الشاعرالفارس فراج التويجر - الهيـــــــــــــلا *** منتدى قبيلة عتيبة

هداج المخامر · 31-Dec-2007, 02:09 AM

منقول من منتدى العضيان--------------------------------------------------------------------------------

قال عنه منديل الفهيد الأسعدي في كتاب من آدابنا الشعبيه ص 1/157

(هو فراج بن فلاح التويجر الدماسي من العضيان من الروقه وشاعر كبير

حظر معركه بين مطير وعتيبه على الشيخ محمد البراق ومن معه من

ذوي ثبيت)

وسجل قصيده في تلك المعركه سأوردها لاحقاً

فراج التويجر الدماسي العضياني من فرسان العضيان ومن مشاهيرهم

وشاعر القبيله في وقته بل كان الناطق بأسم عتيبه في عصره وسجل أ

غلب المعارك وأرخها بقصائده التي يستشهد بها الرواه في وقتنا الحاضر.

كان من اشجع رجال العضيان وحظر معركة ابرقيه الشهيره وفعل في

ذالك اليوم وذكره سلطان التهامي حينما تطرق للفرسان الذين برزو في

ذالك اليوم

يقول التهامي

ونهمهم ضاوي الخمري بحس يفرح النشطانوفـراج التويجـر ردهـا للـي

متليـنـا

ولعل هذا الشطر هو خير شاهد للرجل وشجاعته واما ضاوي الخمري
ا
لمذكور فالشطر الأول هو الفارس ضاوي الخمري البيشي احد ابرز

فرسان العضيان

فراج التويجر اراد من ابن هندي فرسً اصيله وقصد أمير عتيبه وابو عتيبه

الأمير محمد بن هندي ومدحه في قصيدةً يذكر فيها بعض من فعول

داهية عتيبه.

يقول فراج التويجر فالقصيده التي قصد بها الأمير محمد بن هندي

قـال العضيانـي تمثـل وغـنـا****مثايلن من خاطـره واهتنـا بهـا

ماهـو بشاريهـا ولا مستعيرهـا****مصـدارهـا عــن غيـابـهـا

خـوف يلزمهـا فقـيـه ينـقـد****ياخذ مصالحهـا وينطـل خرابهـا

ياراكـب مـن عندنـا صيعريـه ****سديـس والا تـو ماشـق نابهـا

مسراحها من روق من خشم عسعس**كل يشوفه صبح يوم التـوى بهـا

ملفاك بن هندي منا هاشـل الخـلا***عيد النكيف اللي تضالـع ركابهـا

تلقون ثاية كنهـا واكـف النـدى****من مس الايدي عقب لوخ العشابها

خيال بـوش يـوم لحقـوه شمـر*****هل المهار اللـي تلاعـج ثيابهـا

يوم اوحت الشرفا بحس ابن هنـدي***تباشـرت بشرفـه بفكـة رقابهـا

والخيل يوم اوحت صياحه وعزوته****تقلعـت مـن كـل فـج اطنابهـا

وابن طوالـه نـار قـدام ربعـه*****وابنه ذبيح وذبحتـه مـا درا بهـا

لاكـن قلـع الخيـل بينـه وبينـا****زمـول فرقانـن موطـاً زهابهـا

ذوي حميد الهم على الخيـل ذار****بغز القديمي لآن يـروى نصابهـا

والثانيـه نـثـران دم المـعـادي *****برديني بالجوف غمـق صوابهـا

ياشوق عـذرا كنهـا قايـد المهـا*****والبـدر كنـه ناقـع فـي لبابهـا

يابنت من يضرب بشلفـا طويلـه****لازرفلت والطرح جا في زهابهـا

قصدتها فيها علـى شـان ابوهـا****ابا اتمثل فيـه لـو مـادرى بهـا

يا الشيخ ابو سلطان ابالي اصيلـه****يازينها وان كان ربي نـوى بهـا

انا بلايه من شبيـب بـن حجنـه****يوم ان طاحس راح يمـه وجابهـا

والشوخ يمك دوب تنقـل حزاتهـا****مثل الحناشل يـوم تنقـل جرابهـا

وانته حبالك باع من فـوق حبله***ـمومن ورد دلوه في حبالك سقى بها

وانته تشيل حمول مـن لايشيلهـا***شال الحمول الكايدات ومشى بهـا

(القصيده حصريه لهذا المنتدى ارجو ممن ينقلها يذكر المصدر لأنها

مجمعه من الرواه على بيتين وثلاث ومتعوب عليها)

انا بلايه من شبيب بن حجنه=يوم ان طاحس راح يمه وجابها

هاذين البيتين اوردها القداح في كتابه ونقلها عن الراوي محمد بن حصيان

وطاحس المذكور هو طاحس بن مشنوطه احد ابرز رجال العضيان في

وقته غفر الله له،،

كان للشاعرنا فراج التويجر حظور فالقبيله كما ذكرت وانه الناطق

الرسمي بأسم العضيان

وهناك قصه جرت على قبيلة العضيان على وقت الأمير مارق بن صنيتان

الضيط ومختصرها ، أنه هناك قصيرً للعضيان اخذ حلاله وجاء سيتفزع

بالعضيان وردو أبله العضيان بعد ان كادت تقوم معركه بين العضيان

و(أحدى قبائل عتيبه)!!

يقول فراج التويجر الدماسي

قصيرنا لوهو ورى بندر الحاج***ةةغصباً عليكم ياعور عين تديه

لو سالفه عن سالف البدو منعاج***يدعى ورفاع النظر مثل مرخيه

وأن لاح براقً من الوسم لعاج***قطعاننا قامت تخوض خباريه

في رأي اميراً للمجاويخ زعاج****مزحم رعايله وطلحه تراعيـه

وهو يقصد الأمير مارق الضيط في البيت الأخير

وتعتبر ابيات التويجر هذه حفظً للهذه القصه التي لولا ابيات التويجر يمكن

ان تذهب مع الزمن،،،،

فراج التويجر كان معاصراً لوقت صنيتان الضيط ومعاصرً في آخر عمره

وقت مارق الضيط

يقول في معركة (بدن) وهو جبل مشهور وقعة بجانبه الغاره وكانت احدى

المعارك التي حفظها ايضاً بأبياته

المعركه كانت بين المزاحمه على صنيتان الضيط والسقايين من مطير

وبرز في تلك المعركه الفارس بالود بن ناصر بن شالح الضيط والفارس

مدوخ بن تنيبيك وفاضي الوهاب

يقول فراج وهو يتحدث عن بعض تفاصيل المعركه

ياذيب ياللي في بـدن تقنـب قنيـب***دونك على العوني تجدد لـك مـراح

غالب و طالب دوك في حرف الشعيب***في معلـج خيـل ٍتـزارق بالرمـاح

ذباحهـم شيـخً لنـا نـاشً بطيـب***يروي السنان ومن وراه الجب طـاح

بالود يلعبهـم كمـا لعـب الغريـب***من فوق قبـاً كنهـا ضبـي البـراح

وزيد ابن سحلـي يشيلونـه صويـب***عليه علـو شـه تغثـري بالصيـاح

وزيد بن سحلي صوب في تلك المعركه والذي صوبه هو الفارس المشهور

مدوخ بن تنيبيك

أيضاً تمثل الشاعر فراج التويجر الدماسي مخاطبً احد فرسان الروقه المشهورين

يا.........ما انت بضدنالو كان باليمنـى طليـق

ذود المعـلـج حـدنـاولا نعتذر دون الرفيـق

وهذه الابيات جاءت عندما اخذ ذود كريون المعلج المرشدي وجاء يستفزع

بالأمير مارق الضيط وفزعله وردله ابله

وسجلها فراج التويجر بهذه الحداه،،،،

وأما قصيدة الأخرى وهي من اشهر قصائده التي سجلها لحفظ التاريخ

وقد ذكرها

ابو عبدالرحمن بن عقيل في كتابه ص 182/ و3/215

وهذه القصيده قالها بعد الوقعه التي حصلت بن مطير وجز من عتيبه

على الشيخ محمد البراق من ذوي ثبيت ومن فرسان الروقه المشهورين

ياراكب حمرا تهوش المضاريس***ماساقها الجمال واوجر ضهرهـا

حمرا قفاها كنها من قفـا الفيـس***وعيونها جمر الغضا من صطرها

مسراحها من غال حل الغطاليـس***والعصر وادي الدعيكـه قهرهـا

حرم طعام معشيـه بالحماريـس***لاهبت النكبا وصالـف مطرهـا

جزافه الدنا علـى غيـر تقييـس***ما حسبوا صرفاتها من خسرهـا

جانا ولد سالـم بيـد المناطيـس***بنمرا يشادي الديدحانـي شهرهـا

قدمه ولد هادي مروي المناسيـس***باولاد روق مغدرة مـن نحرهـا

هضاب غال مشمرخات الاراويس***من الجنايـز ضايقـات حفرهـا

الماطلـي والمارتـي والمقاييـس***والريفل اللي سوها فـى قطرهـا

ما فرجت له يوم جنـه كراديـس***من طب للمرمى يضيع نظرهـا

ريع السليل مثل باب المحابيـس***بريه عقب الزوم ربـي حشرهـا

والرجل مالت من مجاني القرانيس***والخيل عند حليس حـول نبرهـا

كماقال ايضا في الامير مارق الضيط وعليثه الوهاب ومحمد الشغار ومزيد

بن صعب

البيض فال مزيد والامير*** وعليثه اللي فلقا زادي

ومحمد اللي مايعرف ينير*** مريح الوندا للاسنادي

ابن صعب مروي الكعم والضير*** على الخطا ولا على الكادي

وله قصيده في امير الدغالبه من عتيبه وهو الشيخ خزام المهري

والقصيده لم اجد منها الا هذه الأبيات

يانجـد ويـن محيليـن الثنيـه***ومنزحة عن نجد دقلات الأجناب

هذي محل اضويهم تقـل حيـه***مثل الخدور اللي تبنى بالاسلاب

اقفابهم ياخـزام ضيـق عليـه***واقبالهم يفتح على قلبي ابـواب

وكما ذكرات انه الناطق بأسم قبيلة عتيبه وله قصيدة تعتبر من اشهر

القصائد التاريخيه في وقتنا الحاضر وهي قيلت بعد مناخ عرجا بين عتيبه

وتحالف مطير مع حرب ضد الهيلا وقال هذه الأبيات بعد ما فزعو الروقه

وصبحو مطير ولقوهم قد سرو ولا وجدو الا الكلاب مربطه والنيران

مشبوبه وهم قد انسحبو ليلاً

والقصيده موجهه للشيخ نايف بن هذال بن بصيص

حنا عتابـه للحرايـب ماشتحنـا***نضير النافر ويركب لـه وليـف

برقا لا يامـن الحرايـب ولعنـا***منزحه عن نجد دقلات الحفيـف

وحنا لهم مثل الجمال اللـي تثنـا***شياله الحمل الثقيل عن الخفيـف

نمشي وتالي الليل يسري به ضعنا***ونقل المثقل عندنا نقـل الخفيـف

في نجد خلينا القبايـل مـا تهنـا***وكم واحد من ضربنا اقفى معيف

ياليت نايف حاظراً دقلـة جملنـا***حتى يخلي نجد بالقلـب النظيـف

رديفكم شلناه مـن عرجـا لهلنـا***ولومه عليكم يامخليـت الرديـف

العام يومـك نخيتـه مـا تونـا***واليوم خليته بعد جالـك حليـف

ياللي تجي هذال رد العلـم عنـا***لو هو وراء مكة وبلدان الشريف

لا يحسبنه يوم راح وصـد عنـا***انا نقرط في الاصابع نستضيـف

المقصود بالرديف فالبيت السابع هو الشيخ حجاب بن نحيت الذي

استيسره محمد بن هندي في ذالك اليوم واكرمه شهرين وبعدها ارسله

لجماعته مكرماً معززا،،،،

يقول الشاعر كديميس العصيمي مستعرضاً تلك المعركه

أبن نحيت حجاب بين المثاريـندارت عليه بمعتلجهـن رحانـا

ينخى بني سالم وهم عنه مقفيـنوخاب الرجا فيهم وعود نخانـا

وجسمه تشارك فيه شلفا ورمحينوشلنا واسقينـا النحيتـي دوانـا

هذال المذكور في البيت الذي قبل الاخير هو الأمير هذال بن فهيد

وهذه القصيده الختاميه للشاعرنا الكبير فراج الدويجر العضياني في مدح

امراء برقا من عتيبه وللأسف ان القصيده حرفت في الوقت الحالي

لأغراض خاصه!!

ياولي العرش يارب العموم

يامعديني عواقيب الاثام=عقب هذا قربوا لي خمس كوم

خمس زينات المماشي والاولام

مربعات دون شمر بالجزوم

ناقضات الجزو في وادي جهام

قيضن بالقيض في وادي الهشوم

لين ني الهجن جا كبر العدام

انحروا برقا منجية الفحوم

من خيول ابريه ولا خيل يام

يمموهن ياطروش باليموم

يم ابو صلال جعله ما يضام

هيضلن ماهي تلاميس العلوم

ترث باني البيت عزال الجهام

ثم نصوهن الى شيخ لزوم

شيخ برقا بالمنازل والزحام

يم ابن هندي عسى عمره يدوم

سلموا لي واجهدوا لي بالسلام

يوم يركب فوق شقراه القحوم

العبيه ركضها فيه الدحام

فوقها يمنا تورد بالسهوم

تشبع اللي في مراح الخيل حام

شايل حمله معه حمل الحموم

لو تعقل اعضاه بالحملين قام

وراعي العليا مريع للفحوم

حرز تالي الخيل بايام العسام

غير نطح الخيل نطحه للسهوم

ودقله المظهور فايام الزحام

يالله اني طالبك في كل يوم

المصادر بعض من الرواه والباقي أخذ من كتب

من ادابنا الشعبيه منديل الفهيد الاسعدي ص 1 / 157 وديوان الشعر

العامي بلهجة أهل نجد/ ابو عبدالرحمن بن عقيل ص 182/ و3/215

وقصه وابيات لأبراهيم اليوسف ص 146

هذا موجز فقط عن رجلاً شرف القبيله رحمه الله رحمة واسعه،،،،

آخر تعديل هداج المخامر يوم 31-Dec-2007 في 02:15 AM.

محمد العتيبي · 31-Dec-2007, 02:17 AM

الفارس :فراج التويجر
غني عن التعريف وقد سطر له التاريخ تاريخه
واشكرك من القلب يالغالي..

التوقيع

للتواصل عبر twitter تويتر

al_bargawy@

هداج المخامر · 31-Dec-2007, 10:28 PM

اشكرك ابومشعاب على مرورك الطيب والمميز

عبدالرحمن الهيلوم · 31-Dec-2007, 10:31 PM


	((مشكور اخوي الغالي )) والله يرحمه شاعرجمع المجد كله شاعر وفارس وعقيد قوم 0والله يحفظ اعتيبة الهيلا ويكفيهم شرور خلقه