والله إني...

[طارق الثعلي]

السلام عليكم ورحمة الله... وكل عام وأنتم بخير أبيات أتمنى أن تحوز على شئ
من استحسانكم:

والله إني من هلال إليا هلال=ودي التوبه وكم لي قد نويت
ملت إذني من صدى نفس السؤال=من صروح الأجر بالله وش بنيت
مشغلٍ نفسي ورا روح وتعال=لو بدقق في حياتي مالقيت
للعذر في مامضى أيت مجال= كم كتبت وكم قريت وكم محيت
غرني طيشي وأنا أرخيت الحبال=كنت أجامل بالمعاصي ما استحيت
ماهو جهلٍ بالحرام وبالحلال=مير اصدد عنه كني ما دريت
ما دريت إني على جرفٍ هيال=يوم بكره أو قفيه وانتهيت
عمري اللي من شروق إليا زوال=يوم أفكر فيه مدري وش جنيت
ياإله العرش ربي ذا الجلال= معترف بالذنب لكن ما نسيت
إن باب العفو باقي لا يزال=وإنك اللي تقبل التوبه وجيت

وسلامتكم