتبت مـن الكثيـر القلايـل=في ما مضى يا أهل القلوب اللبيبه
قبل يلـم الشمـل يبـس البلايـل=عبد العزيز اللي عسـى الله يثيبـه
جاها وسكـان الجزيـره سحايـل=جازف عليها وأصبحت من نصيبـه
وحنا على البيعه وننفـى البدايـل=مـن طبعنـا وال أمرنـا نقتديبـه
واليـوم نوفـي حقنـا والمكايـل=وطيـبٍ بدينابـه نبـي ننتهيـبـه
ماضي وحاضـر حقنـا فالزلايـل=ما صار في منهاجنـا مـا يعيبـه
عتبـان رمـزٍ للكـرم والجزايـل=والعرف والعفه والأرياء الصليبـه
فالمدن ما أحرف مجتمعهم دخايـل=مجالـس تلفـى وجلسـات أديبـه
والضيف للترحيـب والقـدر نايـل=غير المناسـف والـدلال الربيبـه
وإن سبّلت بالوبـل غـر المخايـل=أبواشهم ترعى القفـور العشيبـه
يرعون قطعـان تغيـض الغلايـل=للنصر في ماضي وحاضر قضيبـه
ويبنون لللافـي بـروس البتايـل=ومن تاه نـور عقودهـم يهتديبـه
أنوارهـم فالليـل مثـل القوايـل=تجلى خراميـس الظـلام المهيبـه
في وصفهم لو قلت ما نيب عايـل=عشـاق عـز وللتوافـه حريبـه
مثل العدود ليـا أغـورن الثمايـل=تزود مـع مـر السنيـن التعيبـه
قـولٍ يعرفونـه عيـال الحمايـل=ومن قال قول الزور ربـه حسيبـه
والناس كـل ٍلـه سلـوم وفعايـل=وكلٍ عـن الثانـي مكفّيـه طيبـه
ومن غير نقص بحق باق القبايـل=يا سعد من ربعـه قبيلـة عتيبـه