قصيدة محمد القثامي في طاش ماطاش - الهيـــــــــــــلا *** منتدى قبيلة عتيبة

ابو ضيف الله · 22-Oct-2006, 04:14 AM

ردا محمد القثامي على طاش ومن على شاكلتهم

على مَدّ النظر مِدّ النظر واطلق بنات الريح

00000 وِسِقْها من جنوب المملكه لحدود حايلها

وعلّمْني عن ديارٍ نِفلها مِخْتلط بالشيح

00000 بعد عدّة ليالي يبْرق الخير بمخايلها

عساني لاجلست بها وشاهدت الدلال تفيح

00000 أسج عن الهموم اللي على المتنين شايلها

واعيش الوقت وانسى الجرح واهل الجرح والتجريح

00000 واسمّعْك البيوت اللي تبيّض وجه قايلها

أنا شاعر وانقّح ماكتبت من الشِّعِر تنقيح

00000 ولاعمري سَرَجْت من الخيول الا اصايلها

واهذّب كلمتي واعرف متى التصريح والتلميح

00000 واحضّر للمسائل حل يِقْنِع فِكْر سايلها

واخاف اللي خلقني واكثر التهليل والتسبيح

00000 واقول الله ولاناسٍ خبيثاتٍ عمايلها

غوت درب الصلاح ووضعها يحتاج له تصليح

00000 مَعاول هدم ويدلّك على ذلك فعايلها

تحاربنا وهي منّا وتندب حالنا وتصيح

00000 وتاخذ من دلايل شر خلق الله دلايلها

عقارب لدغها يذبح ومنهجها يبا تصحيح

00000 تِبِث سمومها وتغرّر الخلق بتحايلها

تسب اهل القيم تبغا قيمنا فالزمان تسيح

00000 وتستهزي بقومٍ جمّل الخالق خصايلها

هذولا ودهم صرح الفضيله ينهدم ويطيح

00000 ولايبقالها فالوقت مِن يبعث رسايلها

والا ياهل العقول الدين واضح مايبي توضيح

00000 شريعة حق تنبذ كَيْلة الذلّه وكايلها

وحنّا امّةٍ كانت وسيرتها بمِسْك تفيح

00000 ولابه خير في أمّه تناسى مَجْد اوايلها

أقوله وانقلي ماقلت عنّي يابنات الريح

00000 بعد ماضِقْت بوجيهٍ خبيثاتٍ عمايلها

(( محمد القثامي ))

التوقيع

قال الشافعي رحمه الله: أركان الرجولة أربع: الديانة والأمانة والصيانة والرزانة.

قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة.