هذي قصيدة الشاعر / علي بن ربح السبيعي مجاراه لقصيدة الشاعر الكبير/ غازي بن دخيل الله بن عون
اتتني كهديه من ابو خالد ربح السبيعي وحبيت اطلعكم عليها
ياهل فريد النوع من صنع الالمان= احدث موديل البنز تسعه وتسعين
ومن الرياض العاصمه قبل الاذّان= للفجر وانتم للسفر مستعدين
ناوين بالمشوار من حي الاسكان= من شرق لا قد أيسر الغرب الادنين
بعد الفطور اخذوا من البن تقنان= بريةٍ تجلا عمس كل عمسين
وتريضوا بكتب من الشعر قيفان= ان كان لي مع كلمة الحق تمكين
لين اني أقطف من ثمر كل بستان= من يانع الرمان والخوخ والتين
أهيم لا دوجت في خضر الاغصان= واثمارهن فيها من العين تلوين
بأثمارهن عندي تخالفت الالوان= لكن وين اللي شمل وصفها الزين
ما كل ما يكتب من الشعر وجدان= والاّ خواطر فيض ناسٍ غريبين
اللي قصائدهم سواليف بزران= واطيبهم اللي للصحافه قريبين
ناسٍ تقول الشعر نثري وعمدان= منهم فطاحلت القصيد متبرين
الشعر يعرف بالقوفي والاوزان= وتطرقه لآغراض شتى الميادين
وانا تراني كنت في بعض الاحيان= أهيم في وادي قلوبٍ مساجين
يشوقني عن بعد تفاح لبنان= واثر الكلام أحلام ليلى ونسرين
للي نواياهم لوايا وجحران= مثل مواثيق اليهود لفلسطين
لمّا عرفت اني بما قلت غلطان= أحرفتها لمراسلة كل ذربين
لا شفت شامخ قمةٍ في النبا بان= وسمت له شقحاً عليها العمودين
ورسالتي مضمونها سرّ واعلان= مهيب لا رئيا ولا حدني بين
أمانة التوديع من قلب ولسان= وآنتم على حفظ الأمانه حريصين
مني لغازي خصّ تقدير صفطان= واظن ما تبغون فيها موصين
فيها الثنا ما هل همال الامزان= واعداد ما صلوا جموع المصلين
وليا حملتوها وجالقصر دسمان= على يمين الخط وانتم منحين
طريقكم يمر مزعل ونديان= وشوي وأنتم للمويه متعدين
لفوا لوادٍ بين حضن ورايان= يسقي ثلوم العرق من بين عرقين
وألفوا لغازي طيب الذكر من شان= تحظون بالتقدير وانتم حظيظين
ترحيب واستقبال من طير حوران= غالي وجوه الرسل من ناس غالين
يعبا لكم من صافي البن خولان= واكيد ما تمشون غير متعشين
في مجلسٍ بانيه في البني تعبان= بالحهد والاموال وقت البنا لين
خلاه كنه مجلسٍ عند سلطان= والا مضوف لشعب الالمان والصين
غازي لون الشعر يشراء بالاثمان= شعره مع أهل العرف يسواء ملايئن
والاّ كثير الناس لو قيل فهمان= صوغ الجواهر ما يسومه بقرشين
الله جعل خلقه تشابه بالابدان= وبالعرف والتمييز غير امتساوين
وللي كتب فينا من الشعر ديوان= رد المثل بالمدح في عاتقي دين
لو كان ما ياخذ مكاسيب ديان= ولهوب يطلب رؤس الاموال تقنين
ملزوم نجزاء راع الاحسان بحسان= الاّ اذا كنا عن الرد مزرين
غازي على مدحه من العام شفقان= ويا دوب حانت فرصة المدح ذالحين
ولاني باضيع فرصة الوقت لا حان= لكن حملٍ ما شيله بليهين
لمّا برك لمزوبع الحمل زومان= جتني تمهد للمشاريع تدشين
منها تحركت المشاعر والاشجان= لين اتسع نضيق هرمز بقزوين
في مدح محمود السجايا والادغان= جزر القمر صارت على خط برلين
فرز الوغاء لرسالة العدل ميزان= من روس روسانٍ على الجود ناشين
ولا سميوا من بدة الناس روسان= غير انهم في حزة الضيق راسين
راسين في الهيجاء ومن رؤس عتبان= اشاوزٍ حرزٍ زحولٍ دنادين
ذباحة الحايل كريمين وذهان= لطامة العايل كعام المعادين
كانت منازلهم شمنصير واشنان= وفي كشب وعشيره وركبه مرزين
يحدهم من يمة الغرب ريعان= ومن اتجاه الشرق غير محدودين
ما حدهم من يمة الشرق قطعان= جواً افجوجه للمعارك ميادين
جنوبهم وادي سدسره ورضوان= وادي سعد والخنفريه مقاطين
ومن الشمال حدودهم وادي ابطان= بالوصف لو ما شفت ذيك الاباطين
لو شفتها كان اظبط الوصف باتقان= لكن من نقل الثقه والبخيصين
جتهم تباشير الحيا شرق بسيان= وتحدروا للرجع بالطرش والظين
ولا قوم بن هادي وقوم بن هدلان= في قلب نجد أوطانهم مستقرين
ما زارهم من سابق العهد قومان= حتى بسالف معركة بدر وحنين
قالوا وجوب الاذن من شيخ قحطان= في متبع سلم العرب والقوانين
تقدم بن حميد بالراي قنعان= يقود جمعٍ بالمواثيق مرهين
جاهم يجر الجوخ يطلب استئذان= سلم وكلمهم وسمع النبا الشين
ساعة مشا من ربعة البيت زعلان= للجوخ مرتفعٍ عن الارض شبرين
قال الشوير اللي على الشيخ شرهان= يا ويلكم من سلطته يالسلاطين
رجع لربعه قال ما فيه مزبان= واصحابكم بعقولكم مستخفين
اما تجي بالشلف وبحد شامان= والاّ فلا نبقا على لارض حيين
دارة فنون الحرب من بين الاخوان= واقفت جموع اصحاب الارض مهزومين
قسمٍ نزح يم السليل ونجران= وقسمٍ تنحا يمة الجله والرين
لو كان ما في صف الاجواد شردان= ابطال نجد مرجحين الموازين
للجود كياله وللخيل فرسان= بالطيب مشهودٍ لكل الفريقين
وكل العرب قحطان مع نسل عدنان= ما في قبايل نجد ناسٍ رديين
وقبيلة عتيبه بهذيك الامكان= السابقه واللي لها مستحلين
منها القراره والدفينه ومران= والمردمه وغثاه ووضاخ وقرين
والنير والعبله وسجا وكبشان= ومنها نفي وخف دار الرباعين
والسر ورغبا ويمة حويتان= والاسربه والسلع والاطوليين
هرمول وسويقه وطخفه وعمران= عروا ومبهل والمخامر وفرقين
جهام والسرحي وغربي خريمان= والجمش والقرنه بذيك الاماكين
أوصافها ما جبتها خبط عشوان= ما نكتب الاّ للصواب متحرين
وختامها ما روجع الورق بالحان= صلوا على طَاها رسول الثقلين
[/QUOTE]
25-Jan-2008, 02:19 PM
اخترت لكم
العرض العادي
