حواري مع الشيطان

[نايف الجازي]

اعوذ بالله من الشيطان الرجيم


بسم الله الرحمن الرحيم


حوار عابر مع ابليس والعياذ بالله منه فاسمع مادار

يارب رحماك انا كاثرتٍ احزاني=حاسبت نفسي وبكره لا تحاسبها
طمعان يارب في رحماك طمعاني=واعمالي انصافها تلغي مكاسبها
البارحه راح كل الليل سهراني=احلل احداث مايجري واكتبها
طاح القلم من يدي باسباب رجفاني=وافكار جتني تزاحم كيف ارتبها
صرخت صرخه وانا بالبيت وحداني=من هول ضرب الجروح ومن عطايبها
وفي زحمة اللي حصل شاهدت شيطاني=في ثوب انسي وله عينين قالبها
قمت ارتجف من هوايل كل ماجاني=لكن سلم وهدى النفس ماغضبها
ضحك على حالي التعبان واوصاني=مامشي مع اللي ضمايرها تأنبها
وقال امش واركب معي من بين جنحاني=ولو تكره ابلاد علمني واجنبها
ركبت وياه غصب تصب عرقاني=والارض لله نمشي في مناكبها
واقلع لحد السما وسهيل ماباني=وشفت الكواكب تعالى من يكوكبها
واول مدينه نشاهدها بالاعياني=كانت جميله لكن الوحش غاصبها
دنس شرفها وكان المارد الزاني=والناس من حولها بدموع تسكبها
سالت اخينا وش اللي صار يافلاني=منهي ومنهم اهلها وكيف ينهبها
بالله تكلم ترى مابكاهم ابكاني=والنفس ظاقت وفيها شي يكربها
ثم التفت بالنظر ليته تعداني=قال المدينه مثل نور القمر وابها
في طهرمريم لكن الجاني الجاني=مية سنه كان باعيانه يراقبها
وباعو اهلها شرفها بابخس اثماني=سوق الضماير تساوم شخص جالبها
معها ولد كان شرعي مع ولد ثاني=الثاني ابن اللعين اللي محاربها
حربه على عيال اخوه بكل حقراني=ويحدد اهداف للجاني ويضربها
وبالصبح عند الامم تكفون ياخواني=المعتدي يذبح اطفالي ويصلبها
كله على شان كرسي بين جدراني=يبيع ارضه بلقمة سم ناهبها
طيب اخينا وانا بسال على شاني=جاوب ترى حيرتي كثرت مصايبها
الابن ماله خوال ولاش عماني=ويحررون المدينه هم قرايبها
ضحك بضحكه وبانت كل الاسناني=ضحكة تعجب وياللهول ماعجبها
قال المدينه لها اخوه وخلاني=مليار مظروب في سته ويقربها
تقسمو تركة التاريخ باحساني=يازين طبع العرب محسن مذاهبها
اخذو نصيب الاسد ذل وحقراني=راظين وادوارنا للحوش مقربها
والغول يوم اعتدى مدعوم باعواني=واحزاب لوبي تشدد في تحزبها
والعون الاكبر يجي من عند الاخواني=ولو يعلنونه وكالتهم تكذبها
حتى تقوى وقام يشب نيراني=قدام عين العرب بالعمد يلهبها
وانا سمعته ودمي جوف شرياني=يغلي وغيظي ظلوعي قام يحطبها
الكون فاني وعمرك يالبشر فاني=وشلون خوفك بدعايه موظبها
دعيت ربي وانالي رب واوحاني=يارب ندعيك دواعتن وجاوبها
لن كان غظبان منا وانت رحماني=تستغفرك نفس تحمل زور مذنبها
وسط ابتهالي سمعت بصوت ناداني=صوت له النفس بالايمان يطربها
وابليس سمعه وقام يقفل اذاني=لكن هيهات نفسي ماتادبها
اعوذ بالله منه وين وداني=سمع التعوذ وقام الكلب يخربها
قام يتبرء ولا ادري ويش صحاني=والله عيوني عن الشيطان يحجبها
لقيت نفسي بداري بين حيطاني=لارحت للقدس من يومي ولا اقربها
والصوت كان المؤذن يرفع اذاني=للفجر بالحق كلماته يلج بها
قمت وتوظيت من حظي ولا الهاني=وحصنت نفسي ومن حقي اهج بها

وهي اضغاث احلام اتمنى ان لا تحسب علي
والسلام عليكم