القهوه العربيه وما قيل عنها

[عباس مشعل الشيباني]

السلام عليكم ورحمه الله وبركاته

القهوة العربية كانت علماً على الكرم والرجولة والطيب في تاريخ الآباء والأجداد وقد تغنى بها كثيرا من الشعراء
ومدحوا كثيراً من الكرماء الذين عرفوا بالكرم (وقهاويهم ) نسبة إلى القهوة ( مبرهجه) أي مفتوحة طوال الوقت
وكانت النار لاتسمد بل كانت مشتعلة طوال الوقت (والدلال) بالوجار على جانب النار ...
ومن الذين اشتهروا بهذه الصفات وبمنطقة حائل خاصة نذكر على سبيل المثال من سارت بأخبارهم الركبان

بعض هذه القصائد والأبيات لعل أحد منكم لديه بعض القصائد والأبيات فيكتبها هنا وتكون لنا مرجعاً حول هذا الموضوع
وسأبدأها بقصيدة للأمير الشاعر الكريم ابن خوير:
هو الشاعر الأمير / زيد بن سلامة الخوير ... توفي بحدود عام 1334هـ رحمه الله
يقول الخوير ........

قال الذي يبدع على كل قافي =من ضامرٍ ياتن رْيامٍ مواليف
بمنومسة لقم على بكر صافي =عليه من شغل ابن سكران توليف
خلّه ليا ماتونس النذل غافي=وقرب دلالٍ مثل بطٍّ مهاديف
بدلال ماعنهن سنا النار طافي=بوجار من لادونهن بابهم جيف
مبرهجٍ تسفي عليه السوافي=من خلْقته ماطق في ركزة السيف
واحمس ولقّم بالعجل يالسنافي =بشاميةٍ طرّف لها الجمر تطريف
حماسها قرمٍ من الغوش شافي=دايم يقلبها حريصٍ على الكيف
وزلَّه وصَفَّه عن سريب المصافي =من خوفة أحدٍ قال بالكيف ياحيف
كِنَّه ليا منه غشاها الرّعافي=نثر الذّهب من فوق لوح المشانيف
وبهارها من يمّة الهند لافي=في مركبٍ يقداه زجر العواصيف
وان كان تزمل من طيورٍ هوافي =بيضٍ فسدّ أفواهها باشقر الليف
فنجالها لاشف بين الأشافي =لاكن يجذب من شفا شاربه شيف
يبرالها من مير فِجّ الخوافي=بكايرٍ تِرْمَهْ سهيلٍ ليا شيف
صبه لمن يثني خلاف المقافي =يوم الفرنج يقذِّف الملح تقذيف
ونفَّل بها اللي للمروات وافي=مادوَّر التَّجْرات به والمصاريف
اللي لياغليت شراها جزافي =مارطّله عند الدلاليل بنصيـف
ياسامعٍ مني علومٍ تشافي =خذها من اللي نافلٍ كل عرِّيف
دنياك لو ضحكت تراها بخافي =يبرم دواليب الشِّقا والتكاليف
إنهب منه من قبل مالعمر يافي =صيٌّور ماتقفي ركابك مواجيف
صيُّور عمرك ناهجٍ للذلافي=سمر الليالي تكمله بالتتاليف
صيُّور مايمسي لظى الجمر طافي =دنيا تفرق كل ربعٍ مواليف
وليا حصل عزٍّ مع الكيف كافي =ماني على الدنيا كثير التحاسيف

وهذا محمد بن مديبغ التميمي
راع المستجدة رحمه الله

يادلتي لايجزعك واهج النار=ماجبتك إلا باغي تحْتضينه
أبي ليا جونا مشاكيل وخيار=اقلّطك والرزق ربي ضمينه
ياعنك ماغظلم حجاجي عن الجار=ولايوم ماعنا تقازى الظّغينه

وهذي لحمد بن ناحي المطيري .. يقول

يازين شبة نارها العصر ياخليف =لا مالت الفيه وزان البراد
كسرت فنجال على غاية الكيف =لاعج ريحه مثل ريح الزباد
جونا مسايير يبون العجاريف =لى أوحو دنين النجر مثل المنادي
جابوا سوالف طيبين المحاريف =اللي عليهم يقهرون الطراد

وهذه قصيدة .... زيد الخشيم [يرحمه الله] ... ايضاً بالقهوة... وغير القهوة

لاضاق صدري قمت اسوي من الكيـــف=فنجال بن مايغــــبب ســريبــــــه
بكرٍ على بكرٍ عـــذي عن العيــــــــف= يطرى على ان نام خطو الزريبه
وانٍ مصـبـه كــن لــــــونه الى شـيـف=سـلـك الحـرير الى تمهل صبيبه
صــــبــــه الممرور براسـه زعـانـيـف =اللي إلى شبت يصالي لهيبـــــــه
ويثنـــى عن الرّبع المقفين بالســــيـف =لاحـــــل في تال التفافيق ديبـــــه
وفيــنــا محـازمنــا اسـوات الكرانيــف =ومعــنا خطاة املظب لاح شيبـــه
لعـيـــون غـيـدٍ شرّ كت تـنـثـر الليــف =اللي شـــكا وارد قـناهـا عـسيـبـه
بشرقــي قـفـار كنهــا مزنة الصـيـف =شـرقٍ عن البطحا بجازع شعيبه
اللي نمـاهـا لــلـــمـســايير والضـــيف =يوم ان ولــد النذل حارب قريبـه
صرنا لعدلات المناظر كــلاليـــــــــــف =ننجش لهم ملح الشـفا كل عيـبــه

وهذه أبيات من قصيدة لاتحضرني كاملة
للشاعر ( الصعيليك ) يمتدح ( ابن لحيدان )
الكريم المشهور بما يستنفد من القهوة يقول :

حرام مايرخص بصنعاء بضاعه =وابن لحيدان على جاهد القاع
مانفدت يمناه من البن ساعه =يطبخ شهر للزوم صكاك الاصباع
ليا من عيلات الاجاويد ضاعه =يفدع لو ان المجيدي على صاع

وهذه القصيده الرائعه .. لمبارك بن عبيكه بن رمال
*******************************************

قم يالمقهوي دن نجر ومحماس =واحمس لنا من حب صنعا نماها
احمس وزين حمسة البن بقياس =دقــه ولقمهـا وعـجل سواهـا
وصبه لممرور على الخيل مدباس=تقفي عنه صم الرمك لانصاها
من فوق ماتاخذ على الخيل مرواس=لاجدعت خبثات الانفس حذاها
واثنه لمن حوله على الزبر جلاس=اهل السموت اللي بعيد مداها
ابن عبيكه هرجته مابها باس=تطرب لها كرام اللحى من حلاها
طول الجدار وقصرة الرجل نوماس=لا صار ما للرجــل داع دعاهــا
تصير بعيون الرفاقه معك باس=لاصار ماتدعى تره من عناها
يصير قالات ويصير لولاس =ونوبن من الادنين ياتي بلاها
قلبك يصير ويضرب القلب عوماس=والنفس تقدح عقب زايد غلاها
خلك على بابك تقل لون حراس=لاجو عليهن محترين عشاها
لاجن مع الخل الشمالي لها اضراس=والكل تشكي رجلها من حفاها
نرحب بهم من قبل تجديع الالباس =ونقلط لهم تمر الحلا من نماها
ونذبح لهم كبش مربى بالاطعاس=ونقلطه من قبل يقرب مساها
هذي سلوم جدودنا قبل من راس=واللي بعدنا كــان ربي هداهـا

الشاعر/ سلطان بن عبدالله الجلعود يرحمه الله ولد بسميراء حوالي عام1320هـ وتوفي بها عام1374ه

الله على الفنجال مع هجعة النــــــــــاس=بدلال نارٍ مايبطل سنــاهـــــــــــــــا
مع حمسة يملا بهــا كل محمـــــــــــاس=ويقلبــه قرم يعـرف استواهــــــــــــا
قم يافرج شبّه تر الكبد والـــــــــــــرأس =العين اشوفه قازيه من خطاهـــــــــا
حط الجروم اللي من العام يبـــــــــــاس =.ليـاما يطوح ضوها مع فضاهــــــــا
واحمس على جمـــر ترى ماله اجـناس=وكفـّه ليا منه عرقها غشــاهــــــــــا
واودع بهاره هيل ورهه بالاجـــــراس =ياخالط الفنجال تر هو حلآهـــــــــــا
ودقه بنجر يسمعه كل نعـــــــــــــــاس=ولاتغلق الضبة على من بغاهــــــــــا
وصفـه وصبه تر هو الصفى بقيــــاس= ماهو خطاة الخامل اللي طهاهـــــــا
اللي يحطه باوسط النار مرفــــــــــاس = لما يطير قبوها مع غماهــــــــــــــــا

وهذه قصيده للشاعر / عضيب بن شلاح الحربي ... يذكر فيها مجالس القهوة ويصنف الرجال حسب رؤيته ...يقول

ياما حلا عقب العشا شبة النــــــار =عقب الهجوع لا رقد كل كوبـــــــه
بقفرية ياعبيد يودع له اشعــــــــار=وسواة فنجال يشوق بصبوبـــــــه
حبه على المطلوب من بن وبهــار=يعجبك بالفنجال صبغه وروبـــــــه
كيف يجوز لشارب الكيف والكــــار=لو دوروا به غمزة مــــا لقوبـــــه
في مجلس فيه المشاكيل حضــــار=بغيبة ردي الحظ عنهم بنوبــــــــه
اللي يخزوون المسير بالانظـــــــار=تكاظموا واللي جليس شوشوبــــه
تلافتوا على بعضهم بالانظـــــــــار =وتغامزوا مابينهم وضحكوبــــــــه
الناس فيهم يافتى الجود هــــــــذار=مسترحل لبليس زين ركوبـــــــــــه
عراض غرة مسلم غافل غـــــــــار=يعرضه للناس لو ما حكوبـــــــــــه
دايم لغرات الاجاويد عقـــــــــــــــار=يظهرعيوب ولا درى عن عيوبــــه
وفيهم تبيني لايسرك ولاضـــــــــار=ماغير يحسب للربايع ضروبــــــــه
وفيهم حصيني قبوع قمــــــــــــار=يوصف على ماقيل به طير ذوبــــه
وفيهم بليهي على الكود صبـــــــار=يصبر ولو زادت عليه الصعوبـــــه
لا جا زمان فيه غلين الاسعـــــــــار=غدى لربعه بالمكاييل جلوبــــــــــه
وانا جا نهار الضيق بالموسم الحار=يرخص بعمره مايعد محسوبـــــــه

وهذه الابيات قلها احد رجال بني تميم في القهوه

وهو تركي بن فوزان بن ماضي التميمي00

قم يابن نازي سو ماينعش البال=من الكيف سوه كنت راعي شطاره
كيف لنا ماهوب كيف للانذال=اللي عن الجودا يهاب الخساره
قم سولي ياريف الانجاب فنجال=ادغث له الطبخة وكيف بهاره
اشقر حمرة تبذل على شانه المال=وان جنب المسبوع دربه يساره
وان جو مناكيف على السير وعجال=عقب التعب يبغون منا وقاره
نقلط لهم ميسورنا مع رخا البال=يوم ولد اللاش غلش بداره
واليوم لي صرف الدهر جاب الاهوال=ما قال قلبي قوي العباره
خف القنا والثقل جاء مثل ما قال=خف الرديف وراعي وراعي الكور داره
واستنعج السرحان والبس ما سال=عن ذيب غدرا ما يهاب السماره
في دارنا نطفي كدا المر بزلال=يكود برد الماي يجلي حراره

وهذة قصيدة اخرى

ونيت ونت من سرى الليل حشاش=عقب الحياء يصبر على كل منقود
وقم صب فنجان ترى الراس منداش=ياشوق من قرنة على المتن مرجود
من دلة مربوبة عدها الشاش=وبهارها مقدار خمسة عشر عود

والقهوة العربية ربما تكون مجرد مشروب محبب بالنسبة للأناس العاديين، ولكنها بالنسبة للمبدعين ـ ولشعراء الصحراء والبادية بصفة خاصة ـ قماشة فنية خصبة تصلح لاحتواء تجارب ثرية وخيالات غنية! و(القهوة) ـ مثلما ورد على الإنترنت من خلال تقرير أحد المواقع العربية ـ هي رمز الكرم والضيافة،.. وهي ذلك المشروب الذي يقبل على تناوله أناس كثيرون، فهناك القهوة التركية والقهوة البرازيلية، والقهوة العربية وغيرها. وهي تختلف من بلد إلى آخر من حيث طريقة عملها..، وهذه القهوة هي التي سطر كثير من الشعراء الأبيات فيها منذ القدم.

عنوان الضيافة !

والحديث عن شجرة البن أمر طويل جداً لما لهذه القهوة من مكانة في نفوس الكثيرين، فالقهوة العربية عنوان الضيافة مما جعلها تستهلك بشكل كبير في كثير من بلدان العالم، وهناك قصص وروايات كثيرة تحكي اكتشافها..، فقد قيل إن أحد رعاة الغنم من بلاد الحبشة عندما أكلت أغنامه قسطا كبيرا من هذه الحبوب (القهوة) أخذت في حالة انتباه مستمرة، بالإضافة إلى عدم استقرار هذه الأغنام طيلة الليل، ولم يغمض لها جفن، فأخذ حباتها وزرعها فوق جبال اليمن، فأخذها الناس وشربوا منها في كل وقت..، وكان ذلك في القرن الخامس عشر، ومنها انتقلت إلى الحجاز وبلاد مصر. هذا وشجرة البن يمتد عمرها إلى عشرين عاما، وتنتج في السنة ثلاث مرات، وتنمو غالبا في المناطق الاستوائية وخاصة في الأراضي البركانية. وهناك بلاد كثيرة يزرع فيها البن بوفرة وهي الحبشة وكذلك المكسيك وأندونيسيا والبرازيل التي تعتبر أكبر وأوسع بلد منتج ومصدر لهذه القهوة مختلفة الأصناف والجودة في أنواعها وقيمتها في الكثير من بلدان العالم اليوم.

وتحضير القهوة العربية ذو ميزة دقيقة، ولابد من الانتباه بتحضيرها بكل احتساب سواء في وقت عملها أو في طحنها أو في حساب كمية القهوة ومقياس الهيل..، وتطبخ القهوة البن بالماء المغلي لفترة من الوقت، وبعد الغلي يضاف إليها الهيل بمقياس معين دون زيادة أو نقصان، ثم تترك لعدة دقائق من الوقت حتى تصفى القهوة وبعدها تقدم إلى الضيف في الدلة بنكهتها الفريدة وطعمها المميز.

إنها القهوة العربية التي سطرت فيها الأبيات الكثيرة ووصفها عشرات الشعراء هي والأواني التي يتم فيها تحضير القهوة (ومنها النجر والمحماس الدلة والمبرد والفنجان.. .. إلخ).


الشعراء والقهوة

وهذه هي مجموعة من الأبيات لبعض شعراء بادية الجزيرة العربية الذين حرصوا فيها على ذكر ووصف القهوة العربية المميزة.

يقول الشاعر محمد بن أحمد بن محمد السديري:

صبه ومده يا كريم السبالي=يبعد همومي يوم اشمه بالانفاس
فنجال يغدي ما تصور ببالي=روابع تضرب به أخماس وأسداس

وهذا الشاعر الفارس تركي بن حميد حيث يصف القهوة وصوت النجر بقوله:

يا ما حلا يا عبيد في وقت الاسحار=جر الفراش وشب ضو المناره
معدلة تجذا على صالي النار=ونجر الى حرك تزايد عياره
النجر طق وجاذب كل مرار=مالفه الملفوف من دون جاره
في ربعة ماهيب تحجب عن الجار=لامن ولد اللاش ما شب ناره

وكذلك هناك القصيدة المشهورة للشاعر دغيم الظلماوي في القهوة، وفيها يقول:

يا كليب شب النار يا كليب شبه=عليك شبه والحطب لك يجابي
الوالمه يا كليب عجل بصبه=والرزق عند اللي ينشي السحابي
حنا علينا جيب ماها وحبه=وعليك تقليط الدلال العذابي
ادغث لها يا كليب من جزل خبه=وشبه الى منه هبا كل هابي
باغي إلى شبيتها ثم قبه=تجذب سراة من بعيد غيابي
بنسرية يا كليب صلف مهبه=متلطمين وسوقهم بالعقابي
صبه لقرم صرفته ما حسبّه=يوم البخيل مدنهر الوجه هابي
وعده عن اللي ما يداري المسبه=اللي يدور بالقصي الغيابي
لا جاضع المتروع خطو الجلبه=يا حلو تالي الليل خبط الركابي
اقحص لهم وابدي سلام المحبه=لا شح بالهين كبير العلابي

وكذلك يقول الشاعر سعد بن حمد بن ضويان في القهوة:

ياحسين لاكني على الجمر مجضوع=من فقد خلاني وفقدي ربوعي
قم سو فنجالٍ ترى الراس مصدوع=صفه وزله عن سريب الخموعي
فنجال فيه مخموس الكيف مجموع=بدلال يشدن الخباس الوقوعي
ونجر دلاله ماو بالصوت مفجوع=يا زين حسه والخلايق هجوعي
وانجاك بالمجلس سنافي وبالوع=عده على الطيب وكب البلوعي

وهذا الشاعر عبد الله العلي الحرير يقول في القهوة:

قم سو فنجال ونظف أدلاله=ريحه لراعي الكيف يجلي اعماسه
اشعل ولونه مثل دم الغزاله=لا ذاقه الراقد يحارب انعاسه
في مجلس تدله الى جاء مجاله=اللي عن اللجات يقصر حساسه
والا ترا بعض المجالس عذاله=لا معشر طيب ولا فيه اناسه

ويقول الشاعر غازي بن عون في الغرض ذاته:

يا ريف قلبي للمسايير قم شب=وحط المنارة في طويل الظلالي
عقب تشق لها لجزل الحطب جب=وهات النجر واحضر جداد الدلالي
دنّه وخلّه للمسايير يجذب=لا قام صوته للنشامى يلالي
يوحونه الجيران لا قام يقنب=ويجيك الاقصى والقصير الموالي

ويقول سليمان المحمد الهزاع في قصيدة عن القهوة:

لا في على جمر الغضى سو فنجال=فنجال بن من رخيص وغالي
حيثك قديم مغربل البن غربال=حكيم عند مصاطرات الدلالي
خله على المطلوب يلفت لنا البال=يفتح لنا المعنى بمبدا المقالي
الى انطلق من ثعلب المبهرة مال=يشدي خضاب مخفرات حيالي

ويقول محمد العبد الله القاضي عن القهوة وعن الأواني التي تجهز بها القهوة:

دنيت لي من غالي البن مالاق=بالكف صافيها عن العذق منسوق
احمس ثلاث يا نديمي على ساق=ريحه على جمر الغضى يفضح السوق
واياك والنيه وبالك والاحراق=واصحا تصير بحمسة البن مطفوق
دقه بنجر يسمعه كل مشتاق=راع الهوى يطرب الى دق بخفوق
لقم بدله مولع كنها ساق=مصبوبة مربوبة تقل غرنوق
خله تفوح وراعي الكيف يشتاق=الى طفح له جوهر صح له ذوق
زله على وضحا بها خمسة ارناق=هيل ومسمار بالاسباب مسحوق
مع زعفران والشمطري إلى انساق=والعنبر الغالي على الطاق مطبوق
إلى اجتمع هذا وهذا بتيفاق=صبه كفيت العوق عن كل مخلوق

وهذا راكان بن حثلين يقول في قصيدة مشهورة:

ياما حلا الفنجال مع سيحة البال=في مجلس ما فيه نفس ثقيله
هذا ولد وهذا ولد خال=وهذا رفيق ما لقينا مثيله

وهذا الشاعر هايس بن مجلاد يقول وهو يصف الدلة وصوت النجر:

قم سو ما يصبغ على الصين يا ذياب=بدلال يشدن البطاط المحاديب
احمس الى من العرق فوقها ذاب=واستدن ما يجذب عليك الشراريب
نجر يصيح من الطرب تقل بحجاب=يصبر على طول الدهر للمواجيب

فا قال الشاعر الامير عبد الرحمن بن عودة الفضلي في قصيده يوصف القهوة العربيه الاصيله

يازين فنجال الضحى با المراحي= امسكبه راعــــــيه والنذل مجاه
فنجال اشـــــقر بين ني ونجاحي=يصبغ بكاس الصين كالدم مجراه
راعـــــيه مادور ابصاعة رباحي=يبغيه لاجــــــاو المسايير مجراه
ريحه على جمر الغضا حين فاحي=يبــــــلغ مسيرة يــوم يابعد مسراه
لا شمة المشتاق با لارض طاحي=يسكر بريحه من بعيد (ن) إلى جاه
لحمس با الرافق مع بال صــاحي=نـــــــاره قليله او على جمر يصلاه
يـــــفوح له بين الحمى واللياحي=ريحــــــه كما العنبر من الهند مجناه
لأصفر واحمر كالزمرد وشاحي=بين النـــــياه وبين الانجــــاح مكفاه
دقه بنجر يعجــــبك با الصياحي=صــــــــوته عجيب ومرتفع با لملالاه

والقصيده طووووووويله

وقال الشاعر مشاري بن ربيعان :

مانيب هلباج على النوم نعاس=همه طعامه لين كرشه ملاها
ادرج الدنيا بالافعال وقيـــــاس=نسعد عيون وعين نحسن دواها
لا ضاق صدري جبت نجر ومحماس=ودلال بيض غالي مشتراها
قم سو فنجاال على خمسه اجناس=احذر تجي حرقه وبالك نياها
خلك لها عن كل عذروب حساس=قيس له الطبخه على قد ماها
حتىآ يجي فنجالها يجلي الاعماس=عقب الصلف والسهر ماكبر غلاها
خصص مشاكيل على النار جلاس=حبوس الرجال الي بعيد مداها
بدوا به الي للمعادين نطاس=مودع سمان الهجن يثلع حفاها
والثاني الي يثني العصب بالراس=في ربعه يشبع بها من نصاها
والثالث الي يحمي دن الافراس=لاروحت خيل بخيل حماها
وباقي الملا لو ماتقهويه لا باس=هذاره المجلس قليل حلاها
لا نافع ربعه ولا حاش نوماس=ضابط مال ولا يذري ذراها

بحث واعداد

عباس مشعل الشيباني