ديوان المبدع الامير خالد الفيصل

[نبض عتيبه]

اليكم بعض قصايد الانسان المعروف ببداعه انه الا مير خالد الفيصل









أحب الليل


أحب الليل و نجوم الليالي
حبيباتي أساهرهن لحالي

لقيت بصحبة النجمات سلوى
عقب ما فارق الخفّاق غالي

ألا يا ساريات الليل سيري
على واديه مع مسرى خيالي

تجلّي في سما خلّ المودّه
و قولي للحبيب وش جرالي

هنيك يا نجوم تناظرينه
و انا مالي على النظره مجال ِ

و لكني ولو شابت عيوني
أحب الليل و نجوم الليالي

صبرت و كل حي لو تصبّر
إلى مالت ليالي العمر مالِ






أبي منه الخبر


أبي منه الخبر و يقول للّه
. . . لفى المرسول ما عيَّن محلَّه

و قلبي تايهٍ من عام الاوّل
. . . ألا يا الله يسّر من يدلّه

خذاه اللّي على خدَّه علامه
. . . سوادة غيم في شمسٍ مطلّه

سرقني ما دريت انّه سرقني
. . . سلبني و أحسب إني فاطنٍ له

انا يوم أرسل عيونه لقلبي
. . . عطيته مهجتي و المعطي الله

نصف زين الخلايق في عيونه
. . . و باقي الزين في باقيه كلّه




القصيده الاخرى
لك حق تزعل

لك حق تزعل ثم لك حق نرضيك=ما اقوى زعل حبيب قلبي وعيني
ما دام قلبي يا اريش العين مغليك=اطلب ولك روحي وما في يديــني
لا تـنـشـغل مالك وزينٍ يــضـاهــيك=ابـيــك أنا لـو كان غـــــيرك يبيني
يوم الله احسن صورتك خصني فيك=فـيك الجـمال وصــادق الــود فيني
شعري يزين بوصف زينك وطاريك=والأرض مــن مـمشـاك فيها تزيني
اول غــناتي صوت الأشـواق يدعيك=واخــر غــناتي شـق صدري حنيني

أوّاه


أوّاه يا قلبٍ عليلٍ تعلَّقت
في حب منهو بالنواعس فتنّي

حاولت عيني تمْتنع ما تملّكت
حبّه مَلك قلبي و فكري و ظنّي

ليلة لقانا يا ضميري تلوّعت
هاجت شجوني و العيون أهملنّي

عز الله إني بالمودّه تحمّلت
محدٍ فزعلي و خفّف الحمل عنّي

حبّه ذبحني ليتني ما تولّعت
منه العذاب و زايد الشوق مني

لا قلت أبسلى رغبتي ما تمكّنت
انا الذي في حبّه ابكي و اغنيّ

لو إني من اوّل للغرابيل ثمَّنت
ما جيت حد حماه ولا طعنّي

ضايق الصدر بالله وسع الخاطر=دنياك يازين ماتستاهل الضيقة
الله على مايفرج كربتك قادر=والله له الحكم في دبرة مخاليقه
حلو العيون استهانت دمعها الحادر=كف العباير حزين الدمع ماأطيقه
حرام كيف الحزن يغشي وجهك الطاهر=والورد في وجنتك حرام تجريحه
يفداك قلب على ماتشتهي حاضر=يفداك باللي بقى لي من معاليقه
مافات خله ولاتهتم من باكر=واغنم من اليوم ماساقت توافيقه

من بادي الوقت وهذا طبع الايامي=عذبات الايام ما تمدي لياليها
حلو الليالي توارى مثل الاحلامي=مخطور عني عجاج الوقت يخفيها
أسري مع الهاجس اللي ما بعد نامي=و أصوّر الماضي لنفسي و أسليها
أخالف العمر أراجع سالف أعوامي=و أنوخ ركاب فكري عند داعيها
تدفا على جال ضوّه بارد عظامي=و الماء يسوق بـ معاليقي و يرويها
إلى صفالك زمانك علّ يا ظامي=اشرب قبل لا يحوس الطين صافيها
الوقت لو زان لك يا صاح ما دامي=يا سرع ما تعترض دربك بلاويها
حتى وليفك و لو هيّم بك هيامي=سيّور الأيّام تجنح به عواديها

الله عليها عودت وانا احــــسب الغالي نسى
=الله عليها لي بغت ما يطفي الشمس المـسا
هلت ســــحابة وصلها على حياتي وازهرت
=واهتز قلبي من نبات الحب زهـرٍ واكتــسى
يا وصـلها الغــــالي هلا حيـــيت ياعز الطلب
=لا خير في قـلبٍ على مغـليه بالدنيا قســــــا
وش خانة الحب البعيد إن كان عشاقه يموت
=يــخيل براقــه وهو ما ذاق طعمه واحتسى
ياحـلم الايام الشـــــــــداد ياحـلم الأيام الليان
=ابطيت اقــــول الله كريم والكلمه عســــــى
من عقب وحشة ليلتي هلت تباشير الصباح
=عادت وليفة هاجسي عادت مزعلة النــــسا

كفاني عذاب



كفاني عذاب الله يجازيك بافعالك
جرحت الضمير ولاطرالك تداويني

مريض المحبه داه ودواه بوصالك
الا كيف تبخل وانت نظرتك تشفيني

الا واعذابي كيف ماعاد يهنالك
سوى انك تشوف الموت بيديه يطويني

انا يوم احبك ماتذكرت غربالك
ولاقد خطر في بالي انك تجافيني

تفرغت لك ياساكن القلب بلحالك
تقل غيرك من الناس ماهم بحييني

انا قام يطرالي بالاحلام مرسالك
وطيفك حبيبي بين الاحلام ناسيني



من عذابي


من عذابي قلت لعيونك هلا
=يا هلا بك يا عذابي يا هلا
ما يكفّي لوعتي بك من غلاك
=رحت تبعد عن عيوني يا غلا
تحسب اني سالي مثلك وانا
=في هواك الله حسيبك مبتلى
ما يسليني مكان ولا زمان
=لا ولا غيرك حبيبِ لا ولا
قلبي الي ما يطيع لمن بغاه
=من نظر عينك تعهّد بالولا
صار لك بالقلب مرباع ومصيف
=يوم غيرك عن مرابيعه جلا
فيه لك مقيال عن حرّ الزمان
=والدفا عن برد شمله بالخلا

بشروني عنك ما يدرون عني=ما دروا باللي شغل فكري وظني
اتسمّع للحكي بك واتحفّظ=خايف دقات قلبي يفضحنّي
كل ما سمّوك باسمك فز قلبي=والضماير والمدامع شاغلنّي
يا حبيبي يوم جنبت الحبايب=عفت لجلك كل من قبلك فتنّي
من عرف قربك عرف طعم السعادة=وإن تشطّرت أدرك غبون التمنّي
في هواك من العسل لذّة مذاقه=لكن حروس النحل عنها حدنّي
ماعد اسمع بك ولا اوحي فيك عاذل=والعذارى جهّل لو داعبنّي
لك عيون فعلها بي فعل ظالم=من عرفتك يالغضي ما ريحنّي
إن تفارقنا تغايا لي بليلي=وإن تقابلنا دهنّي واخجلنّي

أسابق الساعه


أسابق الساعه و تسبقني الساعه
تقضي و انا توني باوّل ثوانيها

أبشتري وقت وين اسواق بيّاعه
ياللي تبيع الدقايق حد و اشريها

قلبي يبي وقت لو الوقت ما طاعه
و عيني تبي شمس لو الشمس تعميها

و نفسي مثل باقي الاجواد طمّاعه
ابي اجدّد على الفرحه لياليها

لا شك الايام للفرحات منّاعه
لو نوّرت ليلةٍ عشرين تطفيها

يظهر ثبات الفتى و النفس مرتاعه
خوفٍ على اللي نحبّه من بلاويها

لو ان كل ينال مناه بذراعه
خذيت حقّي من أقصاها لدانيها

المشكله انك يابو لحظين بتّاعه
تاخذ سلاحي من الكفين و أعطيها

و انا ادري ان العيون السود خدّاعه
لا شك ودي أصدّق منك داعيها

و المهتوي لاهتوا مايطوي شراعه
يمشي على النار كنّه ما وطَى فيها



ناديت

ناديت والليل جاوبني وبكّاني=محد(ن) سمعني سوى ليل(ن) نزَع دمعي
ما غير ليلي من الأحباب واساني=يا ويل من همّله ربعَه مثل ربعي
طالت مسافاتي وتاهت بي أزماني=وعلّمني الوقت كيف أقسى على طبعي
ومن طاول الوقت لو هو قاسي(ن) لاني=ومن يرفض العشر يقبل عقبها سبعي
كم عاقل(ن) صار بأمر الحب هيماني=وكم قلب عذره ترك فيه الهوى صدع
يا عازف بالهوى منغومة ألحاني=رد المواجع نغم في قلبي وسمعي
غن الغزل ينتعش خفّاق ولهاني=وأشرب زلال الهوى من كاسي ونبعي
ومادام أنا حي كل الحب ميداني=وان مت يا حادي الأشواق لك بَدعي

حمام شهار


انا شاقني بالحيل منظر حمام شهار

. . . صلاة العصر يوم انحدر بأسفل الوادي

لحظني شبكني ثم قفّى وانا محتار

. . . دفعني غرامي له على غير معتادي

تطاير حمام الشوق والقلب مني طار

. . . تلاعب جناحه بالهوى لعب بفوادي

أنا امّا حصلي يا سعد يمهم مسيار

. . . تراهم سبب ذبحي إلَى جاك نشَّادي




مرتاح احبك


مرتاح احبك ولا علَّمت
. . . حتَّى انت عيّت أبيّن لك

و البارحه يوم انا سلمت
. . .شكّيت لو عيني تدلك

برقٍ لمع في العيون و خفت
. . . مواجع القلب توصل لك

عساك في ناظري ما شفت
. . . كيف المعاليق يومنّ لك

من خوفتي لا احترق جنَّبت
. . . هربت من شمسك لظلّك

اخشى عليك الهوَى لو طحت
. . . ما تلّني يمّـك يتلّك

أبي قليلك ولا حصّلت
. . . بعضك تركني مع كلّك

ما ادري صواب او خطأ ما قلت
. . . إنك حبيبي و انا خلّك






مجموعة انسان




قالت من انت ؟ وقلت مجموعة انسان
من كل ضد و ضد تلقين فيني

فيني نهار و ليل و افراح و احزان
أضحك و دمعي حايرٍ وسط عيني

فيني بداية وقت و نهاية أزمان
أشتاق باكر و أعطي أمسي حنيني

و أسقي قلوب الناس عشقٍ و ضميان
و أهدي حيارَى الدَّرب و احتار ويني

و احاوم صقور الهوا حوم نشوان
و اسيّل الوديان دمعٍ حزيني

في عيني اليمنى من الورد بستان
وفي عيني اليسرى عجاج السنيني

تهزمني النّجلا و انا ند فرسان
و اخفي طعوني و المحبَّه تبيني

و إن ما عرفتيني فلاني بزعلان
حتَّى أنا تراني أحترت فيني





ستل جناحه



ستَّل جناحه ثم حام يرقى على متـن الهـوا
يزفَّه بعيدٍ وأنـا محـدود فـي حـد النِّظـر
له بالهوا شف ومرام يلعب مع الغيمه سـوا
ولا جناحٍ لي وأطير والأرض صارت لي مقر
طيري ضرب جوَّ الهيام ولو دعيته ما التـوى
عزَّي لمن طيره غدا ولا له من أمـره مفـر
فكري تغشَّاه العسم أمسيت وفكري ماضوى
الأرض قفر من الونس والَّليل من فرحي قفر
شبَّيت ضوي بالظَّلام في صحصحٍ ذيبه عوى
مالي أنيس إلاَّ النَّجوم أو نور وضَّاح القمـر
خالي وكنَّي في زحام قلبي تلهَّب وإنشـوى
ماعاد أميَّز بالحشا ولاَّ على الضَّـو الجمـر
وين إنت ياداعي سلام وين إنت يابايـع دوا
ردَّوا لي النَّومه ترى بالعيـن جـلاَّدِ السَّهـر
دوَّرت بالشَّده حزام ولا لقيت الَّلي قـوى
يالله دخيلك مالقيت الَّلي نشدَّ بـه الظهـر [/QUOTE]


ولكم جديد ابدعات الامير خالد الفيصل



القصيدة بعنوان " قسوة "




ليه أذا حبيتك اكثر..زدت قسوه

وأن دريت بحاجتي لك...زدت جفوه

وأن عطيتك من حياتي ماتريده..ماكفاك

تحسب أن الحب...نزوه

والله أني ياأحب الناس..أحبك

والله أن الروح لو ترضيك..فدوه

والله أني تارك(ن) غيرك..وجيتك

مزعل الزعلان والعذال..عنوه

كل دقة قلب فيني لك قصيـده

تكفي الدنيا مع الأحباب غنوه

وكل هاجس مايجيب إلا خيالك

سلوتي بالعمر في صحوة وغفوة

أجمع إحساسي وأشواقي وأجيــــــــــلك

والبس ثياب الهوي والعشق كســـــــــوه

انتقيلك من سواليفي حسنها

والقصايد من غزلها...كل حلـــوه

وانثر العبرات والضحكات عندك

تاخذ اللي تلتقيلك فيه سلوى

وأذكر الله كل ماشاهدت حسنــــك

أشهــد إنك فوق عرش الزين ذروه

ماقصدت بكل هذا أتجمل..

أو اقول اني احق الناس حظــــــوه

أدري اني عادي ومافي ميزه

وادري اني كادحن..ماحاش ثروه

وأدري اني في خريف العمر ماضي

مابقي بيني وبين القبـــــــر خطـــــــــــــــــوه

لكن إني صادقن فيما أقوله

واطلب من الله عن الزلات عفـــوه

آخر تعديل نبض عتيبه يوم 20-Sep-2007 في 09:57 PM.

[صقرالحره]

ستل جناحه



ستَّل جناحه ثم حام يرقى على متـن الهـوا
يزفَّه بعيدٍ وأنـا محـدود فـي حـد النِّظـر
له بالهوا شف ومرام يلعب مع الغيمه سـوا
ولا جناحٍ لي وأطير والأرض صارت لي مقر
طيري ضرب جوَّ الهيام ولو دعيته ما التـوى
عزَّي لمن طيره غدا ولا له من أمـره مفـر
فكري تغشَّاه العسم أمسيت وفكري ماضوى
الأرض قفر من الونس والَّليل من فرحي قفر
شبَّيت ضوي بالظَّلام في صحصحٍ ذيبه عوى
مالي أنيس إلاَّ النَّجوم أو نور وضَّاح القمـر
خالي وكنَّي في زحام قلبي تلهَّب وإنشـوى
ماعاد أميَّز بالحشا ولاَّ على الضَّـو الجمـر
وين إنت ياداعي سلام وين إنت يابايـع دوا
ردَّوا لي النَّومه ترى بالعيـن جـلاَّدِ السَّهـر
دوَّرت بالشَّده حزام ولا لقيت الَّلي قـوى
يالله دخيلك مالقيت الَّلي نشدَّ بـه الظهـر



اخوي الغالي نبض عتيبه

بيض الله وجهك
ابحرت بنا في جووو خالد الفيصل (دايم السيف)

صح لسانه فهو غني عن التعريف

بارك الله فيك

[أبو مرحبا]

قـصــائــــد رائــعــــة

صــح الـســان الأمير خالد الفيصل


نبض عتيبه

يعطيك العافيه على النقل الموفق

التوقيع

إن قلَّـت الوزنـه وربعـي مشافيـح ** أخلـي الوزنـه لربعـي واشـومـي

[عبدالله الجـــذع]

بيض الله وجهكـ عز الله انكـ عرفت تنقــي ..


يالبا قلب الأميـر خالد الفيصل وشعــره الثـــري..



سلمت اناملكـ..



عبد الله الجـــذع...

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[نواف العصيمي]

يعطيك العافيه

,ولاهنت موضوع رائع

التوقيع

[نبض عتيبه]

صقر الحره

ابو مرحبا



عبد الله الجذع



نواف العصيمي




اشكركم على المرور الذي أضاء صفحتي

[حمـد المقاطي]

يعطيك العافيه يا نبض عتيبه

وعقبال فوز الزعيم

والاسيويه

التوقيع

بكل مكان لنا أحباب .. ويصعب علي الفراق .. لربما في يوم نلتقي ونعاود ذكرى الأحباب . !! سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ . !!

[عبدالله هادي ناشي الفليت.]

يعطيك الف الف عااافيه على الديوان الجمييل