مجاراة الشاعر متعب بن سعود بن مقحم العضياني للشاعر الكبير عبدالله بن عون

[وديع الركاب]

السلام عليكم ورحمة الله وبركاته
هذه القصيدة مجاراة من الشاعر / متعب بن سعود بن مقحم العضياني
للشاعر الكبير/ عبدالله بن نايف بن عون

الشاعر عبدالله بن عون

ماتفرج ضيقة حبلها عقده جويد
لين اشيل الصوت واخذ على الجيب نهوه

في سنع بدو بعد قربهم راحو بعيد
دونهم للجيب روحة ومسراء وضحوه

لا جزا الله خير راع المشورة بالشديد
ولا العسوس اللي عطوهم خبر صيف فحوه

ودي اتعب في سنعهم على صاف الحديد
لو ماحصل عندهم غير فنجال قهوه

وشوفة اللي حط له فالحشا رف فريد
وحط له فالرف عش تقل عش صعوه

ان حكا لي عيد وان مد لي يمناه عيد
يوخذ الفنجال منها على غير شهوه

والهوى المعتاد راعيه لو مايستفيد
غير شوف اللي يريده لقا فيه لهوه

ولا يواخذ لو نقص فالكلام ولو يزيد
ولا يعاتب لو يجي فيه سجة وسهوه


مجاراة الشاعر متعب بن سعود العضياني

هيض العين المشقاة قاف من القصيد
قاف من قافه يجيبه حلاوة ورهوه

ابو نايف مثل هداج وصفه بتحديد
لا غدا للبوش فالقيض حنه ورغوه

لو ابو نايف من الدر ماخلى شريد
صرت احايل هاجس الشعر وانخاه نخوه

من لفى بالعلم للبدو مارايه رشيد
ماكسب من جيبته للخبر غير دعوه

فرقت شمل المحبين بدو ماتهيد
صار مابين المواليف فرجه ونحوه

من هوى باله مع البدو يبشر بالنكيد
لا يبي لحدن نصيحه ولا فيه صغوه

نجع بدو كل يوم لهم راي جديد
المصيف من المريبخ لبيشه لبدوه

والربيع اليا انتثر وبل حنان الرعيد
شرقي الحد الشمالي ليا جال زهوه