قصائد رثائيه كتبتها حصه بنت غلاب في ابنها( بندر بن سرور)

[@ الذيب @]

السلام عليكم ورحمة الله وبركاته
اخواني اعضاء منتدى الهيلا هاذا هو اول مواضيعي في المنتدى وانشالله انه يحوز على اعجابكم ولو اني مادري هل سبق وان سبقني احد على هاذي القصايد
ولاكن اعتبروها اجتهاد مني .

هذه مجموعه من القصائد الرثائيه التي كتبتها
حصه في ابنها بندر بن سرور وهو غني عن التعريف طبعا .

( برهج ضماياه )

عديت عصر ودرج الحجر بملاه
والقلب عيا يستمع في مشيره
ياونتي يابدر قلب اه ثم اه ...
على ثمر قلب غــــدابه دبيره
وجدي على من راح يابدر وجداه
وجد الطريح اللي عظامه كسيره
خلوه ربعه في نهار المثاراه
رموه عنهم في نحور المغيـره
جاين لدمع العين يابدر مسقاه
يزي القطيع اللي صفت عنه بيره
لو ينشربالمال برهج ضماياه
صدر بعد معطان قاض صديره
عيني تهل الدمع من بعد فرقاه
مثلي جداه الدمع يالله خيره
واجز قلبي جز غرب بعرقاه
من عيلم عوهن هماج مريره
علق سريحه فوق زرقا معفاه
هزع الوروك امتونها مستديره


~~~~~~~~~~~~~~~~~~~~~~~~~~~~~~~


(ياخذبي الهاجس )

لولاي اعدي الظهر روس المنيفات
خطر شديد الحزن يقضي عليه
ياونة ونيتها عشر ونات ..
يون مثلي من غدى له شفيه
يابدر ليته حي يرزق ولا مـــــات
لو هوى ورى شط البحر ماعليه
في الليل كني في البحور الغزيرات
ياخذبي الهاجس على مشهــويه
ياخذ بقلبي لاهف الحر دورات
ويومي بحالي لين يبست عصيه
يابدر في قلبي طعون مجيحات
وجرح على الغالي طعونه خفيه

~~~~~~~~~~~~~~~~~~~~~~~~~~~~~~~

( جو غابه )

ياونه ونيتها في عيد الاحباب
يوم كلن راح يعايد احبـابه
قعدت مجبوره على غير ماطاب
ماكن لي ماجود حي قرابه
يالله يامطلق حكيمات الانشاب
يامدخل من لاجبه والتجابه
ابرج لقلب كن في اقصاه جذاب
غاد شبوبه نار ماحد درابه
حزنه عميق ماتداويه الاطباب
كل طب يذكر له يزيد التهابه
عيا يطيب مع الزمن جرح الاسباب
ولا هقوتي ذا الجرح يبري صوابه
في الليل دمع العين يالقرم صباب
وضوء النهار عن السفر جو غابه
لولاي اعدي يابجد راس مرقاب
واقنب قنيب مجوعات الذيابه
وانوح نوح اللي على الغصن لعاب
واجور جور اللي عطيب صوابه
تقول يشلع ثومة القلب مخلاب
وفي وسط جوفي خلب طير هوابه

~~~~~~~~~~~~~~~~~~~~~~~~~~~~~~~


(إقراع شنه )

يابدر كمي الحزن بيح كنيني
من كثر ماكما بيح السد كله
سرى علي ابليس واثره لعيني
طرا على قلب العنا ولعة له
جدواي من بندر اجر الونيني
اكامد العبره بوحـــه وونه
ماانساه لوطالت علي السنيني
كود ان نجم سهيل يخلف محله
واقلبي اللي طار عنه اليقيني
في وسط جوفي يقرع اقراع شنه
شن اليا حرك غدا له دنيني
لو بل في جزر البحر مايبله
ياونه ونيــــتها من كنيني
ونه كسير يسهر الليل كله
يجظ تالي الليل كسر الشنيني
فصين من عظم الظهر ضايعله
دور السنه فوق المخده حزيني
لاله صديق ولا عظام تقله

~~~~~~~~~~~~~~~~~~~~~~~~~~~~~~~

وسلامتكم
هاذا اللي قدرت اجمعه لكم ونشالله بحوال قدر المستطاع اني اكملكم باقي قصايدها

تقبلو تحياتي
اخوكم الذيب