لم الحزن للشاعر حشر جهجاه العتيبي

[المعتبر]

ألا يـا عيونـي لا تزيديـن ضيقاتـي=كفى ماجرى لي من عـوادي ونكبـات
تجرعت كاس المـر والهـم والعنـاء=ولا فاد في الأيـام صبـري وحيلاتـي
تهد العواصف كل ما أبني وأنـا الـذي=صعيب يا أبو غزاي تحقيـق غاياتـي
مضى ليـال جعلهـا مـا تعـود لـي=تبات العرب وأنا ليا الصبح مـا أبـات
عيوني غدت للسهر مركـز ومنتجـع=وقلبـي غـدى للهم دار اجتمـاعـات
علىالهون ياعيني عن السهر والبكاء=ترىالدمع يحيي عرق الأحزان لومـات
هذا الدور وأنتي كـل ليلـة مروحـة=لكن وش كسبتي غير سهري وضيقاتي
وأنا يوم أقوله ناصـح لـك وخايـف=ويكفيك للعبرة من الـدرس مـا فـات
وأنا مقتنـع والوقـت هـذي طبيعتـه=ليا زان مـرة ضيـق الصـدر مـرات
أمـور يقـدرهـا الإلــه ونطيـعـه=وفي طاعـة الله يسهلـن الصعيبـات
ولو إن في صـدري همـوم تلوبنـي=تعاقب على قلبـي جماعـات وأفـوات
تثور علي أحزان ما لـي بهـا عهـد=وترسم على صفحة زمانـي معاناتـي
هموم ليـا قلـت استقلـت وغـادرت=تجينـي تـدق طبولهـا بالمـثـارات
تكالـب علـي وكـل بـاب تقفـلـه=تضيق علي فجوج الأرض الوسيعـات
خدعني سراب الـلال يلمـع ويطـرد=وأنا ما حسبت حساب طول المسافـات
وأنا كل ما أذكر غلطتي فـي البدايـة=تفجر على صدري براكيـن حسراتـي
بنيت المباني فوق ساس مـن الهـوى=ولا بانت إلا عقب شهريـن غلطاتـي
سكن ذاري النسناس لحظة وحاسنـي=وتهاوت على الأنقاض كـل البناياتـي
هذا الشوط الأول والله أعلم بمـا بقـى=عسى الله يجيب الباقيـة بالسلامـات
وأنا يعلم الله مـا أتعـدى ولا أعتـدي=ويلقى كلامـي مـن تتبـع بصماتـي
وأنا عبد ما زكيـت نفسـي علـى الله=وقلة خطاي مـن أكبـر المستحيـلات
وأنا أشوف كل لـه طريقـة وسيـرة=وأنا سيرتي تطبيـق دينـي وعاداتـي
وأنا ما أتعامل مع هل الغـي والجهـل=ولا أسلك طريق ما يحقـق طموحاتـي
ولكـن هـذا شــيء الله مـقـدره=عساه يتجاوز عـن ذنوبـي وزلاتـي
ليا صرت لا حاسـد ولانـي بواشـي=ولانـي بقطـاع لوصـل القـرابـات
ولا قـط غشيـت العبـاد وظلمتـهـم=ولا قمت بالتفريـق بيـن الجماعـات
أعاشر هل الـرأي المحنـك وأحبهـم=ولا أمشي مع اللي في طريقه شبوهات
وأصاحب هل الإخلاص والعلم والتقـى=نظاف القلوب أهل الوفاء والمرواتـي
وأحافظ على جزل المبـادي وأصونهـا=ولا أفرح على ربعي عدوي وشماتـي
ولاني بأجازي بالردى فاعـل الـردى=ولاأسير خطوة لين أحسـب حساباتـي
وأسامـح وأقـدر وأحتمـل وأتجاهـل=ولا أبحث عن اللي فات واللي يبى يأتي
أحدد هدف وأسلك له أفضـل مسالكـه=ولا أركض وراء الأوهام وأضيع أوقاتي
على منهج المختار أواصـل مسيرتـي=وعلى الطايلات أرخى الأعنة لهقواتـي
وأمد النظر قدام وأفطـن لمـا مضـى=ولا أخاف غيـر الله عليـم الخفيـات
سلاحي رجاي بعفـو ربـي ورحمتـه=وزادي جميل الصبـر عنـد الملمـات
ولا أقول أنا الصايب وغيري على خطأ=متى ما عرفت الحق أغيـر قناعاتـي
ولاأقول أنااللي ماأخطي الدرب والهدف=يا كم مرة زمـن الأهـداف رمياتـي
ولا أرفع يديني غير للواحـد الصمـد=هو القـادر اللـي عالـم كـل نياتـي
عليه اعتمادي فـي مراحـي وجيتـي=ومنه أستمد العون في سـد حاجاتـي
تتابـع عليـه كـل ساعـة فضايلـه=وله الحمد مني عد ما في السمـاوات
عسى النيم يصحي من منامه ويعتبـر=ولا يبنـي الجايـات مثـل القديمـات
يشيد مبانيـه الجديـدة علـى حجـر=ويحسب حساب الصـادرة والمغبـات
وأصلي وأسلم عد ما ذعـذع الهـوى=على المصطفى بأزكى وأعز الصلـوات

حشر بن جهجاه العتيبي