الــضــيــقــة - للشاعر صالح آل مانعه المرّي

[سلطان عايض]

السلام عليكم ورحمة الله وبركاته

هذه قصيدة للشاعر الرائع / صالح آل مانعه المري أتمنى أن تنال إعجابكم

الضيقة اللـي مالهـا حـزه ولا منهـا مصـد = أخـاف ساعـات العصيـر المقبلـه تاتيبهـا
يالله دخيلك من قسـى وقتـي وحـظٍ ماصمـد = في وجه صكات الليالـي يـوم يقنـب ذيبهـا
واعوذ بك من فتنة الدنيا ومـن ضيـق اللحـد = واسئلك عن نفسي مـن الشيطـان لايغويبهـا
وسئلك تغفر لـي ولصحابـي ولعدائـي بعـد = تعفو عن ذنوبٍ نجـي فيهـا وحـن ندريبهـا
الوقت يشعاني على الطرقه وانا مافـي جهـد = شهب الليالي تقهـر صـدور الرجـال بغيبهـا
لكن انا لـو جـارت ضروفـي وزادت بالعـدد = اضرب بها الحايط طناخة راس ليـه اشكيبهـا
واعز نفسي مع مداغيـش النشامـا واجتهـد = على ظـروفٍ تجلـب الضيقـه ولا تسريبهـا
والبارحه في راس مشرافـي ولا افكـر فحـد = كني ملكـت الأرض مـن شروقهـا لمغيبهـا
قعدت افكر فالسنين اللي مضـت واللـي بعـد = ليييه السنين التاليه تفشـل ويفشـل صيبهـا
وليه الرجل ماعاد هو يوفـي ليـا منـه وعـد = وليه العلوم الطيّبـه بعـض الرجـال تسيبهـا
وليه الرفيق اللـي ليـا منـه تجمـل ماجحـد = ان ماذكرها لك .. مع كـل العـرب يحكيبهـا
ياحيف يارفقة ضعيف النفـس مافيهـا سنـد = مالله بجابرني علـى رفقتـك ويـش ابغيبهـا
لاصرت تطعننـي بشلفـاك الرهيفـه وتخمـد = الطعنه اللـي فالظهـر مانيـب مـن يغزيبهـا
لو دامت افعالـك كـذا ردت لـك الدنيـا لـدد = حافظ علـى سمعتـك مـن فعلتـك لاتقفيبهـا
الرجـل لامنـه نـوى يغـزي ينـوّه ويهجـد = ماهوب يغزي وان رجع هزل العلـوم يجيبهـا
لكن ياطلـق الحجـاج اللـي عيونـك ماتلـد = الا لـروس النايفـات اللـي مهـو يبديبـهـا
كون الحرار الشقـر وعيـال الذيابـه والأسـد = ولا الرجال اللي مـع العريـف يذكـر طيبهـا
اسئل رفيقك من بعد مغـزاه قلـه وش حصـد = غير العلوم اللي ماتطلق وجه مـن يمشيبهـا
عزالله انه كان فعيـون النشامـا مثـل اُحـد = واليوم مثـل الحيـة اللـي تنعـرف بجنيبهـا
حاولت اكذب بالخبر لكـن علـى غمـي وكـد = والسالفـه قـام الزمـان المنحـرف يدويبهـا
لكن على كلاً ياحامد كانـك بتاتـي .. حمـد!! = قله ترا البندق من المؤسـف تثـور بجيبهـا
البندق اللي ماتصوب كـون ابـن عـم وولـد = عيبٍ علـى الرجـال ينقلهـا ويجهـل عيبهـا
لاصارت البندق معا عاقل وهـي فيهـا صـدد = كبرت خسايرهـا عليـه اليـا قعـد يرميبهـا
وشلون لاصارت معا جاهـل وفعيونـه رمـد!! = لاوالله الا راحـت الدنيـا وراح اللـي يـهـا
رفقـة مثـل هـذا وهـذا كلهـا كيـد ونكـد = ولا تـحـرا مـنّـه الا نكـبـةٍ يضويبـهـا
ماكنه الا العقـرب اللـي ذيلهـا كلهـا عقـد = ان روّعتـك بزولهـا ولا قـرصـك ذنيبـهـا
لكـن تعـال اعلمـك ياصـاح بعلـومٍ جــدد = لو تزعلك بعض النقط... لايزعلك نطقـي بهـا
اشره على العاقل ليا شفتـه بجرحـي يعتمـد = ولا العلـوم الباقيـه مانيـب مـن يحريبهـا
البيت مايبنى بـدون اطناب..وحجاب..وعمـد = والنـار مـن شبابهـا والخيـل مـن ركيبهـا
وأنا عيوني للطليعه فـوق ..معطتنـي عهـد = والأرض تكـره مشيتـي وانـا بعـد ماليبهـا
لاسار في راسي سحابة شعر.وبروق.. ورعـد = وشلون تبغى الأرض تصفالي وانـا موذيبهـا
شاعر واشوش لصيحة الجمهور وانحت في جلد = وان صفق الجمهور جزلات البيـوت ارهيبهـا
اغزي على بيت الشعر في عقـر داره ويهجـد = من هيبتي عنده بيوت الشعـر لـي يصخيبهـا
كذا كذا الشاعـر يجـي فالشعـر قمـه للأبـد = ولا بـلاش يلخـبـط الأبـيـات ويهذريبـهـا
الشعر مثل الموج ودقاق الشعـر مثـل الزبـد = ولا الدرر في غبـةٍ بعـض الرجـال تهيبهـا
وانا بحـاول قـدر الأمكـان اتعمـق وابتعـد = وان قلت لك باجيبها ... في ذا الشنب لاجيبهـا
شاعر مفوّه واسبـح الغبـه وابشـر بالسعـد = واكسب دررها كسب.مابيّـع بهـا واشريبهـا
لأن الشعر مثل البلد وانـا مثـل حاكـم بلـد = وبلادي اسجـل تواقيعـي بهـا واسمـي بهـا
وانا فقط شاعر ولا ابغى لي بلـد لـو تنّوجـد = ابلادي حروف القصيد اصبح بهـا وأمسيبهـا
واسجد لوجه الله واقول ارجوك يافـردٍ صمـد = تعفو عن ذنوبٍ نجي فيها وحـن نـدري بهـا

[محمد الزايدي]

لاهنت يابو عايض على القصيده الجميله

ودمت بخير

[سلطان عايض]

لا شنت أخوي محمد الزايدي وشاكر لك مرورك