معاناة الدين
يا لله فرج كربتي وقضي الدين=دين ٍ نشبنا في حباله نشابه
جيته وأنا محدود فوق الأمرين=مر الطلب وحساب الإجابه
واقفيت أنا شيال حمل الثقيلين=دين ٍ وهم ٍ جوف صدري جثابه
واليوم من قدام عيني طريقين =درب الوفاء ولا طريق انقلابه
والحر ما يمشي مع المسلك الشين=لو عامل الأنعام في وسط غابه
واخترت فعل الزين مع راعي الزين=رجل ٍ نصيته ما احتجب خلف بابه
لبى ندايه وأثبته بالبراهين=وله فائدة بالقصد تدخل حسابه
ويدفع ضميري عزة النفس والدين=أخاف من يوم ٍ يجي له طلابه
يخمشني الهراج ما بين فكين =واسمي على زل المجالس دعابه
والشرع عدله يقضي العين بالعين=حما الطلي من ذيب يأكل بنابه
وبالآخرة محكوم بين الخصيمين=كل ٍ يلاقي غدرته في كتابه
دم الشهيد اللي شفع للمسيئين=ما يقضي الديان يوم انسكابه
يا لله ساعدني على الدين وتعين=ما خاب من بسمك لجا ودعا به
أمرك منفذ إن صدر منك حرفين=حرفين تكفي عن بليغ الخطابه
لا تحدني على حسن أو على حسين=لو كان صاحب أو عزيز القرابه
ديني ألوف وما تجاوز ثلاثين=قلبي رجف له وأختلف عن صوابه
قالوا تخاف وما بلغ لك ملايين=ولا أنته كبير السن وقفا شبابه
أعذار ساقتها عليّ الشياطين=كذب ٍ على المحتاج يخدع سرابه
الدين ذل في وجيه المدينين=وهم ٍ ولج بالقلب حره كوابه
يا ثقل حمل الدين عند الفطينين=اللي تخاف الله وتحذر عذابه
الصقر يعجز يحمله بالجناحين=وصلب الحديد يذوب منه ذوابه
وعند الحرامي أكلته أكلت التين=وأخف حمله من جناح الذبابه
يا لله غيثك يا كريم الكريميين=خل الفرج يبيرق ويمطر سحابه
الشاعر / محمد بن فلحان الهوراني المقاطي
« آخـــر الـــمـــشـــاركــــات »
27-Oct-2005, 08:07 AM
معاناة الدين ............
العرض الشجري