قصيده في امير الحفاه عبدالمحسن التوم رحمه الله@لشاعر بندر الشيباني

[ابوبندرالشيباني]

هذه قصيده قديمه في الامير عبدالمحسن التوم الله يرحمه امير قبيلة الحفاه

عثرنا عليها في الارشيف القديم

قالها الشاعر بندر بن تركي بن هليل الشيباني

ياعلي قرب منك صافي الحديدي=وشيك على زيته وشيك على ماه
لو كان توه من بلاده جديدي=افحص عليه وكمل اللي توراه
نريد والله يقضي اللي يريدي=نزور ابو غازي ونسمع حكاياه
شيخ الطلوح اللي طموحه بعيدي=اللي كسبها في شبابه بيمناه
اللي بنا للعز بيتن جديدي =مشيدا بالعز ساسه ومبناه
ماسكر ابوابه بقفل الحديدي=نمشي على الموتر من الباب لقصاه
لو الشباب اللي مضاله يعيدي = والله لندفع كل شين ملكناه
هذا الكلام اللي من القلب اكيدي=والشاهد اللي عالمن في خفاياه
له موقفن يفرحبه المستفيدي=واللي تغرب هاربن من خطاياه
في غربته خايف وخوفه شديدي=دايم تخالف في مصيره حضاياه
جالن عن احبابه وخصمه عنيدي=مايرحمه لو ينتخي ويترجاه
ويصبح بعد خوفه وهمه سعيدي=وتفرح عيونن باكيه بعد فرقاه
وتصير كل اوقاته افراح عيدي=وكلن يقدم من سروره هداياه
موقف فريد ومن وقف به فريدي=من غير ابو غازي يسوي سواياه
يفداه من قضا حياته وحيدي=لو كان اله شهره وفالناس اله جاه
دوبه غناته منه مانستفيدي= خسران من زاره من البعد يبغاه
يطق بابه لين ضغطه يزيدي=وقالوا بعد بكره مع العصر تلقاه
قال افتحو طرقي وداري بعيدي=ابتريث عندكم واتحراه
قالوا هذا مجنون ولا بليدي=يقول هرجن عمرناماعرفناه
وعود من الاحزان مايستزيدي=يبكي ومن شافه مع الدرب بكاه
من غير ابو غازي لحزنه يفيدي=ويفتح له ابوابه ويسمع حكاياه
لو كان كلن يزعم انه عميدي=لكن صعبات المشاكل تحداه
ويالله ياغافر ذنوب العبيدي = اللي جميع الخلق ترجي عطاياه
تامر لبو غازي بعمرن مديدي=وعسى ليا جينا نبا البيت نلقاه

اتمنى ان تحوز على استحسانكم

مع تحيات اخوكم ابو بندر الشيباني

[سعود الجعفري العنزي]

لو كان توه من بلاده جديدي
افحص عليه وكمل اللي توراه

ابو بندر الشيباني

جزله وانت جزل

[ابوبندرالشيباني]

المشاركة الأصلية كتبت بواسطة راع النوق

لو كان توه من بلاده جديدي
افحص عليه وكمل اللي توراه

ابو بندر الشيباني

جزله وانت جزل

اخوي راعي النوق

شاكر لك مرورك الكريم

والله يعطيك العافيه مع تحيات اخوك ابوبندر