قصيدة للشاعر / بليهيد بن مفرج بن بليهيد بن رسام العتيبي
................................................
لا تزعجوني ترى الاركان مختلة =لا تكثرون السوالف صفونا يخرب
قالوا تعلل وقلت بداخلي علة =مدري من أيات نوعٍ نوعها يقرب
تشخيصها لاعرضوا عن المرض كله =اقول فيها من اعراض المرض مضرب
وباقي المضارب على الستة لها ادلة =السبع الاسباب حول وداخلي تدرب
يفوح صدري كما تفويحة الدلة =عمالها صايمٍ متحري المغرب
فاحت وركد بها حدريها ملة =وقف يطالع متى شمس العصر تغرب
وناداه شرواكم وشروى ابو عبد الله =على فطور وعشا وسوالفٍ تطرب
ونحاسته جنب جمر ارطا ما هو جلة =الهيل من كثر ما فاحت غدى حثرب
اجتاحني شي خلا النفس منشلة =كالموت ما عنه لا مزبن ولا مهرب
في داخلي دولةٍ لا شك محتلة =فيها فدائي ومتفرج ومستغرب
فرحي حجز حجز مأجوجٍ وقومٍ له =وبعض البشر بالفرح تطفح كما مأرب
برنامجي ما يعدل وضعه وحله =الا يعدل ظلال معكف العقرب
أو هي تعدل طبايع خاين الملة =والاصل والجار والملحة مع المشرب
ياللي بأمره جعل هجرة رسول الله =من أم القرى هجرته حتى وصل يثرب
يا جعل منهم سبايب علتي يالله =يجري عليهم مكرر ما جرى يارب
جعل الحسد بينهم والحقد والغلة =وهموم صهيون من يعرب ومستعرب
من الفقر والجبن والبخل مع الذلة =اربع علل وسطهم تسري كما الكهرب
يجمعهم الله مثل جمعة هل الضلة =لفرقى أيادي سبأ يشجب بن يعرب
أعطفهم اللي نسى والدينه وخله =واللي سليمٍ بهم أجرب من الاجرب
عجز القصيدة شكى للصدر من قلة =والا لسوي كما مثلثة قطرب
غريب الألفاظ/
* أبو عبد الله: الشاعر ذيب بقان الصقري
* مأرب: سد مأرب
* هل الظلة: قوم شعيب الذين أخذهم عذاب يوم الظلة
* فرقا أيادي سبأ: تفرق أبناء سبأ (مضرب مثل للفرقة)
* مثلثة قطرب: منظومة شعرية غريبة عجيبة
« آخـــر الـــمـــشـــاركــــات »
02-Jun-2007, 09:49 PM
يفوح صدري كما تفويحة الدلّه (بليهد العتيبي )
العرض الشجري