سلام يابن حميـــــــــــــــــــــد

[ابومهل]

يالله يلي كل طلاب يرجيه = تحمى وطنا من وجيه النصارا
حنا بخير وكل فرض(ن)نصليه = ونمشي تحت راية طوال العمارا
في ظل عبدالله عسى الله يعافيه = عون الغني وغيث كل الفقارا
الشعب في قلبه وعينه يراعيه =وآوامره فوق المواطن بشارا
وسلطان ابو خالد عضيده مصافيه =درع الوطن عز الوطن وافتخارا
قال القثامي جاب قاف(ن)مغنيه =قصايد(ن)مثل الاصايل تبارا
لي عزوة(ن)تشرب من الجم صافيه = ربعي حبالص من سلايل حرارا
مصيافهم واد(ن)طوال(ن)نواميه = ورماح والوشحه وذيك الديارا
ونملك عشيره والحوا مع ضواحيه =ويكفنا حزم الطرد فاليسارا
اميرنا ابن حمود باسمه نسميه = حلحيل حلال العلوم الكبارا
من لايعرف الصقر فالنار يشويه = مايدري ان الصقر سبع الحبارا
له ماكر(ن)بين الرياجيل يحييه =وله ضربة(ن) منها يذوب الحجارا
شيخ(ن) بليا ربع تضعف مساعيه = وربع(ن) بليا شيخ دار دمارا
سلام يابن حميد تسلم مباديه = تبدي علينا مثل ضو النهارا
حي الامير وحي راي(ن) يسويه = الراي رايك ماعليه اختيارا
حنا معك في كل درب(ن) تباريه = لو كان فيه من المخاطر عبارا
حنا معك في راس رجم(ن) تعديه = لو كان ينزل من سما الرجم نارا
مادام ربعك لك منادى تلبيه = اكيد يحسب للجميع افتخارا
مانملكه في صالح الكل نعطيه = رز العلم وارسم عليه الشعارا
واللي يخالف راينا مانواليه = عليه من ريح الهبايب غبارا
واللي يصافينا هلابه نهليه = له دلة(ن) فيها يفيح البهارا
واللي يقدر فعلنا مانجافيه = اله الصفا واله الوفا والوقارا
واللي تجاهل فعلنا مانراعيه = يرما عليه الحلس مثل الحمارا
حنا عتيبه فعلنا نفتخر فيه = والثار مايذهب علينا عزارا
ودخيلنا بحماية الله نحميه= وعدونا نسقيه كاس المرارا
انصمخه وانقمعه لين نعميه= ويقفي دموعه فوق خده غزارا
قدام ابوتركي تجينا حراويه = تشهد ربوع المملكه كل غارا
السيف من دم المحايز نغذيه = ونقصف هدفنا فوق سرد المهارا
نصبح المذنب ولا مانمسيه = ويمسي على كبده سوات الشرار
ميرادنا عد(ن)تحاوم ضواميه = ومنزالنا بين الديار اختيارا
والعرف منا مانبيعه ونشريه = نشرب قراحه مثل در البكارا
والطيب بوجيه الرياجيل نبديه = واما الردي نسحب عليه الكرارا
والمجد بيدين الرياجيل تبنيه = وهذيه منكم ياعتيبه قرارا
من لايسوي مثلكم ضاع طاريه = يرمي بنفسه فوق درب القطارا
طيب القبايل لاتناسا ولاانسيه = والنعم فيهم كل بدو وحضارا
هذا كلام الشاعر اللي مسويه = تستاهله ربعي ولاهو خسارا


هذي قصيده لوالدي مهل بن حبيب القثامي بمناسبة مزاين قبيلة عتيبه

[نبض المشاعر]

صح لسانك ولسان الشايب

قصيدة جزلة

التوقيع

دنيــــا ومــن يـــــدري كلــــ شــــئ يصـــير فيهــــا

[سهم الهيـــلا]

صح لسان قيلها وناقلها

تقبل مروري

[يوسف عبيد]

صح لسان ولسان ابيك وبيض الله وجيهكم