(( متيه الشعل ))

[بدر غالي الصوينع]

هذه قصيده مهداه لسعادة الفريق / سعد بن سالم الوسيمر القثامي
من الشاعر / غالي بن شباب الصوينع

بعنوان (( متيه الشعل ))

ياهل الشعل باقف واغني وامـاري = يوم الوسيمر حـط شعـلٍ مزاييـن
من عقب اخذ شفه بصيد الحبـاري = وصيد القطى ومصوفرات الكراوين
وقنص الظبى ووعولها بالبـراري = والقنص ولعه للرجـال الحشيميـن
حط البكار اللي تجوب الصحـاري = وترعى القفر قدام طرش البداويـن
فج النحـور ووافيـات السمـاري = عراض الكتوف جنوبها تجي مترين
سند الغوارب والرقـاب العـواري = والوجه ظافي خد والمشرب الزيـن
وعرنونها يشدي عكوف الشبـاري = من حد مشربها الى مقـرن العيـن
خرع الآذان معكرشـات الوبـاري = هزع الظهور اذيالها وقم شبريـن
قطم الفخـوذ مبرمـه كالسـواري = ركبه عراقيبٍ تشـوق البخيصيـن
شعلٍ جـلات الوانهـا فالمـواري = مثل الذهـب ماقيمـوه الغشيميـن
وعيونها جمـرٍ حـداد الخـزاري = اليا من ابو بندر نهمها بصوتيـن
جتله كما طابور عسكـر طـواري = الله يكافيهـا عيـون الحسوديـن
مادربوهـا بالعصـي والـبـواري = والبل تقول البدو معهـا شياطيـن
من ولفها لو عرضوهـا الكبـاري = صكت على القعده من يسار ويمين
ومن شاف طبع الشعل كب الحماري = ثـم وقعولـك يالقثامـي مقرييـن
ربـعٍ تبـدل بالعنـاد الـهـذاري = وعافوا رعاياهم على فعلها الشيـن
واسمك تراه متيـه الشعـل داري = من يوم جبت فحولهـا بالملاييـن
ولو منت صيرومٍ وصاطي وضاري = ما قمت تنقى في خيـار البعاريـن
كنك غزيت واخذت كسبك جبـاري = وسقت الحمر مثل الرجال الشجيعين
وهذي عوايـد طيبيـن الشـواري = وعندي على ما قلت ثبت وبراهين
في فكت البـل فالنهـار المثـاري = وفي ذبحت الحايل ولطم المعاديـن
ولا نيب قايل قـول ثـم امتـواري = ربعي عتيبـه ملحقيـن المخليـن
ولا نيب لبـاس لثـوب العـواري = ولا دور شهودي ضعوف ومساكين
ولانيـب نقـادٍ ولا نـيـب زاري = وكـل القبايـل فالمواقـف قوييـن
وختامها عـدة هبـوب الـذواري = صلوا على اللي ثبت الحق والديـن