يامرحبا ترحيبة ٍ ترسي على سبع البحور = من طيبها تلغي تراحيب الجماعه كلها ! العمده

[عقاب العنزي]

السلام عليكم

صباح الخير ياعمده

يامرحبا ترحيبة ٍ ترسي على سبع البحور = من طيبها تلغي تراحيب الجماعه كلها
الضابط اللي علّق الرتبه على جنود المرور = ليته مع آخر خدمته بعض العرب يفطن لها

[رعد الروقي]

دام البقا رديةً تشرح مغاليق الصدور=مافيه عقدة فالصدور الا تجيك بحلها
اصبر لوقتك مثل صبر ايوب وتزين الامور=لابد يظهر للعرب دق العلوم وجلها

[رعد الروقي]

نسينا نرد السلام ههه


عليكم السلام ورحمة الله


صباح النور يا عقاب

[عقاب العنزي]

الله يعز اصحابك الغالين وافين الشبور = لكن ّ خلك في ذراها واستظل بظلها
من بعد مابدلت جلد الذيب في جلد النمور = يمكن ذياب الظلع في تال الزمان تذلها

[رعد الروقي]

من فضل ربي ماقضيت العمر في ظل القصور=اشب ناري من زنادي والدروب ادلها
المشكلة فاللي سرى ليله على عشرين شور=وعروق قلبه كل طاري لا طراله تلها

[عقاب العنزي]

لو الاشدّه في يدي مدّيت لصحابي جسور = اغنيتهم عن المسامه والدموع وهلّها
المشكله فاللي مع العالم ماحصّله عبور = يااصحابنا ياللي ورا الحفنه مراتع بلّها

[رعد الروقي]

اخوي عقاب العنزي


استاذنك


نكمل غداً ان شاء الله

[عقاب العنزي]

على خير يالعمده واذنك معك

..

[صبي بني شهر]

بيض الله وجيهكم مبدعين واتمنى الموااااااصله

[قادح شرار]

يا سلام سلم .

صحت ألسنكم ..