يافهيد شب النار ... لسهل بن نايف الكسر المرشدي العتيبي

[محمد العتيبي]

يافهيد شب النار مع باحة الشوف=ترى حلات الكيف مـع فكـة الريـق
عان الحطب في ثنوة الدعب مجعـوف=والمـا مـن القلتـه قـراح المذاويـق
أخذ الكريك وحـط للنـار مجـروف=نـار عليهـا يجلـسـون المطالـيـق
خل الخشب في ترعة النار مصفـوف=وادفق عليه القاز مـن فـوق تدفيـق
ولا جا لشعلتها تواشـي وعاصـوف=حط البريـق وفـرق النـار تفريـق
ومن ماركة بغداد قم هات لـي نـوف=عفـراً تنافـس بالبيـاض الغرانيـق
عفراً طويلة جيـد والوسـط ملهـوف=مكبوسة الغطوه على حلقهـا الضيـق
طويلة العرقـوب والخشـم معكـوف=جبـرة حديـده والجوانـب لواهيـق
من البكار العفر تاخذ لهـا وصـوف=وتاخذ وصـوف ملهفـات السماحيـق
تاخـذ لهـا منهـن مثنـاه وكتـوف=لوكان محرقهـا سنـا النـار تحريـق
والثانيه رسـلان والشكـل معـروف=والثالثـه رسـلان والرابـع بـريـق
واحمس لنـا بـنٍ شرينـاه بجـزوف=جابـه يمانـيِ عيـونـه بلاحـيـق
من شجرته من يم خـولان مقطـوف=مـن وارد الخـولان مافيـه تبريـق
خابرك انا يا فهيد فالشغـل شاحـوف=وموفـق فـي حمسـة البـن توفيـق
لا تنطل المحماس يا فهيـد فالجـوف=اخـاف يلحقهـا سنـا النـار بلحيـق
للنار جوف وجال وجنوب وطـروف=وللحمس يفهق صالي الجمـر تفهيـق
حفها على سمـرِ شديـد اللهب حـوف=حتى تعرق من سنـا النـار تعريـق
ولا اندار لون الحب ثم صار مشيـوف=جاللنجـاض ابهـا صفـار وتراميـق
قـم صبهـا بمبـردٍ عـود وسعـوف=مقمـرٍ عـوده يجـي لـه تبـاريـق
ثم هات لي نجر كما الطيـر مكتـوف=وقفـة نــداويٍ يـتـل المسابـيـق
اطول من الرسلان يوم انهـا وقـوف=ليا ناشها المهوى يجي لـه تصاعيـق
ولقم وبهـر واودع الهيـل مدغـوف=ومـن العويـدي ذوق الهيـل تذويـق
حتى يجي الفنجال لا صـار محيـوف=دم الغـزال اللـي يجـي فالمعالـيـق
والا الخضاب اللي على كف غطروف=نجـلاً تخـازر بالعيـون العشاشيـق
يجمدعلـى الشـارب لياصارمشفـوف=وصف الخوير إن صارفالوصف تدقيق
بريةٍ تبعـد صلـف كـل مصلـوف=تجلا العمس ماهيب شاهـي سواويـق
ليا ذرف منهـا علـى الكبـد ذاروف=يبـي يهـود شـارد الفكـر ويريـق
هات الشداد وعطني الجاعد الصـوف=فراش اهل هجـنٍ تبـوج الرقاريـق
تراي انـا والهـم لايـف ومليـوف=وهجسي من البارح يجي لـه تخافيـق
وليا عزف هجس الغنا كـل معـزوف=تنفـك بيبـان القصـيـد المغالـيـق
جني بنات الفكـر زافـات وصفـوف=وقمت اتخير فـي قـراح الطواريـق
للشعر مثل الصيد قطعـان وخشـوف=الصيـد طعمـه والنـوادر توافـيـق
نبا نخلي عاصـي البيـت معسـوف=ثم راحـت القيفـان عقبـه مواسيـق
وليا اعتدل هجسٍ لـه ايـام معكـوف=يمـة طريـق معلقـات العشـاريـق
ياصاح انا قلبي مـن الـود مشعـوف=حب البنـات ملصـقٍ فيـه تلصيـق
شاعيه مجمولٍ ولـي فيـه معـروف=وموثقٍ لـي معـه بعـض المواثيـق
غيدا النوابـي عمرهـا متـن وردوف=زملوق غصنٍٍ مـن طـوال الزماليـق
ليا بينـت خـدٍ كمـا بـارق قنـوف=رخم السحاب اللـي خشومـه مدانيـق
وعينٍ هدبهـا لا شبـح كنـه سيـوف=عين اشقـر مربـاه روس الشواهيـق
تنسف فليل غاطـن ٍالمتـن منسـوف=على مثل غرمول عـرق الصعافيـق
مـرودمٍ بالحـال ماهيـب حرجـوف=ولا شافها راع الهـوا جالـه شهيـق
ملهوفة السرجوف والجسم غظـروف=والمفرع اللي فيـه للشمـس تشريـق
صدرٍ تقول من ابيض القطن منـدوف=طلـع النهـود مفتـقٍ فيـه تفتـيـق
ياما عليك الاحـي الـورق واسـوف=ورق علـى دوحٍ غصونـه مواريـق
أمـر بيتـك واتـعـداك واطــوف=وانا على شوفـك شفـوق المشافيـق
ادرا علـى سمعتـك واذل واخــوف=من اهل الهـروج مكثريـن النقانيـق
كم واحـدٍ لوكـان ماهـوب مكلـوف=يطقهـا لـو جنبـت عنـه بلحـيـق
ترى التعب في راحة النفس مخلـوف=شوف العيون يـزود النفـس تشويـق
هذا ويا من لـه نحـا البـال ملفـوف=شوفك يسلينـي عـن الهـم والضيـق
ليتك تصافحنـي بذرعـان وكفـوف=والا علي تدنـق الوجـه تدنيـقٍ

التوقيع

للتواصل عبر twitter تويتر al_bargawy@

[عبدالرحمن الهيلوم]

صح السانك يالغالي يابن الغالين

(( يانور المنتدي ))


تقبل مرور اخوك

[محمد العتيبي]

المشاركة الأصلية كتبت بواسطة الهيلوم1340

صح السانك يالغالي يابن الغالين

(( يانور المنتدي ))


تقبل مرور اخوك

النور نور وجهك الله يسلمك ..
واشكرك على مرورك العذب ..

[محب الهيلا]

مشكور وماقصرت على القصيده

[محمد العتيبي]

محب الهيلا
العفو يالغالي وشكرا لمرورك..

[النخيــــــش]

صح للسانك

ويعطيك العافيه

[محمد العتيبي]

النخيش
صح بدنك وشكرا على مرورك ..