مساجلة الشاعر عبدالله بن عون والشاعر راجح العجمي

[سيف العجمان]

عبدالله بن عون

ياخوي الجنب حسب الميانه والمزاج = كان ودك تعفي الصدر من حنكلته
ودنا فالعيد بمعايدة راعي عجاج = الخطيب الشاعر اللي نحب جبلته
مالنا لاهنت مجناب عن سفر الحجاج = لين ننهل من حديثه ونشرب دلته
ودنا للمارد العذب ماهوب الهماج = وش نبي باللي وجوده يشابه قلته
ودنا اللي مايضيف ضيوفه بالدجاج = وصاحبه يرفى خماله ويدمح زلته
من نسانيس المفاريد وعيال النعاج = يحتسي ملىء الصياني وهاذي ملته
مير غازي مالنا في مخاواه اندماج = كيف نقدر نخفي اسرارنا عن شلته
ان درى جاله علينا تشره واحتجاج = وحجته لو حولت فوق ضلعن هلته
مثل يوسف مالنا في منازعته خراج = حد باتوعٍ شطير تروع سلته
والنزاع إلليا تكرر ترا ماله علاج = يبتلش به صاحبه لين تبدي خلته

راجح العجمي

ياكريمٍ مالنا في كنف غيرك ملاج = سهل اللي كل قدراتنا ماحلته
باديٍ مبدأ مطلٍ على خدٍ زراج = وقبل اعدي فيه شقر الحرار احتلته
واتمثل في سعاده وفرحه وإبتهاج = واتحرى جيت اللي تنومس طلته
رفقته بين المطاليق فوق الراس تاج = ومن دعاه وزار بيته يشرف حلته
في كلامه لاهل الهم ونسه وإنفراج = وللجزيل من المعاني هجوسه دلته
شاعرن ياتيك بالبيت مافيه إعوجاج = ويتفنن فيه كنه يعمر فلته
المحيط اللي إلى زاد طوفانه وهاج = شفت فاطراف السواحل نوادر غلته
تحت نور الشمس لا بان تلتعج إلتعاج = وكل من له شف فيها يعبي سلته
في زمانن ساحة الشعر كنها في حراج = لين ضاقت به عزاز النفوس وملته
سببوا لناس رجه وصجه وإنزعاج = شلةٍ تبغي طريق القصيد وضلته
كون عبدالله ومثله يسوي له مساج = لين يجبر من كسوره وتشفى علته
يابو نايف وقتنا فيه هزه وإرتجاج = خل غازي عن يمينك لا عاد تفلته
واما انا لا يمكن احط من دونه سياج = ماتخلى عن خليلٍ تنومس خلته

[محمد الذيابـــي]

صحة الالسن جميعاً

لا هنت يالغالي,,,

التوقيع

التوقيع محمد الذيابـــي

[سيف العجمان]

صح بدنك يالذيب ولا هنت على المرور

[عايض جزاء العصيمي]

قصائد رائعه

صح الاسن الشا عرين

تحياتي

[مجول بن جلال المقاطي]

سيف العجمان مشكور على ايراد هذه المساجلة النادرة في معانيها ومفرداتها
والله يطول في اعمار شعارها دامهم بخير الشعر بخير

[سيف العجمان]

المشاركة الأصلية كتبت بواسطة عايض جزاء العصيمي

قصائد رائعه

صح الاسن الشا عرين

تحياتي

صح بدنك ياعايض ولاهنت على المرور

[سيف العجمان]

المشاركة الأصلية كتبت بواسطة مجول بن جلال المقاطي

سيف العجمان مشكور على ايراد هذه المساجلة النادرة في معانيها ومفرداتها
والله يطول في اعمار شعارها دامهم بخير الشعر بخير

لاهنت يامجول على المرور المشرف وانا اشهد انك صادق يابو جلال