يا حيف يا عز العرب زينة الدر ××× متروكةٍ لو كان تركه سماجه

[قاطع طريق]

يقول رضى بن طارف الشمري في أحدى روائع الشعر:

قال الذي في دفتر القيل ذاكرّ = جنّك بنات الفكر يا قلب ناجه
مثايلٍ ما هي تقاليد وصورّ = من كهرب العسرات صيغن لحاجه
ولا هيضن حب الغنادير يا عمرر = عنهن خلوج القلب هوّن خلاجه
اسباب ما حرك عليّ هاجسٍ ضر = أثر على جسمٍ بها الروح لاجه
شفنا بهالدنيا غيارات وعبرّ = سفن الصحاري نزّل الوقت تاجه
تلوج بشبوك المهونه وتقهر = وتزعج حنينٍ والطنا في حجاجه
وبعيونها لعيون مولاه تنظر = وتطلب من الرب الكريم انفراجه
وليا بغت دربٍ عن الدرب تقهر = تلوج وسط الشبك مثل الدجاجة
ومن الطنا عبرات صدره تكسر = هذا سبايب علّته وانحراجه
تبكي على وقتٍ مضى له مع البر = ترعى ويرعونه سباع الزراجه
بدوٍ على قفر المراعي تغاور = ما جيب له من كل صنفٍ خواجه
واليوم كل من حلاله تخسر = لو يجلبه ماحدٍ يجيه لحراجه
يا حيف يا عز العرب زينة الدر = متروكةٍ لو كان تركه سماجه
من عقب ما نرعاه بالبرد والحر = وكلٍ يسوّي للرحول الحداجه
اليوم بعض الناس عنها توخر = مدري ردى ولا صحيح احتجاجه
البل هله راحوا ووقته تغيرّ = اللي هفا واللي طبع فيه ساجه
و ياما غزو يمّه بقومٍ تجاكرّ = يوم الزمان اللي يخيف ارتجاجه
فوق الركاب اللي لها القاع تهجر = يتلن عقيدٍ ديرة القوم باجه
وعقب المسير اللي به الهجن تفتر = الخيل حفيت والمسامير ساجه
هذا سبور القوم قدامهم فرّ = وشافوا هل البل يوم وصلوا مداجه
جابوا خبر طرشٍ عزيبٍ تذيرّ = الخيل دونه بالمناعير راجه
وقال العقيد لـ لابته يوم عمرّ = غيروا على البل والسعد بالمواجه
تواجهوا عنده على قرّحٍ غر = مثل الجمال اللي على أول هياجه
و وردن وقفن بالمناعير صدرّ = وغدا لهم عند التوالي لجاجه
وكلٍ على حوض المنايا تحضرّ = سباعٍ تسن اضروسها يوم صاجه
ونار الحرايب ولّعوها المسطرّ = واللي دنى يومه مناياه راجه
وصار الفخر لأهل الفخر ساعة الشر = وبنت الردي ماحدٍ يجيه لزواجه
ياتي ولدها تبع لو ماكره حرّ = ما ينطح الشدّات عقله زجاجه
وذكرٍ ذكرته يا فتى الجود يخبرّ = والماء قراحه بيّنٍ من هماجه
واليوم شفنا قاصر البوع يزمر = اللي منوّل يعطي الناس باجه
من فضل حكام الجزيرة يتحرر = ويجاكر العالم بوارد كراجه
وان قلت له وشلون كيفك ليا مر = يقول لك كيفي تغير مزاجه
وذكر ذكرته يا فتى الجود يخبرّ = والماء قراحه بيّنٍ من هماجه
ويطول شرحي لو تطرقت لنمرّ = ما احصي ثمن تاريخ طي وخفاجه
مار يالله بنوٍّ يبعث القاع من غرّ = برقه يشوق امخيّله بالتعاجه
بأمر الولي ينشي ومزنه تزبرّ = ويسقي ديارٍ تشتكي من عجاجه
حتى خشاش القاع منها تدهورّ = وارضه مريضه والمطر هو علاجه
عمارها نوٍّ امزونه تزبر = يملا الفياض وما طمن منه باجه
وعسى الحيا بديار الاجواد يكثر = وجميع روضٍ يمتلي من نتاجه
وديارنا من خير ربي تعطر = ويزهي نواوير البختري بفاجه
ونرتاح والشطة حباله تبترّ = ويطيب كيف البدو عقب انزعاجه
وتمت بذكر اللي له العبد يذكر = فردٍ صمد ماله شريكٍ بحاجه
سامع دبيب النمل بالليل الاسمر = ربٍّ نولّع سرجنا من سراجه
وختم الكلام ازكى صلاةٍ تكرر = على شفيع الخلق يوم المواجه

وسلامتكم