قصيده لنمر بن صنت،،رحمه الله.

[@عريب الساس@]

يانجمة الصبح كبدي منك محروقه

لاشــع نورك علينا لاتغيــبـيـني

ستاير القلب من فرقــاك مفتوقه

أصبر من العام لين إنك ذبحتيني

الـود لو نتركــه عنـّــا وطـاروقه

أظني أرتاح وأنتي تستريحيني

لبّيك يللي تجـر القلب وعروقه

كله علشان يوم إنك تلـبّـيني


تلحّني لـحّ ركبٍ عجّـلوا سـوقه

أو جل ذودٍ مسرّيهن شيابيني

عدّيت من مبسم المجمول لاذوقــه

أنا بــلاي الحيا وأدرى على ديني

ياقلب يللي من ( الجازي ) دنا عوقه

ياناس شيروا عليها لاتقاضينــي

وإن كان قلبي تليّـش عنه صندوقه

شــدّوه ليت آتجوّد عنه بيديني

قالوا معاليق قلبك منه مسروقه

قلنا خذته الضحى والناس واعيني

ياليت ربّي ومـــر خالد على شوقه

يفـك حبله ولو يعطى مــلاييني

يالله ياخالق الدنيا لمخلووقه

تقدر على الموت تذبحني وتحييني

تلم شــملي لابد الروح مرفوقه

بأربع هناديس في قبري تخاويني


الشاعر /نمر بن صنت العتيبي. رحمه الله

وارجو ممن يعرف بقيه القصيده ان يذكره لنا ،،،،،،

[ابن فرحان]

بيض الله وجهك يا عريب الساس ..

نمر بن صنت شاعر كبير وله قصائد جزله ..

ولكن لم تاخذ قصائده حقها في النشر .. حبذا اذا احد من الاخوان يعرف من قصائد

هذا الشاعر ان يدرجها هنا ..

الف شكر يا عريب الساس ..

[ابن مشيب]

الله يعطيك العافيه على هذة القصيدة الرائعة يا @عريب الساس @ للمرحوم الشاعر نمر بن صنت الحافي.

[نهيان الحمادي]

الله يعطيك العافية و الله يرحم الشاعر

[ابو فراس]

رحم الله نمر بن صنت

وبيض الله وجهك

[@عريب الساس@]

الاخوان ابن فرحان وابن مشيب وسحاب نجد وابوفراس مشكورين على المرور

وياليت من يعرف القصيده كامله يوردها لنا ،،،،،،

وتقبلوا تحياتي،،

[طلال الثعلي]

مشكور مشكووور
ياعريب الساس

ورحم الله نمر بن صنت