مصلح بن عياد يعجّز بكر الحضرمي وفيصل الرياحي

[بدر الشلوي]

يعتبر الشاعر الكبير مصلح بن عياد الشلوي هو من أدخل الشقر على الموال فالمحاوره وكان هناك محاوره عند قبيلة عتيبه على ما أعتقد عام 1412ه فيها من الشعّار مصلح بن عياد وفيصل الرياحي وبكر الحضرمي وقد حضر فيها حبيب العازمي متأخر...

وكان فيها قاف موال بين بكر الحضرمي وفيصل الرياحي واللي من خلاله ضغط بكر بقوه على فيصل الرياحي ومنها يقول بكر لفيصل:أن كبر راسك حسيله وأن صغر راسك طلي..


بعدها أتى دور أبن عياد وطلب بكر الحضرمي في قاف موال كله شقر الموال مع الوقفه والبيتين المنقوله لكن بكر عجز عن الرد عليه وقام فيصل وكمّل القاف مع أنه لم يتقن الشقر...


الشريط موجود في مكتب النجاح كاسيت برقم147

مصلح بن عياد:

يا عود ياللي تولّع نار من شبّك
أخاف تكثر دخاخينك وننشبّك
يا قصر من حط لك سورٍ ومن شبّك
يا راعي النور بالله ولّع اللمبه

يا كبر بيبانه وشبكٍ له=وأن صك بابه حنوا أقفاله

القصر له سلمٍ زينه وردعٍ له
واللي يبا يشرب العله ورد عله
كله جزاءٍ له من أصحابه وردعلّه
في روسكم علم ثاني وآلا علّمبه

الحضرمي كله نشب كله=شاف الرياحي حنّ وأقفاله

فيصل الرياحي:

الليله الملعبه بارودها يقدح
تعال معنا وكبريتك معك وأقدح
وشهودها وارده محدٍ بهم يقدح
واللي يجيب الخطا ذنبه على جنبه

يا رجل ما في علمنا خلّه=والبحر يصفق وأنت في جاله

الظاهر أنك تعرف النار والجنه
كم واحدٍ يا عميلي زاد به جنه
واللي يبا السود جاي ألهن وهن جنه
أما يجي صوبهن وآلا بهن جنبه

اللي ما يعرف مذهبه خلّه=لو كان جاء من ديرته جالي


هذا اللي أحفظه منها


وأذكر بعدها موال ناري بين بكر وأبن عياد..

وبعدها قاف مميز بين حبيب العازمي وفيصل الرياحي

يقول حبيب:
مرحبا من خاطر الشاعر اللي لو يغيب=ما نسي مقدار ربعه ولا ميعادها

قال فيصل:
رحبوا من عصر وأنته ورى ذاك الشعيب=تتبع أم الخير كنك كبير أولادها

ومنها بيت قوي لحبيب يقول:

يالرياحي يا صحيبي ما أبا غيرك صحيب=الضحى تستاقها والعشا تقتادها