رائعه من روائع عبد المعين ورد الدلبحي عليها !!!!!

[ابـن نـعـيـس]

السلام علاكم ورحمه الله وبركاته

من روائع شاعر عتيبه عبدالمعين ابن ثعلي

اهداء خاص مني الى العضو الغالي عيدالعتيبي
لانه كان يسأل عن هذه القصيده

سـلام ياعـد صبـاحـه وردنــاك=اليـوم ماعينـت لـي ورد جـاكـا
ياعـد ويـن اللـي طراتـه لياجـاك=اللـي ليـا جيتـك يجينـي علاكـا
اللي ليا جيتـك يجينـي علـى مـاك=واليـوم لاجانـي ولاجــا يبـاكـا
في ما مضى تدهل وروده ضمايـاك=واليوم من ورده خلـي جـال ماكـا
اليـوم خلانـي وقـفـا وخــلاك=واخلاك واخـلا ورد مـاك وجباكـا
عد جفيت الطيّف الـروح واخـلاك=وانتـه عليـك الهـم منـول مداكـا
ياعـل همـال السحـاب يتـعـداك=شيءٍ يحي دونـك وشـيءٍ وراكـا
لالاك ماشـد اريـش العـيـن لالاك=لكـن حاديـه الضمـا مـن ضماكـا
وعساك تسقـى يـوم حنـا نزلنـاك=من جاهـزٍ خيـل عـلاك وسقاكـا
وعساك تمحل واصبح المزن لاسقاك=لالاك مـا صـار التفـرق لالاكــا
يا شوق ياللي عنـي البعـد ينحـاك=البعـد ينحانـي وعـنـي نحـاكـا
خليتنـي واقفيـت واقفـت رعايـاك=واقفت خطاي وعني اقفـت خطاكـا
خليتني عقبـك علـى حبـل الادراك=ابـا الحيـاه وطـامـع ٍ بالـدراكـا
اقفيـت مـا علمتنـي ويـش نيـاك=لا قـول شـح ولا تجبـز عطـاكـا
دايم علـى روهـاج حـي اتحـراك=لين أنسقم حالي وأنـا فـي حراكـا
لا أيّستبي وأيّس ولاأعرف حظايـاك=ولاقلت مطلوبك رخص فـي قداكـا
متى أحتري مدّك وجودك وعطـواك=وأنته عطـاك قريّـب ٍ مـن رداكـا
ياجادل ٍ وإن جيت اوصّفك وأقـداك=لاعبـج لاعريـان عـذب ٍ لمـاكـا
لاموز لاريحـان لاعـود مـن راك=لاتيـن لاتـفـاح لاعــود راكــا
لاخوخ لارمـان لاأعـرف حلايـاك=وإن كـان هـذي عايـزات ٍ حلاكـا
لاظيمـران وساقـي العيـن ياطـاك=وعليـك للفـي الظلـيـل انفـراكـا
يازين عطنـي حبـة مـن شفايـاك=لو مير ابا اخذ لـي عليـك ادعـاك
يـاذاك يالطـف الخواصيـر يـاذاك=والله ما اعلـم بـك ولا اقـول ذاكـا
من خـوف هـرجٍ يقتفينـي ويقفـاك=ابـا اتحصـن عـن قفـاي وقفاكـا
اقفيـت ماعلمتنـي ويــش نـيـاك=لا اقـول شـح ولا تجـود بعطاكـا
دايم علـى روهـاج قلبـي تحـراك=لين انسقم حالي وانـا فـي رجاكـا
لا ايست منـك ولا عرفنـا نوايـاك=ولا قلت مطلوبٍ رخص فـي فداكـا
ليتـك تعلمنـي بغيـبـك ومعـنـاك=لين اني اعرف ويش غيـب معناكـا
مدري تماري لي باالامـزاح منـاك=والا علـي مغـل مثـلـي عـلاكـا
عطني عطاك الله ومد الك واعطـاك=لاتقصـر المعـروف منـي الياكـا
ان جاز لي لاماك جالي بـلا مـاك=وان جزت عني جاز حالـي بلاكـا
والله مع اهل الجود مد الك واعطـاك=واقبـل ومـن غيـري تبـاه ويباكـا
ولاعنق ريمي الجوازي ليـا صـاك=ان شاف لـه ذيـره وزيلـه نصاكـا
ولا ضيمران وساقي العيـن ياطـاك=وعـلاه للفـي الظلـيـل انفـراكـا
ياعيسل ٍ من عالـي الوقـب مجنـاك=ولا كـل رقـاّيٍ ليـا جـا رقـاكـا
ولا محمل الشامـي ولا كنـه ايـاك=ولا انتـه بلامثلـه ولاهـو كمـاكـا
ولا من هل الغربي ولا التهم مربـاك=ولا من هل القعر الوتـوت الحكاكـا
الشرق مربى لـك ودارك ومشحـاك=دارك وديـرة حيـك اللـي ربـاكـا
مابي على قربك وهرجـك ولامـاك=لامـاك ياغـروٍ علـى مستـواكـا
لاماك لو نمشي واقـاري بلاأمـلاك=مافـي يدينـا الا عصـاي وعصاكـا
لاشك مـن دونـك حدونـي دنايـاك=دونـك حدونـي وابعدونـي ولاكـا
ان جيت ارودك يا اريش العين واباك=دونـك حدانـي واحـدٍ لـو أبـاكـا
يالله ياللـي كـل الامّـه تـرجـاك=ياللي جميع النـاس تطلـب رجاكـا
انـك تديـره يامـديـرٍ بـالافـلاك=يالله يالـلـي لا الـــه إلاكـــا
يارب دعـوة مسخـرٍ منـك وليـاك=يبيك تطلـق لـه هـذا مـن هذاكـا
اطلق شبك من منشبه عسر الاشبـاك=يـا الله يامطلـق جـويـد الشبـاكـا
من منشبه عسر الشبك كيف ينحـاك=ينحـاك لـو مايحسبـنـه يحـاكـا
يارب يوم اطلبك وأجهلـك وانخـاك=انـك لتقبـل دعـوة اللـي نخـاكـا
كان اني امشي في مطوعتك وارضاك=ولا أذ ّي ولا استاذي واعاين رضاكا
واهوه مواذيني وحتى انت يعصـاك=ملعونٍ ويـواذي العـرب ويعصاكـا
انك تحتـه مـن لزايمـك واعـراك=يـارب حتـه مـن لزايـم عـراكـا
وانـك تجيـه بحيتـن مـن حيايـاك=والا تجيـه بمـرودٍ مـن سمـاكـا
ولاباق ٍ الا ّ ألم لي جمـع وأنصـاك=صبـح ٍ ليـا جـا للعيـار انسراكـا
حديتني عنهم عسـى البيـن يحـداك=عن شـف بالـي لا رحـم والداكـا
ويومني انخـا الله يضـرك بدنيـاك=ابـا عسـاه يفكنـي مــن غثـاكـا
لاشك قلبي مجحـرٍ منـك واشـاك=لاشـاك فـي حـالٍ وحـالٍ اشاكـا
لا شاك في حالٍ وفي حـال شكـاك=شـكٍ بــد حويرثـيـن حشـاكـا
وياقلب يوم انصحك واعذلك وانهـاك=عييـت تقبـل دعـوة اللـي دعاكـا
اقـول تبـعـك للغنـاديـر عـنـاك=عنـاك ياقلـب العنـا مـن عنـاكـا
يلعب بك اطراق الهوى ليـن غـواك=واليـوم ميـز رشدكـا مـن غواكـا
لاعاد تعناني وانا عـاد مـا اعنـاك=مـن يـوم منحـلاً عليهـم رواكـا
ما احلاك يا قافن على ياك ما احلاك=انصح بـك اللـي باللحـون انتقاكـا
يلعب بك الشاعر علـى قـد معنـاك=وعلى سنـع معنـاك يطـرح بناكـا
ستيـن بيـتٍ كلهنـه علـى يــاك=يازيـن ترتيبـي علـى قـاف ياكـا

وهذه قصيدة الشاعر: حمود بن زايد العيه الدلبحي مجاراة لقصيدة
الشاعرالكبير عبد المعين الثعلي

ياقلـب دوبـك والقوافـي تـحـداك=دوبك ولابه قـاف" يصعـب علاكـا
عبد المعين اللي بيوتـه علـى يـاك=قافـه لذيـذ وذقـت منـه الهلاكـا
ياقـاف لـو انـك بسـوق" جلبنـاك=كل"يبـا قـربـك وكــل" يبـاكـا
وياعدّ لـو انـك مخيـف" وردنـاك=ولا قيـل جانـا فاللـزوم ارتبـاكـا
وياقلـب مـاوالله بيـوم" عصينـاك=اعطيـك ماتطلـب وجالـك منـاكـا
ابحث عن المطلوب وادوّر رضـاك=ورضاك عند اللي سطع فـي سماكـا
ماضنتـي ياقلـب خلـك بينـسـاك=ارسلـه المكتـوب مـع ذا وذاكــا
ارسـل مراسيلـك وعبّـر بدعـواك=وقله تـرى المرسـل يتلـه هواكـا
وقله ترى خلك وصـل حـد الادراك=ماأقساك في خلك وماصعب جزاكـا
وضّح تواصيفـه وسـرّك لـذولاك=بالخافـي المقصـود واللـي دعاكـا
يازيـن مايـنـلام قـلـب" تمـنـاك=فـي ذمتـي يازيـن ماكثـر حلاكـا
لو اقدر الهجـران مثلـك هجرنـاك=ارفق على خلـك وش اللـي دهاكـا
كن القمر خمسة عشر فـي محيـاك=واسود سـواد الليـل ناعـم غطاكـا
وكن العسل يازين يصنع مـن شفـاك=وعـروق قلبي(موتت)مـن ظمـاكـا
وعينك وعين اللي على الوكر بشباك=وردف" شلع بالثـوب نابـي وراكـا
سبحان منهو ياأريش العيـن سـواك=وياسعد من يرعـاك واللـي رباكـا
وجدي على قربك ووجـدي بلامـاك=ووجدي على ماكون داخـل حماكـا
وصدر" كما التفاح(لارحـم مجنـاك)=وأنعـم مـن الديبـاج لمسـة يداكـا
ولجلك نظمت القـاف كلـه لعينـاك=واكثر طعون القلـب همسـة نباكـا
لو اكثر التوصيـف تتعـب مزايـاك=ولاحد" دخـل بيـن الحنايـا سواكـا
يارود،ياريحـان،يـامـسـك،يـاراك=وجدي على ماقضي حياتـي معاكـا
يادر،يايـاقـوت،يـالـول،مـغـلاك=كـل الجواهـر ماتجـي مستـواكـا
نصف الجمال اللـي يذكّـر تغشـاك=والنصف الاخر في مواطي خطاكـا
يمنـاي تشفـق يالصغيـر ليمـنـاك=(والبرد اكلني طامـع" فـي دفاكـا)
جعل العذارى ياغصن مـوز تفـداك=(واستثنـي امـي والبقايـا فـداكـا)
ياقـل جنسـك فالجزيـرة وحليـاك=عذبتنـي يازيـن ماكثـر سحـاكـا
ياعنـق ريمـي" ولحـد" تـحـلاك=من خلقتـك محـد" تجـرى يراكـا
ولاآمرك في وصلك عليّه ولاانهـاك=كان الحنيـن اللـي وطانـي وطاكـا
مالك حلي فالشـام وديـار الاتـراك=والغرب كله ليـا ضواحـي سكاكـا
انته ربيـت (بنجـد) ياحـي مربـاك=خشف" ربى في (نجد) وارض الدكاكا
جعل العذول اللي علـى البعـد وداك=اللـي قلـع يازيـن عنـي مـداكـا
اللي سعى لاجـل القطيعـه بفرقـاك=واللـي علـى ماقيـل عنـي نهاكـا
منـا عليـه تصـك بقعـا ومـنـاك=تذرف عيونـه طـول وقتـه تباكـا
حتى ليـا منـي نشدتـه وش ابكـاك=تذرفـه عيونـه دم حمـر وعساكـا

وسلامتكم

التوقيع

[عيدالعتيبي]

شكراً لك اخي الكريم(( ابن نعيس )) على هذا المجهودالرايع الغيرمستغرب منك وبيض الله وجهك وصح لسانك ولسان شعارنا**


[line]


صدقني لم يمرعلي مثل هالقصايد وهذا سر بحثي عنها وسؤالي عنها كذالك

هذارايي ومدري عن راي الاعضاء الاخرين وخاصتن ***


بن نعيس // وترى الهديه مقبوله الله يعطيك العافيه

[((الدلبحي))]

ابن نعيس

صح السانك والسان عبدالمعين والسان الدلبحي

هذا ماتعودناه منك دايم ان تاتي بالجزل والمفيد

تحياااااااااااااااااااااااااااااااتي

[ابـن نـعـيـس]

عيد العتيبي

صح بدنك والله يبيض وجهك

وماسوينا الا الواجب

اما عن القصيده فاكلمه رائعه وجزله لا توفيها حقها
وانما هذا يدل على قوه الشاعرين


مشكووور على مرووورك الكريم والرائع


تحياااااااااااااااااااتي

[ابـن نـعـيـس]

الدلبحي

صح بدنك ويعطيك العافيه

مشكوووور على تواصلك الدائم والمميز


تحياااااااااااااااااااتي

[فيصل المسعودي]

صح لسان ابن ثعلي


ولسان الدلبحي


عودتنا على نقل


المشاركات المتميزه والمميزه


تحياتي ياغالي

[ابـن نـعـيـس]

فيصل المسعودي


الله يسلمك


مشكووور على تواصلك الدائم


تحياااااااااااااااااااااااااتي

[محمد العتيبي]

ابن نعيس

الله الله الله الله الله يبيض وجهك
ماتجيب غير الثمين .
صح لسانك وصح لسان بن ثعلي
والدلبحي .

التوقيع

للتواصل عبر twitter تويتر al_bargawy@

[ابـن نـعـيـس]

ابومشعاب


صح بدنك والله يبيض وجهك


مشكووور على تواصلك الدائم


تحياااااااااااااااااااااااااتي

[ابن سهاج]

لاهنت يابن نعيس

وقصيدة ابو زايد هذي قد نزلتها قبل سنتين تقريبا هنا في منتدى الهيلا واشكرك

على التذكير بها مره اخرى

اما صاحب القصيده حمود زايد العيه الدلبحي فشهادتي مجروحه في ابو زايد وتكفي شهادة

ابو جميل له في احد الامسيات اللتي احياها مشاركه مع رشيد الزلامي ومرير الحبيل وملفي المورقي

وكما اعلم بأن له شريط صوتي يحتوي عدد من قصائده سجلها عام 1424 هـ

وان شاء الله كان الله قدرني علاه جبته الكم هنا براسه واذانيه فهو شاعر اضافه

لمنتدى الهيلاء وأعضاه