حبيب العازمي (الشبح) و سعود الزعبي في الخفجي

[ابوحمـد]

السلام عليكم ورحمة الله وبركاته



واسعد الله جيع اوقاتكم



اقدم لكم:
محاورة بين الشاعرين حبيّب العازمي والشاعر سعود الزعبي ،
وهي جرت بينهما في مدينة الخفجي في تاريخ 18/11/1417 هـ .


حبيب العازمي




بعد جينا وشاركنا هل الأفراح
ياسلامي على الخفجي وأهاليها
واسرْ ياليل والباقي كثر ماراح
رحلةٍ يكمـل أولهـا وتاليهـا




سعود الزعبي



مرحبا عد برقٍ في مزونه لاح
درّج الرجل وانظر في مواطيها
السوالف لطيفة والقدر مافـاح
كم بيوت القصيـدة يامغنيهـا




حبيب العازمي



ودنا كل مـا زاد التعـب نرتـاح
مار دعوىً عسـى ربـي يسويهـا
وأنت جعلك بصحة والقلوب اصحاح
والقصـيـدة تقيمّـهـا معانيـهـا





سعود الزعبي



لو يقابلك عنتر في نهار صياح
تطلع الخنجـرة وألاّ تخفّيهـا
ياحبيّب لقانا القفـل والمفتـاح
مار ودّْ السوالـف يامودّيهـا




حبيب العازمي



أطعنه وأجرحه بالمخلب الجـرّاح
وأنت هاذي على غيري تمشّيهـا
شدّْ نصّْ العصا يالراعي المصلاح
قالوا اللّـي يسرّحهـا يضوّيهـا




سعود الزعبي



ياحبيّب عليكم هبّت الأرياح
والصبيّة تبعّد لا تحاكيهـا
اترك المشكلة للدّكْتَرْ الجرّاح
روح ياعمها مدري بناخيها




حبيب العازمي



الصبيّة تغازل والهوى فضـاّح
وأتركّـد وأضحكهـا وأبكّيهـا
يمكن التيّن فالخفجي يجي تفاح !
دبرة الله وأنا وش حيلتي فيها؟




سعود الزعبي



يوم شفتك (تزحلف) كنّـك التمسـاح
ماهقيـت إنّـك بشكلـك ترضّيهـا
لو حصل ماحصل سعر الذهب ماطاح
وَأَهَـلْ العـرف ماتهـدم مبانيـهـا




حبيب العازمي



لو تشاهد عيونك لوح قالت لاح!
خلّت القرن عقدة بيـن أذانيهـا
ياسعود المكاسب كنها الأربـاح
كل رميـة علاقتهـا براميهـا




سعود الزعبي



لو تزيح البحر ياصاحبي ما انزاح
كل ماشفت سهلة تنسـدح فيهـا!
امسح البحْر وتشوف الدرر طفّاح
ياحليْـل العلـوم اللـي تغنّيـهـا





حبيب العازمي



نعرف إن البحر مايغرق السبّاح
والجبال الرواسي من يدربيهـا
سلموا لي على شليويح ابن شلاّح
ثم شرق الجزيـرة لا يخليهـا




سعود الزعبي



أنت رجلٍ نحيف وفي يدك مسباح
والسواليـف ماتعـرف قوافيهـا
ابن شلاّح بـرّد زنـدك القـدّاح
أصحب القوم ما تقـدر تعاديهـا





حبيب العازمي



ليت كبر الجروم يقصّر الأرواح
وانتريّح من السمنـة وطاريهـا
ابن شلاّح يوم إنه وقف ماطاح
وأنت واقف تخمخمها وتخطيها!





سعود الزعبي



ضاع فكرك وحيلك في حصاة ارزاح
ثابتـة وأنـت ماتقـدر تدربيـهـا
لا ضحكنا وغنينـا علـوم امـزاح
ضاقت أصحابنا وش لون نرضيها؟!



للامانه منقول

آخر تعديل ابوحمـد يوم 11-Oct-2010 في 06:54 AM.