ماكسرة الخاطر مثل كسرة الساق // الساق يجبر والخواطر عليله

[راعي الشوشلية]

فالصدر ضيقه مابعد مثلها ضاق=يالله عسا يارب ماهي طويله
سحابة سودا بلا ضوح براق=يوم امطرت بالمزن صارت ثقيله
كثر الشقا اللي نزعته يبست ارياق= ماعمرها شافت عيوني مثيله
ماكسرة الخاطر مثل كسرة الساق=الساق يجبر والخواطر عليله
يالليل مدري وش حجب شمس الاشراق=ياخوفي انكان اصبح العمر ليله
ودنياك شجرة تنبت غصون الاوراق=يطلع بها التفاح والحنظليله
ويوم االليالي خير وتمد الارزاق=ماعطتني الا باليدين البخيله
ومن كثر مافي خاطري حزن وارهاق=محتاج ابحكي بس من ينحكيله
الناس باعت من شيمها والأخلاق=تلقا الوفا بقلوب ناسن قليله
الصبر لو ماعد به صبر ينطاق=لحد ماربي يسهل وسيله
يالله ياداري بمكنون الاعماق=انا دخيلك يامنجي دخيله
عن كلمتن يفرحبها كل مشتاق=يبني عليها قصتن مستحيله
الياس جنه والرجا حبله دقاق=مايروي الضامي ويبرد غليله
حلفت لو الطيب يجلب بالاسواق=لروح ادور لردي واشتريله

قصيدة الشاعر : محمد بن الحميدي بن حديد العضياني