وجدي وجود اللي وطت رجله الـداب ... وطـى وهـو غافـلٍ مـا درابــه - الهيـــــــــــــلا *** منتدى قبيلة عتيبة

حمود غنام المرزوقي · 19-Jun-2008, 08:28 AM

وجدي وجود اللي وطت رجله الـداب = وطـى وهـو غافـل(ن) مـا درابــه
ولا درى إلا حين ما عضـه النـاب = وعرف يقين انـه تعلـوق صوابـه
بأرضٍ خلا مـا فيـه للنـار شبـاب = والوقـت ليـل وفـي ديـار(ن) مهابـه
في وسط غابات محيطٍ بـه هضـاب = ياقف شعررأس الغريـب ان وطابـه
في موقعٍ تسكن به وحـوش وذئـاب = دائـم تلـقـف للطـراقـي ذئـابـه
وفي ظرف ساعة حضرت عنده أسراب = نصف يهاب ونصـف عيـا يهابـه
قام يتحامـى دون نفسـه بمشعـاب = هو راس ماله يـوم طاحـت ركابـه
ياخذ بهـا مـرواس ويـرد للغـاب = وإذا رجـع قامت تزيـد اقتـرابـه
يخفي صوابه كـن ماهـو بمنصـاب = يطرد عصابه ويعـدي بـه عصابـه
جاءه اسحمٍاً في مخلبه سم الإعطـاب = مسرح(ن) دم الفرائـس شـرابه
اقبل بعين(ن) كنهـا رأس مشهـاب = والموت محمـول(ن) علـى رأس نابـه
هفه بعضه واثـرت فيـه وانصـاب = وجـات البقيـة للفريسـة تـلابـه
تقاطعـوه سبـاع بقعـا بالأنـيـاب = واللي بقى جـاءه الأخيـر وسرابـه
واصبـح بقايـا دم وحـذاه وثيـاب = وعمامـةٍ كانـت لرجلـه عصـابـه
على التي لو واحـدٍ غيرهـا غـاب = يمكن اسلـي خاطـري فـي غيابـه
العمر عند مكـون الكـون بحسـاب = المـوت واحـد والمصايـب تشابـه
الموت مـا خـلا طويليـن الاشنـاب = وكم واحـدٍ يقبـض بزهرة شبابـه
لكن سهم أفراقها في الحشـا صـاب = سيطر على كل الخفوق وسطـى بـه
حاولت اطيب خاطري بس مـا طـاب = جرح(ن) يطيب وجرح مالـه طبابـه
حزني عليها جاب لي هم وأعصـاب = وهليت دمـع مثـل وبـل السحابـه
على صديقة عمري أعـز الاقـراب = أمـي عسـى ربـي شملهـا ثوابـه
يا الله يا حاكـم تصاريـف الاسبـاب = انت الذي دائـم وسيـع(ن) جنابـه
ربي رحيم ليا دعي باسمه أجـاب = ادعيـك يـارب وعليـك الإجـابـه
تكتب لها الرحمة وتفتح لهـا البـاب = في جنـة الفـردوس مـع الصحابـه

حمود غنام المرزوقي

محمد العتيبي · 19-Jun-2008, 09:06 AM

الله يرحمها ويغفر لها ويرحم اموات المسلمين
حمودالمرزوقي

قصيده لم اتمكن من التعبير عن جمالها
وقوتها ..

ولكن صح لسانك على هذه الوافيه ..
تحيتي وتقديري..
...

التوقيع

للتواصل عبر twitter تويتر

al_bargawy@

مرزوق حمدان العتيبي · 19-Jun-2008, 10:56 AM

..
.
صح لسانك على الجزاله يالمرزوقي
...

التوقيع

@Marzouq_MHD

بندر المرشدي · 19-Jun-2008, 12:13 PM

الله يرحمها ويسكنها فسيح جناته

وصح لساااااانك

التوقيع

::

ديواني من إعداد الزميل/ عمر الدغيلبي ... بيض الله وجهه

فيصل المسعودي · 19-Jun-2008, 08:44 PM

الله يرحمها ويسكنها الجنه

ويغفر لها جميع ذنوبها ويطهرها منها كما يطهرالثوب الأبيض من الدنس

صح لسانك يالمرزوقي

تحياتي

حمود غنام المرزوقي · 20-Jun-2008, 12:52 PM

اقتباس:

المشاركة الأصلية كتبت بواسطة ابومشعاب

الله يرحمها ويغفر لها ويرحم اموات المسلمين
حمودالمرزوقي

قصيده لم اتمكن من التعبير عن جمالها
وقوتها ..

ولكن صح لسانك على هذه الوافيه ..
تحيتي وتقديري..
...

أبو مشعاب مرورك يسعدني ويشرفني

عساك في الوجود أخوي دام تواصلك..لاهنت