الأوله يا الله يا مجري الأفلاك

[كلاشينكوف]

الأوله يا الله يا مجري الأفلاك = تعرف مجاريها ومحصن حسابها
يااللي خلقت آدم وحواء من العدم = ومحيي عظام(ن) تحت سافي ترابها
تغفر لعبد(ن) معترفلك بذنبه = قدام لا التوبه يصحكون بابها
فكرت في الدنيا وفكرت في العرب = وبعض الرفاقه ضايق(ن) بي جنابها
وأنا ليا جات الركايب نطحتها = وأكرم الخطّار وأكرم ركابها
وأنا ليا قالوا نبا ننطح العدا = أطرّف البندق وأكثر زهابها
وإن عمست الأريا ركبنا ظهورها = وناخذ صليب حقوقنا من رقابها
ونضد منهو في القبايل يضدنا = وناطا على روس العدا ما نهابها
وليا حصل بين الرفاقه مشاكل = احلها واللاش يعلن خرابها
عزي لمن لا يعرف الحق و الخطا = ويعرف خطا القاله ويعرف صوابها
وعزي لمن صكت علاه الأعادي = وهو دروعه عن متونه رمابها
دايم يشاور من يعضه بنابه = والحيه الرقطا تعضه بنابها
طبع العدا يسعى لشقت عباته = مرسومة الخطه وهو ما درابها
خلوه يربض ما يوفي قالته = عيب(ن) على من قالها واستنابها
وهذا زمان(ن) يقهر الشاب شايبه = والعود ضاعت خنجره مع نصابها
وأهل النمايم بينهم زاد نقلها = تضبح ثعالبها وتنبح كلابها
كل(ن) خبرنا يوم مدّات الأيدي = يوم العدا بالدم تغرق ثيابها
يا حازم أبا أوصيك واحفظ وصاتي = الفقه والتوحيد جود كتابها
تفحص التاريخ وادرس كتابه = تعرف سنين(ن) ماضيه وش جرابها
ولا تحتزم بالاش وقت الشدايد = ولاّ ضعوف(ن) حايرات(ن) جلابها
ومن لا يودك ود عينك بذلفته = وربع(ن) تودك دوس معها هضابها
و أوصيك سرّك احتفظبه وجوده = جوف الضماير مغلفات(ن) ضبابها
ولا تحتزم الا بقرم(ن) مجرب = لا دلهمت سود الليالي سرابها
وأوصيك في عانيك وقف شراعه = ترى العواني لزمت(ن) يلتجابها
ومن بعد ذا يا راكب فوق أصيله = وقم السدس ومزينات آدابها
ملفاك من يوجد بدار الأذاعه = ربع(ن) على الميعاد تسمع خطابها
وقل ترى المطلوب حاجة بسيطه = نشر القصيدة بعد جات في رحابها
وصلوا على المختار وآله وصحبه = عداد ما عج الزهر في شعابها

للشاعر .. سليمان بن مطلق الخماش العدواني .. المتوفي عام 1390 هـ .. وسبق اذاعة هذه القصيده من خلال الإذاعه السعوديه ..

[أبو فيصل]

صح لسانك و لسان الشاعر

ولاهنت على هالنقلة

تحياتي

التوقيع

لا إله إلا أنت سبحانك إني كنت من الظالمين

[كلاشينكوف]

صح بدنك يا فهد .. وشاكرلك حضورك و تفاعلك .. الله يعطيك العافيه