البعض من قصائد فاروق الكسر المرشدي

[اخو رفعه]

ليــت الثريــا لـيــا قــادت مخــايلــها=والبــرق قــام يتكاشف في ليــاليــها
تســق المداهيــل فاتـلاها وفاولهـــا=لين الغرانيــق تخفــق في خبــاريـها
تسقيـــك يادارٍ اهواهــا واتوق لهــا=يادارٍ احبــها واحــب اهــاليـــها
الروح معــلاقها في روس اقـــاذلها=والنفس تاقت لسجــات القدم فيها
والعين غربالهــا لاعدت اطولها=اللي تــزاما على الخدّان اعــاليها
لامن شمس العصير ارخت مهادلها=واستسلمت للغياب وذاب تاليها
لابد من دمعةٍ والعين تسبلها=لا قارنت بين حاضرها وماضيــها
وتخيلت صورة يصعب تخيلها=قدام مر السنيــن ينــوب حاليــها
هذاك يوم الصوارم في مداهلها= اللي بنجد العذي تعرف باساميها
يومن سمر البيوت يلوح مجدلها=وانوار اهلها تسارج في غداريها
للضيف والجار تشعمها وتشهلها=لين ان سار الخلا الخالي يساريها
واليوم يوم الزمن مر وتجاهلها=ماباقيٍ غير ذكراً من تواليها
ومنازلٍ كن ماحد ٍ قد تنزلها=تنسف على مامضى فيها سوافيها
شهبٍ سباريتها والريح تغزلها=واللال يلمع سرابه في نواحيها

_________________

يالعين ما اسهرتك على شان تبكين= من لوعة الحب وعذاب الفراقي
الحب ملواحك هكالحين .. واللحين= ماعاد له في وسط قلبي رواقي
مسرى الوله ومعاملات المحبين=وطرد المقافي واعتراض الطراقي
وسرق النظر ومتابع المشهد الزين=ليا انهزع فوق الثقيل الرقاقي
هذاك سلمٍ مايليق بك ياعين=ولاهوب لي ياعين شف ومذاقي
الحب سلك يخلف المستقيمين=وصرفه يضيع نايفين المهاقي
واكبر ضحاياه الرجال الشريفين=اللي سيرهم بالمدايح تساقي
ولاهوب عيب العيب ماخالف الدين=واخطا مناهج طيبين العماقي
وانا تراني ماكرهت الهوى لين=شفت الجباير ماتلايم لساقي
قلته وانا كني على ماتحلين=من لاعطا طيره وطلعه حقاقي
الحق ياعيني وش اللي تشوفين=عتق قضاي ولا انقضالي عتاقي
لو ياقفن البيض تسعه وتسعين=مااشبعك منهن جل والا دقاقي
مير اشهد اني فيك بر ليا وين=يوم اشتياقك معتليه اشتياقي
فالغي ياما ألحقتك اللي محيلين=وياما ختلت لك العياف السباقي
واليوم ليتك للمنادي توحين=حيث ان ماباقٍ من العمر باقي

_________________

عاشقين وحبنا دايم يبين=في ملامحنا ونبض اعماقنا
يختلج بارواحنا شوق وحنين=وعبرةٍ ماها يبل ارماقنا
تمشي الدنيا وحنا واقفين=عند لحظة حبنا وفراقنا
وقافينٍ فالجفاف وصابرين=لو تحن دموعنا لإغراقنا
تطوي اللحظات صفحات السنين=وترسم جروح الزمن فاوراقنا
كل ليله ندمي الجرح الدفين=وكل ليله تستغيث اشواقنا

_________________

ياعيونٍ في بياض الخد سود=ارحمي قلبي ترى قلبي رقاق
في سوادك يبحر الشوق ويعود=بين نيران التوجد والفراق
العذاب يزود واشواقي تزود=كل ماطيفك على الخفاق واق
وابتسم لي واشرقن مثل العقود=بين اشافن ريقهن حلو المذاق
وشامة زرقا على ضوح الخدود=عانقتها لهفة العاشق عناق
واشقر ٍ من فوق غضات النهود=كل مايلوي به العنق الدقاق
ايتنثر فوق ردفك يالعنود=مثل هملول السحاب ليا استراق
واقتفاه عصير دون الشمس نود=وانقلب مثل الذهب دون الزراق

_________________

في عذابي ياهوى القلب وغرامه=ماتموت النار وانتي في طرفها
مير صحي كل جرحٍ من منامه=يانعيم الروح فالحب وترفها
بادلي دمعة عيوني بابتسامه=ماعليك من الدموع ومن شرفها
دمعة العاشق على خده علامه=وين دمعة عاشق ٍ ماقد ذرفها
والسهر ليلٍ يباريني ظلامه=تعرفه غفلات عيني ويعرفها

آخر تعديل اخو رفعه يوم 08-Dec-2011 في 12:05 AM.