مرثية أحمد بن شراع الذيابي في ابن اخيه عناد

[محمد الذيابـــي]

قصيده للشاعر أحمد بن شراع الذيابي في ابن أخيه الفقيد عناد بن ذياب شراع الذيابي الله يرحمه..

يالله ياللي لك عبادك يصلون=يا منشي مزون السحابه وماها
ياللي بيدك الامر يا مدبر الكون =يا فارج الكربه ومبعد غثاها
يا خالقٍ خلقك من الضعف والهون = علام ما بصدورها من خفاها
لجيت لك يا ملتجى كل مغبون=أشكي عليك الحال يا ملتجاها
إرحم فقيدِ بين الالحاد مدفون = عزيز ودروب الردى ما مشاها
فقيد للنخوه وللجود والعون =ثلاث من دور حداها لقاها
يا عناد قلبي عقب فرقاك محزون =حزني على شرواك ما ينتضاها
يا أغلى على عمك من العين والنون=أنت النظر وأنته لعينه دواها
انت الرفيق اللي على النفس ماامون.=اللي مواجيب الرفيق يحماها
يا عناد والله في قضيتك ما اخون = لو العوازم تدفع اللي وراها
واللي يخونك عساهم يولون =الله لا يبقي شلوة من شلاها
اللي مع الغادر وفعله يميلون = النايبه ترهي عليهم بلاها
يا جعلهم باللي نحسه يحسون =وصدورهم تصدأ ويكثر صداها
لك لابة عن حقهم ما يحيدون = لاشك ما تخطي وترفا وخطاها
وياذيب دام الحق في الدار مضمون =ارقد غرير العين ودرا بكاها
واصبر ترى للصابرين اجر مسنون =نفسٍ صبوره عند ربك جزاها
ياذيب ماهو بالعوض لو يقولون =لكن قضا الدنيا ونقبل قضاها
ويا الله تقبل دعوة اللي يصلون =وتجبر عزا نفسي وتقبل دعاها

التوقيع

التوقيع محمد الذيابـــي