الفكر سارح

[إبراهيم الجذع]

الفكر سارح والدواليب دايره=قام القلم وأرعف على الصحف سايله
الله من قلبٍ به هموم جايره=لو شالها غيره فلاهوب شايله
ماتتركه ساعه تلوعه ضمايره=كما يلوع الحر شبكت حبايله
العمر يمضي والمقادير صايره=ودنياك لو تصفي فلابد مايله
لاباس ياقلبٍ تواقد سعايره=دام الأمل متجودٍ في حبايله
ياقلب شيل الهم والوقت سايره=الصبر معروف الفرج من حصايله
سمي بمفتاح الفرج في عسايره=والوقت والأيام تثبت دلايله
والخير بالشده ليا جتك غايره=تجاربٍ لك بالزمان وهوايله
تعرف بها اللي مايحسب خسايره=لو ما هقيت بماقفه في صمايله
وتعرف خويٍ خيب الظن غايره=يومٍ بدا ماجوبه أبدا فشايله
صحبت ردي العرف والأصل بايره=لاطالت الطرقه تبين خمايله
وألا وسيع العرف بنا عمايره=بالمرجله والطيب يمناه طايله
ذا قول هجسٍ به دواليب دايره=ياقلب ياللي قلت أمانيك مايله
أرج اللذي يعلم بخاف السرايره=الواحد اللي ما تعدد فضايله