الفقر ماهو عيب تدري وش العيب ؟

[رجا بن فهيد الهاجري]

السلام عليكم ورحمة الله وبركاتة

عيدكم مبارك وكل عام وانتم بخير

قصيده اتمنى ان تحوز على رضاكم

ماجيـت أدور مــال ولا مكاسـيـب=ولا مهـونـة نـفـس ولا مـذلــه
امـا نسندهـا علـى جمـة الطـيـب=ولا نحدرهـا عـلـى خـيـر مـلـه
النفس عـدت فـي طـوال المراقيـب=بالعـز كنـهـا دولـتـن مستقـلـه
اسوارهـا كـل الضلـوع المحاديـب=وابوابهـا مثـل النـجـوم المطـلـه
والحـظ ظلمـا والليالـي مشاهـيـب=والؤقت لغـزن يتعـب النـاس حلـه
وحنا تحت رحمتك يـا عالـم الغيـب=تغفـر لنـا مـن كـل هفـوه وزلـه
لـو الفقـر ضيـفٍ وحنـا معازيـب=يامرحبـا بالفـقـر دقــه وجـلـه
كرمـان لـو دارت علينـا الدواليـب=وظفـران لـو ان المزاهـب مقـلـه
الفقر ماهو عيب تـدري وش العيـب=انـك غنـي والبيـت محـدن يـدلـه
ماهـو بمدهـال اللحـا والاشانـيـب=مقفـلـن بـابـه وقـفـرن محـلـه
واللي يصر القرش في داخـل الجيـب=هو يحسبـن النعـم سهـل يحصلـه
حفـاوة الطّيـب كثـيـر التراحـيـب=مطلق عمس ضيفـه حجاجـه يفلـه
ماهو على ضيفـه قريّـب محاضيـب=الا مـداه بعيـد مـا جــاك كـلـه
واللاش ماسـر الخـوي والاصاحيـب=من طاولـه ملـه ومـن جـاه ملـه