خالد & بقيق !!!!!!!!

[ابـن نـعـيـس]

روّعوك متابعة كل شيطان ٍ مريد ... يا بقيق ..ويكرم الدِّين عن مقصودها

خالد محمد العتيبي

يا عروس البيد والصدر ليل السبت بـِيد=مَير ما بيّن قمَرها وذعذع نودها
هال رمله كل عرقوب واستضما الجريد=والحمام السدره الدوف كبّ فنودها
رسمك اللي لوحه الجفن به شي ٍ جديد=أنكرتـه الروح وانتي محل وجودها
وكنّ صوت انذارك العصر يا جلّ الرصيد=نوح من تلطم نحَرها على مفقودها
روّعوك متابعة كل شيطان ٍ مريد=يا بقيق ..ويكرم الدِّين عن مقصودها
ما لهم رشدٍ من الله ولا معهم رشيد=شرذمه وأعدا عِدا الدِّين صار يقودها
يا هل التلحيد والكيد وارباع العبيد=حرمة المسلم عن البيت وين عهودها
أبشروا بالحرب والضرب والكرب الشديد=فوق الارض وساعة العَرض عقب لحودها
من مضى من جندنا في سبيل الله شهيد=وانتم الـه النار تسعر ومن وُقودها
يا هَدَب عيني ونـُوني ويا دَمّ الوريد=يا سجلّ أحباب روحي وكنز سدودها
هملجي بالجفن للمزن والعمر المديد=واحمدي من له دعا الناس ولـه سجودها
في لحانا عن عدانا وعن مكر الضديد=لـ اشتكت روس البنادق لضا بارودها
دونك اورود المزرّج ومصقول الحديد=والنفوس أغلى مانملكـه فيك نجودها
في ذرى من شوفته عيد ومقابلـه عيد=مقدم آل سعود والدار منـه سعودها
خادم البيتين والدِّين وخـزام العنيد=ملتجى شعب الجزيره وستـر حدودها
ساسها بالشرع والسيف والراي السديد=ما تدرّا بـِيض الاحداث والاّ سودها
ثابتٍ مثل الديانه وفي جنبه عضيد=درعنا ليث المعارك وضيم فهودها
سيدي سلطان والمدح وجزال القصيد=نبتديها من مقامه وفيه نعودها
وابشري بالعز والنصر والمجد المشيد=يا بلادٍ من علـَمها قديح زنودها
والله انّ ارضك عليهم لحُود وشدّ قيد=ما بقى منـّا رضيع ٍ تهبّه نـُودها

التوقيع