من اكل المقلب الشعري الشيخي ام ابن شايق الكل يشارك!!!!!!!

[ابو فايح]

مسيتوا بالخير اطرح لكم مثل هذه المواضيع التى اعتقد انها شيقه والكل يرغبها وقد بدا بمثل هذه المواضيع العضو الغائب الحاضر نادر العش ,,,,,,الليله جايب لكم محاوره بين الشاعر عبدالله بن شايق والشاعر ابراهيم الشيخي وحصل فيها مقلب او مطب صناعي خطير من احد الشاعرين ضد الاخر ولم يكتشفه الاخر انا اريد منكم اكتشاف هذا اللغم وا المطب واول واحد سوف يجيب عن هذا اللغم ساشارك واقول انه الحل الصحيح وانهي جميع التوقعات,,,,,يله يا عاشقي الشعر يله ياشعراء منتدى الهيلا اليكم المحاوره واترك لكم الاكتشاف:

ابن شايق:

حيالله الشيخي اللي له ثلاث سنين مفقود********** والعين والدال حرفينن غلطنا في حداها
ياحبني للعميل اللي يعرف البيض والسود************ماهوب يسهر عيونه من عناها في عماها


الشيخي:
الله يبقيك وانا حيث كان الشعر موجود*********** في حفلة اصحابنا قحطان ولا في سواها
الشعر معنى ومبنى مايحب النقص والزود********ثابت على مستوى ناس رفيعن مستواها


ابن شايق:
ماتدري ان اكثر الضباط كان منول اجنود*******وماتدري ان الشوارب فعلها يحمى لحاها
اليا مزحنا مزحنا والليالي سهود ومهود*******ومن لا يعرف الصقور يقول هالاول شواها


الشيخي:
لا والله ادري واعرف ان العنب عنقود عنقود******* واخرعناقيده اللي زايده نسبة حلاها
اسمي على اسم النبي لكن ماحصلت نمرود******** حصلت من يسرق االديره وهو حامي حماها


ابن شايق:
صدقت في حال لكن حال هرجك ماله شهود*******يابعد والله ثريانا الرفيعه عن ثراها
كان تحب القشر ماعندي الا ريح بارود********** لاشمه الذيب ينسى عويتن له قد عواها


الشيخي:
يابو شنب كل ذي نعمه على ماقيل محسود********اللي عطاك النعم تفرح بها غيرك عطاها
ماجيتك الا بدرع من حديد وسيف مجرود******** والند بالند كان المعركه دارت رحاها



ابن شايق:
اللي يحكم الوطن والشعب ابو متعب وال سعود********الله ينصر حكومتنا الرشيده ويحماها
انا عطيتك يمين الشرع وانته عطني عهود********** واقول يامن حضر صلوا على المختار طاها



الشيخي:
لوكان ماعندك استعداد تستقبل لك وفود********* ماكان شبيت نار يجذب الطرقي سناها
من عام الاول وردت العد واثر العد مورود******* واليوم ماعاد ابه ناس مذللها غماها


ابن شايق:
تعرف الاسد والدار فيه نمور ووسود******وان ما كلتها الاسود اكيد يالشيخي كلاها
بكره يرد البرا والمعركه حاوي ومردود*******ان جات ولا ذلوف مقيط والدلو ورشاها


الشيخي:
طبيعة من جاها رضى ماهوب محدود****** ما عاد يمديه يتندم على خطوه مشاها
الذنب ماهوب ذنبي يوم شفت الريع مقعود******** ياكثر الارياع وانا دونها ولا وراها

التوقيع

عالم تويتر abofayeh@

[فهد النفيعي]

والله ماعرفته ونا خوك لكن

لابد ان اشكرك على هذا الطرح الرائع

[فارس هنا وهناك]

أنا أقولك بالبيت الأول


حيا الله الشيخي اللي له ثلاث سنين مفقو........
وحط الحرف الثاني اللي المذكور بعجز البيت


والله ياابن شايق انك لله مش مهضوم معاي ليش مدري

سلملي على ملفي و رده على بيت زقزوق وطقتها

[سعود الشايوش]

اصلا الشيخي ياهو ياكل مقالب كبر الجبال .. لكنه ذكي يمررها على الجماهير واللي يتابعون على اساس ان مقصد البيت طيب ..

ولاننكر شاعريته ..

بالنسبه لهذي المحاوره اكلها من اول شطر وحرف زياده على البيعه ..


..

[محمد العتيبي]

شكرا يابو فابح ..
..

التوقيع

للتواصل عبر twitter تويتر al_bargawy@

[ابو فايح]

ماشاء الله عليكم شعار ياعيال الهيلا فعلا الشيخي اكلها من اول شطر ومن لم يفهم :
يضع بدل الدال حرف عين في اول شطر وسيتضح المعنى.

[عمر الدغيلبي]

هههههههههههههه

الله يكفينا شر ابن شايق

من اوووووووول المحاوره مخرررررررربها

والشيخي شاعر حكيييييم وحضرت له الكثير

من المحاورات وتأتيه ردوود قاسيه ويتغاضى عن الرد عنها

ليس لعدم قدرة على الرد بمثل المستووى

لا بل حكمة منه واحتراما لجمهووووره

ولاهنت يا ابو فايح بيض الله وجهك عالطرح الرائع

التوقيع

في منتدى الهيلا زحول الرياجيل = بيت القبيله و النشاما إرواقه يزينه حرصه لزين التماثيل = ويجمله نبذ العلوم الدقاقه

[وحي العقل]

انا عطيتك يمين الشرع وانته عطني عهود

هذا المقلب



والشيخي دايم ياكل مطبات يقول له حبيب

يالعسكر اللي بالسلاح تداقشون مع الطبول

<<لايداقش مع الطبول غير بنات الحلال ليا رقصن




للمعلوميه بن شايق عقله مش ولابد

سلم لي على ملفي

[عبدالرحمن الهيلوم]

مشكووووووور يابو فايح
وصدق من قال في كل وادي يهيمون 00تقبل مروري

[قادح شرار]

لا أستطيع أن أحكم . ولكن يا أخوان فرق السن وفرق المشوار الشعري له دور .

وعبدالله بن شايق شاعر فعلاً ولابه قصور , وإبراهيم الشيخي شاعر فعلا ً ولابه قصور .

وإذا أ ُعتبر أن المطب الشعري في مطلع الأبيات لأبن شايق عندما قال: حيالله الشيخي اللي له ثلاث سنين مفقود********** والعين والدال حرفينن غلطنا في حداها
فمن الواضح أن المطب لم يفوت على الشيخي ولكن تنبهه للمطب جاء متأخر في بيته الثاني فقال:الشعر معنى ومبنى مايحب النقص والزود********ثابت على مستوى ناس رفيعن مستواها


أخوكم/ قادح شرار.