ياموتري لا تضايق من مشاويري

[نايف الروقي]

يا موتري لا تضايق مـن مشاويـري=يوم أن راعيك جا المغباش لـه عـاده
مااظن يصلح يسوقـك واحـدٍ غيـري=أصايدك من الحصا وأرفق بـك زيـاده
جيـب بدفـعٍ رباعـي نقلـة القيـري=ما ودك أنـه يشوفـه بعـض حسـاده
كم مرة في السهل نمشـي مداويـري=وكم مرةٍ قد مسكـت طويـق وشـداده
أحيان نسري وحينٍ نمشي اعصيـري=واحيان قبل الفجـر والنـاس هجّـاده
يوم ان بعض العرب يهوى المصافيري=يجيه وقت الضحى والظهر في رقـاده
أهوى المغابيش قبل ايصوُت الطيـري=يوم ان بعض الشبـاب يكبّـر وسـاده
العين عافت لذيـذ النـوم يـا طيـري=أبغى المقانيص يوم القنص لي عـاده
معنا اشقرٍ ضربته للخـرب تمزيـري=أفدغ وحرشٍ اكفوفه ويل مـن صـاده
مع هدّة الطيـر يذهـب كـل تفكيـري=أنسى مماتـي وكِـنّ العمـر بزيـاده
يا زِين شوف الحبـاري بالمناظيـري=فــي خـايـعٍ مابـعـد زاروه رُوّاده
ويازِين شوف العشاير و المظاهيـري=لا روّحت مع رقـاق الحـزم منقـاده
يـا ماحـلا شرْبـك لـدرّ المباكيـري=أخير مـن نيـدوٍ بـه سكـر زيـاده
وماكول قرص الجمر مع تمرٍ وضيري=أحسن مـن البيتـزا والشورمـا زاده
وجذبك بدلوٍ به الماء من جبا البيـري=أخير من مـاي صحـه وسـط بـرّاده
البر يسوى مسلسـل سالـم الزيـري=وأحلا من مشاهد الكوره مـع استـاده
شوف البراري ولا شوف المقاصيـري=أو شوف نخلٍ ظمايـا واجـد عيـاده
في روضةٍ غـاديٍ للعشـب تنويـري=يازِين شوف الخضار وزِيـن مقعـاده
معـك نشامـا مخاوينـك مناعـيـري=رجّالهـم منـوة للقـلـب واسْـعـاده
حولـك ادلالٍ بهـا البُـنّ المباهيـري=بهارها الهيل والمسمـار هـو اقنـاده
أحسن ولا رفقـة اربـوع ٍ معاثيـري=هرج القفا عندهم هـو ثالـث اعْيـاده
أحباب وأصحـاب بقلـوب المثابيـري=تضحك وهي لشذبة العرقـوب معتـاده
يقفونـك الهـرج بألسنـةٍ مناشيـري=واحَدْهم إلى نصحتـه زاد فـي عْنـاده
هذاك كُبّـه فـلا بـه نفـعٍ وخيـري=ما يتّعظ في الكـلام الزيـن وارشـاده
نومـك بجـو خـلا مافيـه تكديـري=يسوى الفنادق وقصـرٍ قلَّـوا أجـواده
ما حولـك ألا الطيـور أم المناقيـري=امنفّـضـة ريشـهـا للـجـو رَوَّاده
ورزقك على اللي رزق لدباش والطيري=اللي فرض ركن حج البيـت واجهـاده
الرزق عنـد الولـي رب المقاديـري=اللـي جعـل للخلايـق ذكـر وعبـاده
وصلاة ربي عـدد وبـل الشخاتيـري=على نبـي جعـل يثـرب هـي بـلاده

وسلامتكم

ملحوضه هاذي القصيده نايف صالح العضياني

آخر تعديل نايف الروقي يوم 09-May-2008 في 10:02 PM.

[سلطان العصيمي]

صح لسان الشاعر / نايف بن صالح العضياني

[عبدالله الجـــذع]

صح لسآن شاعرنا الجميل ناصر

وبيض الله وجهه ووجهك


قصيده جزله
محبك

,

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[% المفرجي %]

صح لسانك يالغالي
بس عندي ملاحضه بسيطه لو تسمحلي بهاالخلفيه متعبه للنظر شوي يعني الانسان اللي نظره ضعيف لا زم يحط وجهه عند الشاشه عشان يقراها انا والحمدلله نظري طيب ماقدرت اكملها اتعبتني
سامحني على كلامي بس هذا من حرصي ابغا الجميع يستفيد
اشكرك على سعت صدرك

[فهيد مقعد الرويس]

صح السانه

وسلمت يمناك يانايف

الجزل ماينقل الاجزل

تقبل تحيتي وتقديري